यहूदा 1 - बृज भासा

नमस्‍कार

¹ मैं,यहूदा, ईसू मसीह कौ सेबक और याकूब कौ भईया हूं, जि चिठ्‌ठी परमेस्‍वर के बुलाए भयेन कूं, जिनें परमेस्‍वर पिता पिरेम करै और ईसू मसीह के काजै अलग करे गये है, बिनकूं लिख रयौऊं।

² तुम लोगन कूं किरपा, सान्‍ती और पिरेम बहुतायत ते मिलती रैहबै।

झूंठे सिक्छक

³ हे प्यारे भईयाओ, हम जा उद्धार में बराबर के सहभागी हैं। मैं वाके बारे में तुमें लिखबे की कोसिस कर रयौ हतो, पर अब मैंनें जि जरूरी समझौ कै, जा चिठ्‌ठी के द्वारा तुम लोगन ते जि बिनती करूं कै तुम लोग बा भरोसे में बने रैहबे काजै संघर्स करौ, जो सदा काजै परमेस्‍वर के पबित्र लोगन कूं सौंपौ गयौ है।

⁴ चौंकि कछू आदमी तुम लोगन के बीच में चुपचाप घुस आये हैं। इन लोगन की सजा के बारे में भौत समै पैहलेईं पबित्र सास्त्र में लिखौ भयौ है। जे लोग परमेस्‍वर ते दूर हैं और इन्‍नें परमेस्‍वर के अनुग्रह कूं भोग-बिलास कौ एक बहानों बनां डारौ है, और जे हमारे एकमात्र स्‍वामी पिरभू ईसू मसीह कूं नांय मानें।

⁵ इन सब बातन कूं तुम लोग अच्‍छी तरैह ते जानें, फिरऊ मैं तुमें याद दिबाबौ चाहूं कै, पिरभू नें मिस्र देस ते इसरायली लोगन कूं बचायकैं निकार लायौ हतो। पर बाद में जिन्‍नें भरोसौ नांय करौ, बिनकौ नास कर दियौ हतो।

⁶ मैं तुमें जेऊ याद दिब्बा रयौऊ कै, जिन सुरग दूतन नें अपने पद कूं संभालकै नांय रखौ और अपने खुद की रैहबे की जगैह कूं छोड़ दियौ हतो, परमेस्‍वर नें बिनऊंऐं न्याय के दिन के काजै नरक के अंधेरे में, जो सदा काल काजै है बेड़िन में बांधकै रखौ है।

⁷ जाई तरैह ते सदौम और अमोरा और वाके आस पास के नगरन नें बिन सुरग दूतन की तरैह व्‍यभिचार करौ और बे अप्राकृतिक बासनान के दास बन गये हते। बू हमें चेतावनी दैवे काजै कबऊ न बुझबे बारी आग कौ दन्‍ड पा रये हैं।

⁸ ठीक जाई तरैह ते तुम लोगन के बीच में घुस आबे बारे जे लोग अपने सपनेन के पीछै दौड़ते भये, अपने सरीर कूं असुद्ध कर रये हैं। जे पिरभू की सामर्थ कूं तुच्‍छ समझें और महिमावान सुरग दूतन कूं बुरौ भलौ कहमें।

⁹ पर जब पिरधान सुरग दूत मिकाईल सैतान के संग बाद-बिबाद करते भये मूसा की लास के बारे में बहस कर रयौ हतो कै, मूसा की लास किनके जौरें रैहबैगी, तब मिकाईल सुरग दूत नेंऊं बुरौ भलौ कैहकै सैतान पै दोस लगाबे की हिम्मत नांय करी। पर बानें बाते केवल जेई कही कै, “पिरभू तोय फटकारै।”

¹⁰ पर जे लोग बिन बातन की निन्दा करें, जिनें जि समझ नांय। जे बेसमझ जानबर की तरैह ते, जिन बातन कूं सुभाब तेई जानें, बे बिनईं के द्वारा नास है जामें।

¹¹ हाय, बिन लोगन पै, जो कैन के जैसे बुराई के रस्ता पै चल रये हते। जे रुपईयन के काजै बिलाम की नांई भटक गये और कोरह की तरैह बिद्रोह करबे के कारन नास कर दये गये हते।

¹² जे लोग तुमारी दावतन में बिन छुपी भयी चट्टानन की तरैह ते हैं, जो घातक हैं। जे लोग बेधड़क तुमारे संग खामें पीमें, पर बिनें केवल अपनेई स्‍बार्थ की चिन्‍ता रैहबै। जे बिन बादरन की तरैह ते हैं, जो हबा के संग चलै,पर बारिस नांय लामें। जे पतझड़ के ऐसे पेड़न की तरैह हैं जो फल नांय दैमें, जि पेड़ पूरी तरैह ते जो दो बार मर चुके हैं, जिनें जड़ ते उखाड़ दियौ गयौ है।

¹³ जे समुनदर की ऐसी भयानक लहरें जो अपनी बेसरमी कौ झाग उछारैं। जे इतकूं बितकूं भटकते भये ऐसे तारेन की तरैह हैं जिनके काजै अनन्‍त काल तक गैहरौ अंधेरौ ठहरायौ गयौ है।

¹⁴ आदम के बाद सातवीं पीढ़ी के हनोक नेंऊं बिन लोगन के बारे में जि कैहते भये भविस्‍यबानी करी हती कै, “देखौ, पिरभू अपने हजारों हजार पबित्र दूतन के संग आकैं,

¹⁵ सब लोगन कौ न्याय करैगौ। लोगन नें जितने बुरे काम करे हैं, बिनके काजै और जिन्‍नें परमेस्‍वर के बिरोध में बुरे वचन बोले हैं, पिरभू बिन सब बातन के काजै बिनें दोसी ठहराबैगौ।”

¹⁶ जे बे लोग हैं, जो भुनभुनाते रैहमें और दूसरेन में खोट निकारते रैहमें। जे अपनी इच्‍छान के अनुसार चलबे बारे हैं और अपने मौंह ते घमन्‍ड की बात बोलें और अपने लाभ के काजै दूसरेन की खुसामद करें।

कोसिस करते रैहबे काजै चेतावनी

¹⁷ पर हे प्यारे भईयाओ, तुम बिन बातन कूं याद रखौ, जो हमारे पिरभू ईसू मसीह के भेजे भये चेलान नें पैहलेंई कही हतीं।

¹⁸ बिन्‍नें कही हती कै, “अंत समै में ऐसे लोग होंगे, जो परमेस्‍वर के पबित्र लोगन की हसी उड़ाय करिंगे और अपनी बुरी इच्‍छान के पीछै चले करिंगे।”

¹⁹ जे लोग तुम लोगन में फूट डालें। जे अपनी सारीरिक बुरी इच्‍छान के दास हैं, इनमें पबित्र आतमा नांय।

²⁰ पर हे प्यारे भईयाओ, तुम एक दूसरे कूं आतमिक रूप ते अपने अति पबित्र भरोसे में मजबूत करते रेओ और पबित्र आतमा ते पिराथना करते रेओ।

²¹ तुम अपने आप कूं परमेस्‍वर के पिरेम में बनाए रखौ और बा दिना कौ इन्‍तजार करौ जब हमारे पिरभू ईसू मसीह की किरपा हमकूं कबऊ नांय खतम हैबे बारौ जीबन की ओर लै जाबैगी।

²² जिन लोगन कौ भरोसौ मजबूत नांय बिनपै दया करौ।

²³ दूसरे लोगन कूं आग में ते झपटकें निकाल लेओ और बिनपै भय के संग दया करते समै सावधान रेओ पर बिनके कपड़न तक घृना करौ जो पाप पूर्न सरीर के द्वारा कलंकित है गये हैं।

परमेस्‍वर की स्तुति

²⁴ अब परमेस्‍वर जो तुमें पाप में गिरबे ते बचा सकै और अपनी महिमा की भरपूरी के सामने आनन्दित और बिना दोस के खड़ौ कर सकै,

²⁵ और जो हमारे पिरभू ईसू मसीह के द्वारा उद्धार करतै, बाई एकमात्र परमेस्‍वर की महिमा, बैभव, पराक्रम और अधिकार सदा-सदा ते अब तक और युगानुयुग तक बनों रैहबै। ऐसौई हैबै!