OBAJA 1 - Pustaka Si Badia

¹ Enda me nubuat Obaja, e me kata si ibelasken TUHAN si Erdolat kerna bangsa Edom. TUHAN enggo nuruh suruh-suruhenna man bangsa-bangsa janah kerina kita enggo megisa kai si ikatakenna, “Ersikaplah! Ota kita erperang ras Edom!”

TUHAN ngukum Edom

² Nina TUHAN man Edom, “Kubahan maka kote kam kerina kalak megombang man bandu.

³ Ukurndu si meganjang enggo nebu-nebu kam. Kutandu si erbentengken lingling batu, rumahndu si meganjang i datas deleng-deleng; nindu i bas ukurndu, “Ise ngasup si pesusur Aku?”

⁴ Aminna pe ibahanndu inganndu seri ganjangna ras asar rajawali aminna tempa-tempa i tengah bintang-bintang pe inganndu, kupesusur nge kam.

⁵ Tupung pinangko reh berngi-berngi, kai ia perlu e ngenca ibuatna. Tupung kalak pepulung buah anggur, itadingkenna nge deba-deba. Tapi imbang-imbangndu isapuna kam kerina.

⁶ O, kesusuren Esau, barang-barangndu enggo irampas.

⁷ Teman-temanndu enggo nipu kam, enggo ipelawesna kam i bas negerindu nari. Kalak si erteman ras kam enggo naluken kam. Temanndu si sada perpangan enggo nidingi kam; nina kerna kam, ‘I ja nge kebeluhenna ndube?’

⁸ Tupung paksa Kuukum Edom. Kukernepken me kalakna si erpengertin, Kulesapken kalak si pentar.

⁹ Si mbisa i Teman nari la banci lang nggirgir, kerina tentera Edom la banci lang ibunuh.”

Sabapna maka Edom iukum

¹⁰ “Perbahan isamun dingen ibunuhndu seninandu kesusuren Jakup, la banci lang kernep kam janah ijuruken rasa lalap.

¹¹ Tedis kam i dauh-dauh nari, i bas wari e, tupung pintu gerbang Jerusalem iruntuhken musuh, seri kam jahatna ras kalak si la itandai, e me ras kalak si ngangkut barang-barang Jerusalem, dingen mbagi-mbagikenca sapih-sapih ia.

¹² Engkai maka erpesta kam, erkiteken kiniseran si jadi man seninandu kalak Juda e? Engkai maka meriah akapndu, tupung Juda iruntuhken? Engkai maka kam tawa tupung ia i bas kepiceten?

¹³ Engkai maka ibengketindu kuta bangsangKu, ersenang-senang i bas kiniseranna, janah muati kebayakenna, tupung ia i bas kepiceten?

¹⁴ Engkai maka kam tedis i simpang-simpang nangkap ia si atena kiam? Engkai maka iendeskenndu ia man imbang-imbangna tupung ia i bas kepiceten?

Dibata ngukum bangsa-bangsa

¹⁵ Enggo kap ndeher warina, Aku, TUHAN, mereken ukumen man bangsa-bangsa. O Edom kai si enggo ilakokenndu, la banci lang ilakoken ka man bandu.

¹⁶ BangsangKu enggo minem calung ukumen si pagit i datas delengKu si badia. Tapi kerina bangsa-bangsa i sekelewetna la banci lang minem calung ukumen si terpagiten. La banci lang kerina ia nginemsa jenari lesap.

Israel menang

¹⁷ Tapi kalak si pulah nangkeng kap ku Deleng Sion, janah deleng e jadi ingan si badia. Kesusuren Jakup la banci lang ndatken bagin, i bas taneh kalak si ndube ngerebut tanehna.

¹⁸ Kesusuren Jakup ras Jusup desken api si gurlah, desken api si enciluki pinugun nggala; icilukna me kerina kesusuren Esau, janah sekalak pe la banci pulah ibahanna. Aku TUHAN kap si enggo melasken kata enda.

¹⁹ Bangsa i Selatan Juda nari la banci lang engkuasai Edom, kalak si arah Barat ture-ture deleng nari la banci lang naluken kalak Pilisti. Eperaim ras Samaria la banci la man Israel, kalak Benyamin ibuatna me Gileat.

²⁰ Tentera si ibuang i Utara Israel nari la banci la mulih pelawes kalak Punikia, terus ku Utara Sarpat. Kalak Jerusalem si ibuang ku Sardis italukenna me kuta-kuta i Utara Juda.

²¹ Kalak Jerusalem si permenang iserangna janah ikuasaina me Edom. Dingen TUHAN jine me si jadi Rajana.”