Aanlyn Bybel

- Advertensies -


2 เทซะโลนิกา 1 - บรูดงหลวง


เปาโล​กับ​มู​ทักทาย​จุม​นาก็​ซี​เบิน​รับ​จดมาย​อะไน

1 มะเฮะ​เปาโล ‍ ซิลาด ‍ กับ​ทิโมที​เดอ ‍ นาก็​เคียน​จดมาย​ซะบับ​ไน​อะปัอะ​ออ์น​อัมไป​นาก็​ปัน​คริดซะจัก​คอง​พะเยซู​คริด​นึง​เมือง​เทซะโลนิกา ‍ เคียน​อะปัอะ​จอ์ะ​อัมไป​นาก็​ปัน​กวย​คอง​พูซาง​พู​นาก็​ปัน​อัมปูอ​คอง​ไฮ ‍ เคียน​อะปัอะ​จอ์ะ​อัมไป​นาก็​ปัน​กวย​คอง​พะเยซู​คริด​พู​ปัน​นีาย​คอง​ไฮ ‍

2 มะเฮะ​แซก​นึง​พูซาง​พู​ปัน​อัมปูอ ‍ อัมปรูอม​ทัง​พะเยซู​คริด​พู​ปัน​นีาย​คอง​ไฮ​อะกี ‍ แซก​ออ์น​อัมไป​เบิน​มิด​ซะงบ ‍ เจอ​ออ์น​อัมไป​ซะอำ​นึง​มิด​ด็าง​ปาย​พูซาง​อะยอ์ะ​อัมไป ‍ ออ์น​บุนคุน​กับ​อัมไป​อับ​อะเลอ ‍


บัด​พะเยซู​ลับ​ตัอะ​พูซาง​ซี​ตัดซิน​กวย ‍ เจอ​ไฮ​พู​เจือ​ซี​เบิน​รับ​เกียด​มะนืย​กับ​อัน

3 แซมอัอย​เอย ‍ มะเฮะ​ซมควน​ซี​คอบคุน​พูซาง​เพือ​อัมไป​อัอด​ตัอ​แปะ ‍ มะเฮะ​ด็าง​ปาย​อัมไป​เจือ​นึง​พูซาง​อับ​เคาะ ๆ ‍ เจอ​ก็​อะยอ์ะ​มู​กู​อับ​อะซอฮ​เลือย ๆ ‍ ด็าง​อังกิ​มะเฮะ​เลิด​คอบคุน​พูซาง​เพือ​อัมไป​อะเลอ ‍

4 ด็าง​ปาย​อัมไป​ปัน​อังกิ​เจอ ‍ มะเฮะ​เลิด​เวา​ญูอง​อัมไป​นึง​คริดซะจัก​คอง​พูซาง​ตัว​ญิ​กู​บอน ‍ อะตัอง​ออ์น​กู​นาะ​ด็าง​ปาย​อัมไป​เจือ​นึง​พูซาง​เค็มแคง​อะเลอ ‍ เจอ​ทึง​แม​ปาย​อัมไป​ซี​ตอง​ตน​เนว​ตุฮ​เนว​นะนุฮ​อับ​ซำ​ลาะ​ก็​ตาม ‍ อัมไป​ก็​นัง​อดทน​อัอด​อังกิ ‍ แบบ​ไน​ออยะ​นาก็​มะเฮะ​ญูอง​อัมไป​ออ์น​พู​กะนอฮ​ด็าง ‍

5-6 ไน​เมือ​อัมไป​ญอม​อดทน​เพือ​พูซาง​ซำ​ไน​เจอ ‍ ตอ​ปัอะ​กวย​กู​นาะ​ก็​ซี​ด็าง​ปาย​อัมไป​ซมควน​ซี​เบิน​เกียด​เบิน​ซะงาราซี​ลึ​อะเลอ ‍ นึง​มือ​นาก็​พูซาง​ซี​ตัอะ​ปกครอง​กวย​กู​นาะ​อะกี ‍ เจอ​พูซาง​ซี​ตัดซิน​เอด​โตด​อะลับ​กับ​กวย​กู​นาะ​นาก็​เกย​ตาะ​ออ์น​อัมไป​ตอง​ตุฮ​ตอง​นะนุฮ​อะไน ‍ พูซาง​ซี​ตัดซิน​กวย​กู​นาะ​ตาม​ตะน็าง ‍ ซมควน​เจอ​นาก็​อัน​ซี​ออ์น​อัมไป​เบิน​เนว​ก็าก ‍ เจอ​ซี​เอด​โตด​กวย​กู​นาะ​นาก็​ตาะ​เนว​ตัอ​ก็าก​กับ​อัมไป​อะกี ‍

7 เจอ​ไน​เมือ​พูซาง​ซี​ตัดซิน​กวย​ตาม​ตะน็าง ‍ พูซาง​เลิด​ซี​จูอย​อัมไป ‍ เจอ​อัน​ก็​ซี​จูอย​มะเฮะ​คือ​กัน ‍ จะนูอ​ไฮ​ตอง​ตน​ตุฮ​ตน​นะนุฮ​วาย ‍ ฮัก​บัด​ตัอะ​มือ​นาก็​พะเยซู​นีาย​คอง​ไฮ​ซี​แซง​ตัอะ​ตี​ซะวัน​อะกี ‍ พูซาง​ปัน​พู​นาก็​ซี​ออ์น​ไฮ​แว็ด​คูอม​ตุฮ​คูอม​นะนุฮ​อะกี​จน​ญิ ‍ มือ​กี​กวย​กู​นาะ​ก็​ซี​โฮม​พะเยซู ‍ พอะ​ปาย​อัน​ซี​แซง​ตัอะ​มะนืย​กับ​จุม​เทวะดา​คอง​อัน​นาก็​เบิน​อำนาด​อับ​อะเลอ ‍ ซี​แซง​ตัอะ​อัมปรูอม​ทัง​อวยฮ​นาก็​บลือ​อะเลอ ‍

8 เพือ​ซี​เอด​โตด​อะลับ​กับ​กวย​นาก็​ตาะ​ออ์น​อัมไป​ตอง​ตุฮ​ตอง​นะนุฮ​อะกี ‍ อะไล​ปัน​กวย​นาก็​ตัอ​ด็าง​กับ​พูซาง ‍ ปัน​กวย​นาก็​ตัอ​ญอม​เจือ​ตัอ​ญอม​ตะมึง​คาวดี​เรือง​คอง​พะเยซู​นีาย​คอง​ไฮ​อะไน ‍

9 โตด​นาก็​พะเยซู​ซี​เอด​นึง​อะไล​ซี​อันตัง​อะเลอ ‍ เจอ​ซี​ตัอ​เบิน​มือ​ซด ‍ อะไล​ซี​ตอง​อัอด​ละตาฮ​กับ​พะเยซู​นีาย​คอง​ไฮ ‍ อัอด​ละตาฮ​กับ​ซะงาราซี​คูอม​ยิงไย​คอง​นาว​ตะลอด​ตัอ​เบิน​มือ​ซด ‍

10 มือ​นาก็​อะไล​ซี​เบิน​โตด​อะไน ‍ ก็​กือ​มือ​นาก็​พะเยซู​ซี​ลับ​ตัอะ​อะกี​ออยะ ‍ เจอ​พะเยซู​ซี​เบิน​รับ​ญด​รับ​เกียด​นึง​กวย​กู​นาะ​นาก็​ปัน​กวย​ซักซิด​คอง​พูซาง ‍ มือ​กี​อัมไป​อัมปรูอม​ทัง​กวย​กู​นาะ​นาก็​เจือ ‍ ซี​งึด​อะเลอ​นึง​ซะงาราซี​คูอม​ยิงไย​คอง​พะเยซู​คริด ‍ อัมไป​ก็​ซี​เบิน​อัอด​มะนืย​มู​ตี​กี​เต ‍ พอะ​ปาย​อัมไป​ก็​เจือ​คูอม​เวา​คอง​พูซาง​นาก็​มะเฮะ​เกย​อะตัอง​กับ​อัมไป​อะไน ‍


เนว​นาก็​เปาโล​กับ​มู​อะทิดทาน​แซก​เพือ​จุม​นาก็​เจือ​นึง​เมือง​เทซะโลนิกา

11 บัด​มะเฮะ​กึด​จอ์ะ​เรือง​ไน ‍ มะเฮะ​ก็​อะทิดทาน​เพือ​อัมไป​อัอด​อังกิ ‍ แซก​ออ์น​พูซาง​จูอย​อัมไป​ออ์น​เบิน​ซีวิด​นาก็​มอะ​นาก็​กือ​กับ​นาก็​พูซาง​อะโร​อัมไป​ออ์น​ตัอะ​ปัน​กวย​คอง​อัน​อะไน ‍ เจอ​แซก​ออ์น​พูซาง​จูอย​อัมไป​นึง​อำนาด​คูอม​ยิงไย​คอง​อัน ‍ เพือ​อัมไป​ซี​ปัน​ตาะ​เนว​จับ​เนว​ออ ‍ กือ​นาก็​อัมไป​เบิน​มิด​อี​ตาะ ‍ แซก​ออ์น​อัน​จูอย​อัมไป​ออ์น​เบิน​ซีวิด​นาก็​มอะ​นาก็​กือ​กับ​นาก็​อัมไป​เจือ​นึง​พูซาง​อะไน ‍

12 ค็าน​ซีวิด​อัมไป​ปัน​แบบ​ไน​เจอ ‍ กวย​กู​นาะ​ก็​ซี​ซันเซิน​ออ์น​เกียด​พะเยซู​คริด​นีาย​คอง​ไฮ ‍ ญูอน​แบบยาง​นึง​ซีวิด​คอง​อัมไป ‍ เจอ​อัมไป​ก็​ซี​เบิน​เกียด​มะนืย​กับ​พะเยซู​คือ​กัน ‍ กู​เนว​นาก็​ไฮ​ซี​เบิน​มะนืย​กับ​พะเยซู​คริด​อะไน ‍ ก็​ปัน​ญูอน​บุนคุน​คูอม​อะยอ์ะ​คอง​พูซาง​กับ​คอง​พะเยซู​คริด​นีาย​คอง​ไฮ​อะกี​ออยะ ‍ แบบ​อังกิ​นาก็​มะเฮะ​อะทิดทาน​เพือ​อัมไป ‍

Volg ons:



Advertensies