Deterononm 2 - Labib An Kreol Seselwa

Bann Lannen dan Dezer

¹ Apre, nou ti fer demi tour e retourn ver dezer, dan direksyon lanmer Rouz parey SENYER ti'n ordonn mwan. Nou ti kontourn rezyon montanny Seir pandan plizyer zour.

² SENYER ti dir mwan:

³ Zot in ase tourn an ron dan sa rezyon montanny. Pran direksyon Nor.

⁴ Donn lepep sa lord: Zot pou pas pre avek teritwar desandan zot frer Ezai ki reste Seir. Sa bann zans pou per zot. Alor, fer byen atansyon.

⁵ Pa provok zot, akoz mon pa pou donn zot nanryen dan sa pei, pa menm en landrwa pour poz lipye. Annefe, mon'n donn Ezai montanny Seir pour posesyon.

⁶ Zot ava aste sa ki zot ava manze, menm delo ki zot ava bwar.

⁷ SENYER, ou Bondye in beni ou dan tou sa ki ou'n antreprann. In vey lo ou semen dan sa gran dezer. Pandan 40 an, SENYER, ou Bondye ti avek ou; ou pa'n mank nanryen.

⁸ Alor, nou ti evit nou bann fanmir pros, bann desandan Ezai ki viv dan montanny Seir; nou ti evite pas par semen Araba ki sorti Eilat ek Esyonn-Geber. Nou ti sanz direksyon e retourn par dezer Moab.

⁹ SENYER ti dir mwan: Pa atak Moab, ni provok en lager kont zot, akoz mon'n donn Moab, desandan Lot, posesyon Ar. Mon pa pou donn zot okenn later dan sa pei.

¹⁰ Oparavan, bann Emit, en gran pep nonbre, osi gran ki bann Anakit, ki ti reste la.

¹¹ Zot osi, zot ti ganny konsidere koman bann Refait, me bann Moabit ti apel zot Emit, parey bann Anakit.

¹² An plis, otrefwa, bann Horit ti reste Seir. Bann desandan Ezai ti pran zot pei, detri zot e etabli zot dan zot plas, parey Izrael ti'n fer dan pei ki SENYER ti'n donn zot an posesyon.

¹³ SENYER ti donn nou sa lord: Aprezan, travers larivyer Zered. Alor, nou ti travers larivyer Zered.

¹⁴ Ti pran nou 38 an pour vwayaz depi Kades Barnea, ziska nou ti travers larivyer Zered. Dan sa letan, tou zenerasyon bann gerye ti'n mor, parey SENYER ti'n predir.

¹⁵ Annefe, lanmen SENYER ti kont zot, pour li sas zot dan kan, ziska ki zot tou zot ti disparet.

¹⁶ Zis apre ki tou bann gerye parmi lepep, ti'n mor,

¹⁷ SENYER ti koz avek mwan:

¹⁸ Ozordi, ou ava travers frontyer Moab dan pei Ar.

¹⁹ Kan zot ava apros frontyer bann Amonit, pa atak zot, pa provok en lager kont zot. Mon pa pou donn zot pei bann Amonit, akoz mon'n donn sa pei bann desandan Lot.

²⁰ Sa rezyon i osi konsidere koman pei bann Refaim ki ti reste la oparavan, me sa bann Amonit ti apel zot bann Zanmzoumit.

²¹ Zot ti en gran pep nonbre, osi gran ki bann zean. Me ler bann Amonit ti arive, SENYER ti detri zot e bann Amonit ti pran sa pei kot zot ti etabli zot.

²² SENYER ti fer parey pour bann desandan Ezai ki ti reste Seir: I ti detri bann Horit devan zot. Konmsa, zot ti kapab pran pei bann Horit e etabli zot dan zot plas, ziska ozordi.

²³ Bann Avit ki ti'n viv dan bann kanpman pre avek Gaza, ti ganny detri par bann Kaftorit, ki ti sorti Kaftor, e etabli zot dan zot plas.

²⁴ Apre, SENYER ti donn mwan sa lord: Kontiny zot vwayaz e travers larivyer Arnon. La, mon'n donn ou Sihonn, lerwa Amorit ki sorti Hesbonn, avek son pei antye. Atak li e konmans pran posesyon son pei.

²⁵ Apartir ozordi, mon pou fer tou bann pep lo later, per ou. Ler zot ava antann koz lo ou, zot ava tranble avek lafreyer akoz ou.

Defet Lerwa Sihonn par Izrael

²⁶ Dan dezer Kedemot, mon ti anvoy kot Sihonn, lerwa Hesbonn, bann mesaze avek bann parol lape:

²⁷ Les mwan travers ou pei; mon pou reste lo semen. Mon pa pou al ni adrwat, ni agos.

²⁸ Mon pou pey ou tou nouritir ki mon pou manze, e delo ki mon pou bwar. Zis permet mwan travers ou pei apye.

²⁹ Annefe, bann desandan Ezai ki viv dan rezyon Seir e bann Moabit ki viv dan pei Ar, in les nou travers zot pei. Apre, nou ava travers larivyer Zourden e ariv dan pei ki SENYER, nou Bondye pe al donn nou.

³⁰ Me Sihonn, lerwa Hesbonn, pa ti les nou travers son pei. Annefe, SENYER, zot Bondye ti fer zot vin antete e andirsi son leker pour li livre zot anba ou pouvwar parey i ete ziska ozordi.

³¹ SENYER ti dir mwan: La mon donn ou Sihonn ek son pei. Deza, ou kapab konmans pran posesyon son pei.

³² Alor, ler Sihonn ti sorti pour lager kont nou dan Yasa, avek tou son pep,

³³ SENYER, nou Bondye ti livre li dan nou lanmen. Nou ti bat li avek tou son bann zanfan ek tou son pep.

³⁴ Nou ti pran tou son bann lavil e dan sak lavil, nou ti detri zonm, fanm ek zanfan. Nou pa ti les en sel sirvivan.

³⁵ Nou ti gard zis troupo bef, mouton ek kabri koman piyaz lager avek tou sa ki nou ti kaptire dan bann lavil.

³⁶ Depi Aroer ki lo bor larivyer Arnon, ansanm avek sa lavil ki lo sa larivyer li menm, ziska Galaad, pa ti annan okenn sitadel tro o pour nou. SENYER, nou Bondye ti donn nou tou.

³⁷ Sepandan, nou pa ti apros pei bann Amonit, setadir rezyon sitye obor larivyer Yabok ek bann lavil ki dan montanny ki SENYER, nou Bondye ti'n defann nou fer sa.