NAHUM 1 - Pustaka Si Badia

¹ Enda me kata Dibata ras pengenehen Nahum kerna Niniwe. Nahum e me kalak Elkos.

Pernembeh ate TUHAN kempak Niniwe

² TUHAN Dibata mecimberu, iukumNa kasa kalak si ngelawan Ia; alu rawana erbalas Ia.

³ TUHAN labo meter merawa, aminna pe Ia erkuasa. Kerina kalak si ersalah iukumNa. Ku ja TUHAN erdalan i je lit angin kalisungsung, embun bekas gebuk nahena erdalan!

⁴ IperentahkenNa lawit, minter kerah. Ia kap si erbahanca kerah lau mbelin. Si erbahanca kerah mbalmbal Basan ras Deleng Karmel, si erbahanca melus bunga-bunga Libanon.

⁵ Deleng-deleng nggirgir i adep-adepen TUHAN, uruk-uruk melengas i lebe-lebeNa. Doni mundu-undu tupung TUHAN encidahken baNa pertibi ras isina nggirgir kerina.

⁶ Ise kin banci tetap nggeluh, adi nembeh Ia? Ise ngasup nahanken las pernembehNa si merara? ItungkaskenNa rawana desken api si gara; batu si galang, getem jadi abu i adep-adepenNa.

⁷ TUHAN mehuli kap, ikawaliNa bangsaNa i bas kiniseran, ipermakaniNa kalak si mulihken ndahi Ia.

⁸ Desken banjir si mbelin iombakkenna kalak maka radas kal imbang-imbangNa, kalak si ngelawan Ia igerana kempak kematen.

⁹ Engkai maka kam erpekat ngelawan TUHAN? IkernepkenNa me kam. La lit kalak ngasup dua kali ngimbangisa.

¹⁰ Desken rambah duri si serbut dingen nggala si kerah iciluk me kam!

¹¹ O Niniwe, i bas kam nari rehna kalak si jahatna kal sura-surana, si erpekat ngelawan TUHAN.

¹² Enda me si ikataken TUHAN kempak kalak Israel, “Aminna pe kalak Assur megegeh janah nterem, ikernepken dingen ilesapken kang ia. O bangsangKu, Kubahan mesera iakapndu, tapi lanai Kuulihi erbahan bage.

¹³ Genduari Kupengadi me kuasa Assur kempak kam jenari Kupeltepken me rante si ngiket kam.”

¹⁴ Enda me si iperentahken TUHAN kerna Assur, “Lanai lit kesusurenna si nerusken gelarna. Kukernepken gana-gana si i bas rumah dibatana. Aku engkuruk kuburen kalak Assur. Lanai ia patut nggeluh.”

¹⁵ Nehenlah! Ena reh persuruhen arah deleng-deleng nari, maba berita si mehuli! Ia reh meritaken berita kemenangen. O kalak Juda erpestalah! Jenari sehken padanndu man Dibata. Kalak jahat lanai ndigan pe nerang negerindu. Enggo keri kal ia ikernepken.