JOEL 1 - Pustaka Si Badia

¹ Enda me kata TUHAN man Joel anak si Petuel.

Ceda ate bangsa e perban labang encedai negeri

² O Pertua-pertua, megermetlah, kerina kalak si i Juda dengkehkenlah. Lit kin pernah jadi bagenda i bas jamanndu ntah i bas jaman nini-ninindu nai?

³ Turiken man anak-anakndu kerina si jadi enda, maka iturikenna ka kempak anak-anakna, anak-anakna nurikenca ka kempak kesusuren si arah pudi.

⁴ Pegancih-gancih reh labang erdemuyung ipanganina sinuan-sinuanndu. Kenca lawes si pemena, reh ka labang si deban erdemuyung. Keri ipanganina sinuan-sinuan si lit denga tading.

⁵ O kalak pemabuk, kekeken jenari ngandungken, o kam peminem-minem anggur, tangislah; buah anggur enggo kernep, lau anggur si mbaru lanai banci ibahan.

⁶ Sada bala labang enggo reh nerang negerinta; gegehna lanai teralang, buena lanai terkira. Ipenna bali telapna ras ipen singa.

⁷ Enggo ikernepkenna buah anggurta, enggo ingatngatina batang aranta. Kulit batang kayu e pe keri ipanganina, seh maka enggo mbentar dahan-dahanna.

⁸ Tangiskenlah bali ras pertangis singuda-nguda erkiteken kepaten anak perana si nandangi ngempoi ia.

⁹ Lanai lit persembahen pangan ras inemen guna Rumah Pertoton, ceda ate imam-imam lanai lit man persembahenken man TUHAN.

¹⁰ Juma-juma enggo terulang; taneh tangis ngandung sabap gandum enggo radas, buah anggur enggo kerah, minak saitun enggo kelayap.

¹¹ Ndeleken, o perjuma, tangisken, o kam si perkebun anggur, erkiteken gandum ras jaba ras kerina ulih juma enggo radas kal.

¹² Batang anggur ras ara enggo kerah kerina batang kayu si erbuah; kerah jenari mate. Keriahen bangsa e enggo bene.

¹³ O imam-imam si ngelai batar-batar, pakekenlah uis guni tanda rate ceda, jenari tangisken. To bengket ku bas Rumah Pertoton jenari ngandungken gedang-gedang berngi! Lanai lit persembahen pangan ras inemen si man persembahenken man TUHAN.

¹⁴ Suruh kerina erpuasa, lebuh perpulungen! Pepulung peminpin-peminpin ras kerina kalak Juda, gelah bengket ia kerina ku Rumah Pertoton TUHAN Dibatandu maka alu serko, ertoto ia man baNa.

¹⁵ Wari TUHAN enggo ndeher, e me wari cilaka, si rehna i bas si Mada Kuasa nari. Andiko mejinna cilaka si ibahanNa i bas wari e!

¹⁶ Teridah kita enggo kote kerina, erkiteken kerina pangan enggo lesap. Lanai lit keriahen, i bas Rumah Pertoton TUHAN Dibatanta.

¹⁷ Benih maten i bas taneh si kerah. Lanai lit gandum si man lumbungenken e maka enggo runtuh lumbung-lumbung si lume.

¹⁸ Lembu erboh perban serana, perbahan lanai lit mbalmbal inganna nggagat; rarasen biri-biri pe seh kal iakapna serana.

¹⁹ Erlebuh aku man baNdu, o TUHAN, sabap mbalmbal ras batang kayu enggo kerah tempa-tempa api enciluksa.

²⁰ Rubia-rubia si meliar pe serko man baNdu sabap ulu lau pe enggo jadi kerah.