Ebre 1 - Labib An Kreol Seselwa

Bondye I Koz par Son Garson

¹ Dan lepase, Bondye in koz avek nou bann zanset dan plizyer diferan mannyer, atraver bann profet.

² Aprezan dan sa dernyen letan, in koz avek nou atraver son Garson. Par li, Bondye in kree liniver e i'n etabli li koman zeritye lo tou keksoz.

³ Sa Garson i reflekte laglwar Bondye. I reprezant egzakteman resanblans Bondye. I soutenir liniver par son parol pwisan. Apre ki i ti'n fini pirifikasyon pese bann et imen, i'n al asiz lo kote drwat Bondye, pwisans siprenm lao dan lesyel.

Grander Garson Bondye

⁴ Annefe, Bondye in etabli son Garson dan en pozisyon pli o ki bann lanz, e i'n donn li en non siperyer ki pour zot.

⁵ Annefe, avek lekel lanz, Bondye in deza dir: Ou mon garson, Ozordi, mon'n vin ou Papa? Zanmen Bondye in dir avek enn son bann lanz: Mon ava vin en Papa pour li, e i ava vin en Garson pour mwan.

⁶ Par kont, kan Bondye ti anvoy son lene Garson dan lemonn, i ti deklare: Tou bann lanz Bondye ava ador li.

⁷ Me lo size bann lanz Bondye i deklare: I'n fer son bann lanz vin bann souf, e son bann serviter, bann laflanm dife.

⁸ Me lo size son Garson i deklare: Bondye! Ou tronn in ganny etabli pour touzour. E ankor: Ou renny, i en renny ranpli avek lazistis.

⁹ Ou kontan lazistis, e ou deteste lemal. Pour sa rezon, Bondye, ou Bondye in konsakre ou avek en delwil lazwa, e i'n fer ou pli gran ki ou bann zanmi avek ou.

¹⁰ I'n osi deklare: Ou menm, Senyer, ki'n kree later o konmansman; lesyel i travay ou lanmen.

¹¹ Tousala pou disparet, me ou, ou pou reste pour touzour. Tou pou ize parey en lenz.

¹² Ou pou roul zot, parey lenz, e parey en lenz, zot pou ganny sanze. Me ou, Senyer, ou touzour parey, e ou lavi pa pou zanmen fini.

¹³ Ankor en fwa, avek lekel lanz, Bondye in deza dir: Asiz la lo mon kote drwat, ziska ki mon abes ou bann lennmi, e fer zot vin ou marspye?

¹⁴ Bann lanz, ki zot ete? Pa zot bann lespri ki servi Bondye, e ki ganny anvoye pour ed tou bann ki pou ganny sove?