Zozye 1 - Labib An Kreol Seselwa

Bondye I Ordonn Zozye Pran Posesyon Kanaan

¹ Apre lanmor Moiz, serviter SENYER, SENYER ti koz avek Zozye, garson Noun e asistan Moiz.

² I ti dir li, “Mon serviter Moiz in mor. Aprezan, leve, travers larivyer Zourden, ou avek tou sa pep e antre dan sa pei ki mon pe donn bann Izraelit.

³ Parey mon ti dir Moiz, partou kot zot lipye pou marse, mon pou donn zot.

⁴ Zot frontyer pou pran depi dezer, dan Sid ziska Liban dan Nor, e al ziska gran larivyer Efrat, tou pei bann Hitit, ziska lanmer Mediterane dan Was.

⁵ Personn pa pou tenir devan ou, tou dilon ou lavi. Mon pou avek ou, parey mon ti avek Moiz. Mon pou touzour avek ou. Mon pa pou abandonn ou.

⁶ Reste for e pran kouraz, akoz ou ki pou fer sa pep pran posesyon sa pei ki mon'n promet pour donn zot zanset.

⁷ Reste for e pran kouraz. Fer sir ou obei tou bann lalwa ki mon serviter Moiz ti ordonn ou. Pa tourn ni adrwat, ni agos, e ou ava reisi partou kot ou ava ale.

⁸ Sa liv lalwa pa pou kit ou labous. Ou ava medit lo li lizour e lannwit, pour ki ou ava azir dapre tou sa ki'n ekri. Konmsa, ou ava prospere e ou ava reisi.

⁹ Pa mon'n ordonn ou: Reste for, pran kouraz. Pa per, pa tranble, akoz SENYER, ou Bondye, i avek ou partou kot ou pou ale.

Zozye I Ordonn Pep Izrael pour Travers Zourden

¹⁰ Alor, Zozye ti donn lord bann sef parmi lepep:

¹¹ Pas partou dan kan e donn lepep sa lord: Prepar zot, akoz dan trwa zour zot pe travers larivyer Zourden, pour pran posesyon sa pei ki SENYER, zot Bondye pe donn zot.

¹² Zozye ti dir avek bann Ribenit, Gadit ek demi tribi Manase,

¹³ “Rapel sa ki Moiz, serviter SENYER, ti dir zot ler i ti deklare: SENYER, zot Bondye i donn zot en landrwa repo; i donn zot sa pei.

¹⁴ Zot bann fanm, zot bann zanfan, e zot troupo ava reste dan sa pei ki Moiz in donn zot lot kote larivyer Zourden. Me tou zot vayan gerye ava travers larivyer avek zot zarm devan zot bann frer ki zot ava ede,

¹⁵ ziska ki SENYER in donn zot osi repo, e ki zot osi, zot ava'n pran posesyon sa pei ki SENYER in donn zot. Apre, zot ava retournen e pran posesyon pei sitye dan Les larivyer Zourden e ki Moiz, serviter SENYER, ti donn zot.”

¹⁶ Zot ti reponn Zozye, “Nou pou fer tou sa ki ou'n ordonn nou; e kot ou anvoy nou, nou pou ale.

¹⁷ Nou pou obei ou parey nou'n obei Moiz. SENYER, ou Bondye ava avek ou parey i ti avek Moiz!

¹⁸ Sa ki revolte e ki dezobei ou lord e pa obei tou ou parol, pou ganny touye. Reste for e pran kouraz.”