1 Pyer 1 - Labib An Kreol Seselwa

¹ Sa let i sorti kot Pyer, en zapot Zezi-Kri, pour bann pep egzile ki viv koman refizye, e ki'n disperse atraver provens Pon, Galasi, Kapados, Lazi ek Bitini.

² Pour tou bann ki'n ganny swazir e destinen pour ganny sove par Bondye nou Papa, e ki'n vin en pep sen par Lespri pour obei Zezi-Kri, e ganny pirifye par son disan, nou demann lagras ek lape annabondans pour zot.

En Lesperans Vivan

³ Annou loue Bondye e Papa nou Senyer Zezi-Kri! Dan son gran bonte, apre ki i ti resisit Zezi-Kri, i'n fer nou reviv pour en lesperans ki vivan,

⁴ an atandan bann byen ki i'n rezerve pour zot dan lesyel, ki pa kapab ni gate, ni sali, ni fletri.

⁵ Sa bann byen i pour zot, ki, par lafwa, in ganny garde par pwisans Bondye, ziska ki delivrans i arive, pare pour ganny revele dan lafen letan.

⁶ Pour sa rezon ki zot dan lazwa, menm si aprezan, zot pe pas, pandan en pti moman, par toudsort difikilte.

⁷ Tousala i vin lokazyon donn vre valer zot lafwa, ki pli presye ki lor. Parey lor, malgre ki i kapab abimen kan i ganny teste par dife, zot lafwa i devre ganny teste pour montre son valer. Alor, i ava servi pour rann glwar, louanz ek loner Zezi-Kri, kan i pou ganny revele.

⁸ Zot kontan li, menm si zot pa'n zanmen war li. Zot krwar dan li, menm si zot pa ankor war li. Pour sa rezon, zot dan en lazwa si gran ki pa kapab ganny eksprimen par parol.

⁹ Annefe, zot pre pour resevwar zot delivrans ki rekonpans pour zot lafwa.

¹⁰ Lo size sa delivrans, bann profet in fer bann resers ek bann envestigasyon, e zot in profetiz lo don ki Bondye ti pou donn zot.

¹¹ Zot in fer en gro zefor pour dekouver dan ki lepok e dan ki sirkonstans, bann lendikasyon ki Lespri Kris in donnen, ti koresponn. Annefe, sa Lespri ki ti dan zot, ti anons davans, soufrans ki Kris ti devre pas ladan ek laglwar ki devre swiv.

¹² Zot ti ganny revele ki sa mesaz pa ti pour zot menm bann profet, me pour zot. Aprezan, zot in resevwar sa mesaz par bann predikater Bonn Nouvel. Zot in anons sa Bonn Nouvel par pwisans Lespri Sen sorti dan lesyel, ki menm bann lanz ti ava byen kontan konnen.

Viv En Lavi Sen

¹³ Alor, gard zot lespri touzour alert, reste touzour vizilan. Met tou zot lesperans dan lagras ki zot pou resevwar kan Zezi-Kri pou ganny revele.

¹⁴ Fer koman bann zanfan obeisan. Pa les bann dezir ki zot ti annan kan zot ti ankor dan linyorans, kontrol zot.

¹⁵ Parey Bondye ki'n apel zot i sen, zot osi, vin sen dan tou zot kondwit.

¹⁶ Annefe, Lekritir i deklare: Vin sen akoz mwan mon sen.

¹⁷ Kan zot priye, zot apel Bondye koman zot Papa. I pa fer okenn preferans, e i ziz sak dimoun dapre sa ki i'n fer. Alor, pandan sa letan ki reste pour zot lo later, montre ki zot annan respe pour li, par zot mannyer viv.

¹⁸ Annefe, zot konnen par ki pri, zot in ganny sove dan zot mannyer viv initil ki zot in erite avek zot zanset. Sa pa ti fer atraver bann lobze ki perdi valer tel ki larzan oubyen lor,

¹⁹ me par disan presye Kris, ki'n ofer li menm koman en zenn mouton san defo e san okenn tas.

²⁰ I ti'n ganny swazir davans, avan kreasyon lemonn, me i'n ganny prezante pour zot dan sa dernyen letan.

²¹ Par li, zot krwar dan Bondye ki'n resisit li e ki'n donn li laglwar. Konmsa, zot met zot lafwa ek zot lesperans dan Bondye.

Viv Koman bann Zanfan Bondye

²² Zot, zot in ganny pirifye par zot lobeisans anver laverite, pour zot kontan kanmarad senserman koman bann frer. Donk, kontan kanmarad bokou avek en leker pir.

²³ Annefe, zot in ganny en nouvo lavi, pa par en semans ki kapab ganny detri, me par enn ki pa kapab ganny detri: Sa i Parol Bondye. Sa Parol i vivan e eternel.

²⁴ Annefe, parey Lekritir i deklare: Tou dimoun i koman zerb. Tou zot laglwar i koman fler zerb. Zerb i sek e fler i fletri.

²⁵ Me parol Senyer li, i reste pour touzour. Sanmenm sa parol Bonn Nouvel ki'n ganny anonse avek zot.