1 यूहन्ना 1 - बृज भासावचन जीबन है 1 हम बा वचन के बारे में जो सुरू ते हतो, और जाये हमनें सुनों और जाय अपनी आँखन ते देखौ और ध्यान ते निहारौ है और हातन ते छूऔ है वाके बारे में बात कर रहे हैं, और बू वचन ही जीबन है। 2 बू जीबन पिरगट भयौ और हमनें बाकूँ देखौ और वाकी गबाही देते भये तुमारे सामईं जि घोसना करें, कै कबऊ नांय खतम हैबे बारौ जीबन जो परमेस्वर पिता के संग हतो हम पै पिरगट भयौ है। 3 जो कछू हमनें देखौ और सुनो है बुई तुम लोगन कूं भी बतातैं, जाते तुमऊ हमारे संग, पिता और वाके बेटा ईसू मसीह के जीबन के सहभागी है जाऔ। 4 हम इन बातन्नें तुमें जामारैं लिख रए हैं कै हम सबन की खुसी पूरी है जाय। परमेस्वर उजीतौऐ 5 जो समाचार हमनें ईसू मसीह ते सुनोंए बाय तुमऊऐं सुनामें, और बू जि है कै परमेस्वर उजीतौऐ, और बामें कछू अंधेरौ नांय। 6 अगर हम सब कहें कै हम वाके संग संगती रखतें और अबऊ पाप के अंधेरे में जीबन जीतें, तौ हम झूंठ बोलें और सच्चाई पै नांय चलें। 7 पर हम उजीते में जीबन जीतें, जैसै कै परमेस्वर खुद उजीतौए, तौ हम एक दूसरे के संग संगती करें, और वाके बेटा ईसू कौ खून हमारे सब पापन्ते हमें सुद्ध करै। 8 अगर हम कहमें कै हम में कछू पाप नांय, तौ हम खुदई कूं धोकौ दैमें और हम में सच्चाई नांय। 9 अगर हम परमेस्वर के सामने अपने सब पाप कूं मानलें, तौ बू हमारे पाप कूं मांफ करवे और हमें अधर्म ते सुद्ध करैगौ चौंकि बू भरोसे योग्य और धरमी है। 10 अगर हम कैहतें कै हमनें कछू पाप नांय करौ तौ हम बाय झूठो ठहरातें, और बाको वचन हम में नांय। |
NonCommercial-NoDerivatives 4.0 International (CC BY-NC-ND 4.0)