2 Pyer 1 - Labib An Kreol Seselwa

Salitasyon

¹ Sa let i sorti kot Simon Pyer, en serviter e zapot Zezi-Kri, pour bann ki'n resevwar en lafwa osi presye ki pour nou, par lazistis nou Bondye e nou Sover Zezi-Kri.

² Mon swete ki zot resevwar lagras ek lape annabondans, par konnesans Bondye ek Zezi, nou Senyer.

Koman En Kretyen I Devre Viv

³ Annefe, dan son pwisans, Bondye in donn nou tou sa ki nou bezwen pour viv en lavi vreman dapre son lavolonte. In fer nou konn sa enn ki'n apel nou pour partisip dan son prop laglwar ek son bann mervey.

⁴ Par sa laglwar ek sa bann mervey, Bondye in donn nou bann gran promes ki presye e enportan. Konmsa, kan zot ava resevwar sa bann promes, zot ava kapab sorti dan sa lemonn pouri avek tou son bann move dezir, e pran par dan son laglwar.

⁵ Alor, fer tou zot zefor pour azout bonn kondwit avek zot lafwa, e avek bonn kondwit, vre konnesans Bondye.

⁶ Azout avek vre konnesans Bondye, disiplin lo zot lekor, avek disiplin lo zot lekor, perseverans, e avek perseverans, fidelite anver Bondye.

⁷ Anfen, azout avek fidelite anver Bondye, lafeksyon fraternel, e avek lafeksyon fraternel, lanmour.

⁸ Se sa bann kalite ki zot devre posede. Si zot posed sa bann kalite annabondans, zot ava aktif e prodiktif dan konnesans nou Senyer Zezi-Kri.

⁹ Sa enn ki pa posed sa bann kalite i koman en aveg; son lizye in fermen. I'n oubliye ki son bann pese otrefwa in ganny pardonnen.

¹⁰ Alor, mon bann frer! Fer en pli gro zefor pour reste atase avek Bondye ki'n apel zot, e ki'n swazir zot. Si zot fer sa, zot pa pou zanmen abandonn zot lafwa.

¹¹ Annefe, konmsa ki zot pou ganny drwa antre libreman dan rwayonm eternel nou Senyer e Sover Zezi-Kri.

¹² Pour sa rezon ki mon pour touzour rapel zot tousala, menm si zot deza konnen e ki zot in byen etabli dan laverite ki zot in resevwar.

¹³ Mon krwar i mon devwar, tan ki mon ankor vivan, rapel zot sa bann keksoz.

¹⁴ Mon konnen ki byento mon pou kit sa lekor, parey nou Senyer Zezi-Kri in fer mwan konnen.

¹⁵ Mon pou fer tou mon posib pour ki menm apre mon lanmor, zot ava touzour rapel tousala.

Bann Temwen Laglwar Kris

¹⁶ Annefe, nou pa'n baz nou lo bann fab konplike pour fer zot konn retour pwisan nou Senyer Zezi-Kri. Nou'n war son grander avek nou prop lizye.

¹⁷ Annefe, i ti resevwar loner ek laglwar sorti kot Bondye, son Papa, kan i ti antann sa lavwa sorti dan laglwar siprenm: Sa i mon Garson byenneme, dan ki mon'n met tou mon lazwa.

¹⁸ Nou menm, nou ti antann sa lavwa sorti dan lesyel kan nou ti avek li lo sa montanny sen.

¹⁹ Ensi, nou osi annan konfyans dan parol solid bann profet. Zot annan rezon port bokou latansyon lo la, akoz i koman en lalimyer ki briye dan fernwanr, ziska ki lizour i fer e zetwal granmaten i leve e briy dan zot leker.

²⁰ Avan tou, zot devre byen konpran ki personn pa kapab donn son prop lenterpretasyon lo okenn profesi dan Lekritir.

²¹ Annefe, napa okenn mesaz profesi ki'n ganny prodwir par lavolonte imen, me se Lespri Sen ki'n pous dimoun pour koz delapar Bondye.