Zakari 1 - Labib An Kreol Seselwa

Senyer I Demann Lepep Retourn ver Li

¹ Wityenm mwan, dan dezyenm lannen ki Dariis ti lerwa Lapers, SENYER ti koz avek profet Zakari, garson Berekya, garson Ido:

² SENYER ti ankoler bokou kont ou bann zanset.

³ Alor, dir zot: La sa ki SENYER liniver i deklare: Retourn kot mwan, SENYER liniver i deklare, e mon ava retourn kot ou, SENYER liniver i deklare.

⁴ Pa fer parey zot bann zanset avek ki bann ansyen profet ti anonse: La sa ki SENYER liniver i deklare: Retournen! Kit zot bann move semen ek zot bann move mannyer fer! Me, zot pa ti ekout mwan; zot pa ti pret atansyon, SENYER liniver i deklare.

⁵ Oli zot bann zanset? Eski sa bann profet zot touzour vivan?

⁶ Sepandan mon bann parol, mon bann desizyon ki mon ti'n donn mon bann serviter, bann profet, pa i'n ariv ziska kot zot bann zanset? Alor, zot ti repanti e zot ti dir: SENYER liniver in deside tret nou dapre nou mannyer viv e nou mannyer fer.

Premye Vizyon: Bann Kavalye

⁷ Vennkatriyenm zour dan onzyenm mwan, ki mwan Sebat, dan dezyenm lannen ki Dariis ti Lerwa, SENYER ti koz avek profet Zakari, garson Berekya, garson profet Ido:

⁸ Dan lannwit, mon ti war en zonm pe mont lo en seval rouz! I ti'n arete dan en vale parmi bann pye dibwa. Deryer li, ti annan bann seval kouler rouz, bren e blan.

⁹ Mon ti demann li, “Mon senyer, ki sa bann seval i reprezante?” Lanz ki ti pe koz avek mwan, ti dir mwan, “Mon pou eksplik ou sa ki zot reprezante.”

¹⁰ Alor, sa zonm ki ti pe debout parmi bann pye dibwa ti reponn, “SENYER in anvoy sa bann seval pour al eksplor later.”

¹¹ Bann kavalye ti dir avek lanz SENYER ki ti pe debout parmi bann pye dibwa, “Nou'n eksplor later; nou'n konstate ki partou lo later i trankil e anpe.”

¹² Alor, lanz ti dir, “SENYER liniver! Ankor konbyen letan eski ou pa pou pran pitye pour Zerizalenm ek bann lavil dan Zida kont ki ou ankoler depi deza 70 an?”

¹³ Apre, SENYER ti reponn lanz ki ti pe koz avek mwan, par bann parol konsolasyon ek bann parol lankourazman.

¹⁴ Lanz ki ti pe koz avek mwan ti dir mwan: Proklanm sa mesaz: La sa ki SENYER liniver i deklare: Mon kontan Zerizalenm ek Siyon avek pasyon.

¹⁵ Me mon tre ankoler kont bann nasyon ki krwar zot dan byen: Kan mon pa ti tro ankoler kont zot, zot in ogmant zot maler.

¹⁶ Pour sa rezon, la sa ki SENYER i deklare: Par pitye, mon pou retourn Zerizalenm avek konpasyon; lanmenm la kot mon tanp pou ganny rekonstri. SENYER liniver ki deklare; latres pour mezire ava ganny drese lo Zerizalenm.

¹⁷ Anons ankor sa mesaz: La sa ki SENYER liniver i deklare: Mon bann lavil pou ranpli ankor en fwa avek en kantite larises. Ankor en fwa, SENYER pou rekonfort Siyon e swazir Zerizalenm.

Dezyenm Vizyon: Bann Korn avek bann Forzron

¹⁸ Mon ti ganny en lot vizyon. Mon ti war kat korn.

¹⁹ Mon ti demann sa lanz ki ti'n koz avek mwan, “Ki savedir sa bann korn?” I ti reponn mwan, “Sa bann korn i reprezant bann nasyon pwisan ki ti dispers Zida, Izrael ek Zerizalenm.”

²⁰ Alor, SENYER ti montre mwan kat forzron.

²¹ Mon ti demann li, “Ki zot pe vin fer?” I ti reponn, “Sanmenm sa bann korn ki ti dispers Zida, pour ki personn pa ava kapab reganny son loner. Me sa bann forzron in vin pour fer zot per, pour fer tonbe pwisans sa bann nasyon ki ti lev zot korn kont pei Zida pour dispers son pep.”