2 KORḚNTƏ 1 - Bible sar

Pol rāā de gə̄ lápə́ya

¹ I mā Pol ń i ngōmbang kəla yā Jeju *Kərist kə gō kem ndigə yā Nə́ɓāá ní ō, ngōkó̰ó̰sí Timote ō n j-əla kə makətūbə̄ ń toō ní. J-əlań j-adə̄ i Egəlijə yā Nə́ɓā ń i kem ɓē kə́ Korḛntə tə́ ní ō, ngé taā kem gə̄ ń ndin̄ dɔ nang kə́ Akayi tə́ kə taá malang ní ō.

² Ādə̄ Bɔbə̄jí Nə́ɓā nin̄ kə Kɔ́ɔ̄ɓē Jeju Kərist rāān̄ kem majə sesí ō, sɔlə̄n̄ kemsí ō.

Pol ndadə̄ Nə́ɓā

³ Jə-tɔ̄yī Nə́ɓā, Bɔbə̄ Kɔ́ɔ̄ɓē yājí Jeju *Kərist, ni ń i Bɔbə̄jí kə́ kumən o̰o̰n ngá̰ý ō, i Nə́ɓā kə́ nge sɔl̄ kem deē dan yá̰a̰ gə̄ tə́ malang ō ní.

⁴ Ni-sɔl̄ kemjí dan wur kɔl gə̄ tə́ malang, i yā kadə̄ j-asiīneé sɔl̄ kem ngé gə̄ ń ndin̄ dan yá̰á̰ kə́ tōr̄ gə̄ tə́ ní ō. Ba j-a jə-sɔlī kemdə́ i kə kem sɔl̄ ń jḭḭ̄ kɔ́ gə̄ j-ə́ngeī jī Nə́ɓā tə́ ní.

⁵ Tītə̄ ń yá̰á̰ kə́ tōr̄ gə̄ yā Kərist rāān̄jí ngá̰ý ní, i tītə̄ ń toō n jḭḭ̄ j-əngeīneé kem sɔl̄ ngá̰ý kə ta kūl̄ Kərist ō ní.

⁶ Ré jḭḭ j-a̰a̰ tápə̄ anī, i tām̄ yā kadə̄ sḭḭ̄ ə́ngeīneé kem sɔl̄ ō, ájiīneé ō. Ré sɔlə̄n̄ kemjí anī, i yā kadə̄ sḭḭ̄ ə́ngeīneé kem sɔl̄ kə́ kadə̄ rāā sesí tá kadə̄ sḭḭ̄ ásiīneé tə́gā tasí dan yá̰á̰ kə́ tōr̄ gə̄ kə́ tītə̄ yājí tə́ ō.

⁷ Adə̄ j-əndā kemjí dɔsí tə́ kə ngangāá ngá̰ý. Tām̄ jə-ger̄ kadə̄ dan ń yá̰á̰ kə́ tōr̄ gə̄ rāān̄sí sejí ní, ā ə́ngeī kem sɔl̄ sejí ō.

⁸ Tɔdɔ̄ ngákó̰ó̰jí gə̄, jə-gḛy kadə̄ ī-gerī gō yá̰á̰ kə́ tōr̄ gə̄ ń rāān̄jí dɔ nang kə́ Aji tə́ ní: Yá̰á̰ kə́ tōr̄ gə̄ ní ɔȳn̄jí ngá̰ý, kɔȳdə́ tɔȳ tɔ́gə́jí, adə̄ j-əndā kemjí dɔ ndi tə́ kə kumjí to̰ alé.

⁹ Jḭḭ j-ɔjəń na jḭḭ na i de kə́ gāngə̄n̄ sarya yo dɔjí tə́ kɔ̄ɔ́ ɓá. Banī yá̰a̰ gə̄ rāān̄ yá̰a̰ beé i yā kadə̄ jə-ndóoń kəndā kemjí dɔ rɔ̄jí jḭḭ kɔ́ gə̄ tə́ alé, ba i yā kadə̄ j-əndāń kemjí dɔ Nə́ɓā ń i nge ndól̄ de kə́ koy gə̄ ní tə́.

¹⁰ I ni n ɔr̄jí ta yo kə́ tītə̄ ń noō tə́ ō, a ɔr̄jí ɓáý ō ní. A̰á̰ā̰, j-əndā kemjí dɔn tə́ kadə̄ a ajəjí ta yo tə́ ɓáý.

¹¹ Sḭḭ̄ kɔ́ gə̄ ā ī-ndɔ̄yī tām̄ yājí tə́ ō. Adə̄ Nə́ɓā a oō ndɔ̄ȳ yā de kə́ ngá̰ý gə̄ kə́ tām̄ yājí tə́ yā rāań kem majə sejí. Loo ń noō tə́ de gə̄ ngá̰ý a télən̄ yā ndadə̄n tām̄ yājí tə́.

Pol tūr̄ gíŕ yá̰a̰ gə̄ ń ni-ɔjə rāā ní kɔ̄ɔ́

¹² Yá̰á̰ ń ɔjə kɔr ta rɔ̄ yājí ní, i najə̄ ń toō ń kemjí ɔjəjí ní. Kemjí ɔjəjí kadə̄ háĺjí ń jə-ndiń dan de kə́ dɔ nang tə́ gə̄ tə́, ba mandang ɓáa i sesí sḭḭ̄ḭ́ ní, i háĺ kə́ kanjə̄ gól̄ loo ō, kə́ *unjə̄ njáý njáý ō, adə̄ i hál yā Nə́ɓā. I hál kum kedə̄ yā de gēé alé, banī i hál kem majə yā Nə́ɓā.

¹³ Tɔdɔ̄ najə̄ yājí gə̄ ń jə-ndang j-əlań j-adə̄sí ní, i yá̰á̰ kə́ rang gə̄ n jə-ndang tū tə́ ní alé, ba i rɔ̄ yá̰á̰ gə̄ nəkɔ́ ń ī-tə́daī ō, ī-gerī kum ō ní ngóy. Banī m̄-taā kem kadə̄ najə̄ ń j-ɔr̄ sesí ní ā ī-gerī kum kadə̄ unjə̄,

¹⁴ tɔdɔ̄ ī-gerī kum nge ń j-ɔr̄ sesí ní kɔ̄ɔ́ ɓá: Ndɔ̄ yā Kɔ́ɔ̄ɓē yājí Jeju tə́ anī, jḭḭ i yá̰a̰ kɔr ta rɔ̄ yāsí ō, sḭḭ̄ i yá̰a̰ kɔr ta rɔ̄ yājí ō.

¹⁵ Dan ń m̄-taā kem mámák kadə̄ a to i beé ní, ta kəga dɔ m̄-gír̄ i kaw̄ loosí kadə̄ ə́ngeī yá̰á̰ kə́ majə kə́ nge ko̰ jōó.

¹⁶ Gō tə́ anī kadə̄ m-ḭ́ḭ loosí m-āw̄ Masedəwan, tá kə m̄-tél Masedəwan m̄-reē loosí gogə́ ɓáý, yā kadə̄ ī-rāāīneé seḿ kə yá̰a̰ mbā kə́ kadə̄ m-āwń Jude.

¹⁷ Dan ń m̄-gḛy rāā beé ní, m-ɔ́jə i kə̄ ndágá kadə̄ mā i de kə́ m̄-hɔɔ́lɔ̄ ngá̰ý a? Aké yá̰a̰ gə̄ ń m-ɔ́jə rāādə́ ní, i kə gō gír̄ yā deē nduluú, adə̄ a̰á̰ā̰ ō, hó̰ō̰ ō i kemḿ tə́ jōó mbak a?

¹⁸ Nə́ɓā i de kə́ kum tə́ yāḿ, najə̄ ń j-ɔr̄ sesí ní, i a̰á̰ā̰ ō tél i hó̰ō̰ alé.

¹⁹ Tɔdɔ̄ *Kərist Jeju, ngōn̄ Nə́ɓā ń mā ō, Silas ō, Timote ō, j-ɔjəsí najə̄ yān ní, i a̰á̰ā̰ tá tél i hó̰ō̰ alé. Banī ni i a̰á̰ā̰ yā Nə́ɓā,

²⁰ tɔdɔ̄ ni i a̰á̰ā̰ ń ɔjə kadə̄ kənī míndə gə̄ malang yā Nə́ɓā ton̄ rɔ̄kum ní. Adə̄ i kə ta kūl̄ Jeju Kərist n jḭḭ̄ jə-ndigiīń najə̄ j-ədaī na i rɔ̄kum yā kɔsəń gɔn Nə́ɓā ní.

²¹ Banī nge ń mbūsə̄jí kadə̄ jə-ra ngan̄g naā tə́ sesí kem Kərist tə́ ō, ur yibə̄ dɔjí tə́ ɔrə̄ń kam̄jí ō ní i Nə́ɓā.

²² Ni-əndā tə́ré yá̰á̰ kógə̄ḿ rɔ̄jí tə́ yā kɔjəń kadə̄ jḭḭ i deē yān gə̄ ō, adə̄jí *Ndíĺ kə́ Táĺ kemjí tə́ tītə̄ yá̰a̰ kəhɔ gātə̄jí beē, yā kɔjəńjí kadə̄ na n-adə̄jí yá̰á̰ kə́ majə gə̄ ń ni ngɔ̄m̄ tām̄ yājí tə́ ní rɔ̄kum ō.

²³ Kə́ tām̄ yāḿ mā tə́ ɓáa m-úń Nə́ɓā kadə̄ ni i de kə́ kum tə́ yāḿ. Ré m̄-sor̄ i mbée anī ādə̄ ni-tɔ̄lə̄m̄ kɔ̄ɔ́. m̄-lōō gíŕ tél kaw̄ gogə́ Korḛntə tə́ i yā kadə̄ yá̰á̰ kə́ tōr̄ rāāńsí alé.

²⁴ Jə-sāā i ko̰o̰ ɓē dɔ taā kem yāsí tə́ alé, banī jə-rāā kəla i naā tə́ sesí tām̄ yā rɔ̄nel̄ yāsí tə́. Tɔdɔ̄ sḭḭ̄ ī-raī ngan̄g dɔ taā kem tə́.