२ तिमोथि 1 - बोटे1 परमेस्वरको इच्छाभि मइ पावलके परमेस्वरइ खिरिस्ट येसुको मुख्य चेला होखे चुन्हेलो र खिरिस्ट येसुसिन होख्ते मानिसहान्इ पाउलार कन्हुँ नासकेलार जिबनको बाचाको बारेमा कहेके लागि मर्हाइ पठाइक्। 2 मोरो प्यारो छउना जस्ने तिमोथिके इ चिट्ठि लेख्तिहि बाटिन। परमेस्वर बुबा र खिरिस्ट येसु हाम्रो पर्भुभि तोर्हाइ अनुग्रह, दया र सान्ति मिलुस्। बिस्वासमा कमजोर नाहोखे हउसला 3 मोरो बुबा पुर्खाहान्इ सेवा गर्लो जस्ने मइ पनि नाम्रो र नानाम्रो कुरा छुट्याए सक्लार मनइ परमेस्वरके पुज्लार गर्तिन। अनि सधइ पर्थना गर्ते तोर्हाइ सम्झिकनि मइ परमेस्वरके धन्येबाद देतिन। 4 हामि छुट्हेते तइ रउलो सम्झतिन अनि तोर्हाइ जारे ज भेटे इच्छा गर्तिन। फेरि हाम्रो भेट होख्निसिन मइ जारे ज खुसि होख्तिन। 5 मर्हाइ तोरो सत्य बिस्वासको सम्झना आउताइ। जुन बिस्वास तोरो बज्या लोइस र तोरो आमा युनिसमा रहिक्। उ बिस्वास तोरोमा पनि बाटि कहिकनि मर्हाइ बिस्वास बाटि। 6 उसिगर्ते मइ तोर्हाइ याद गराए चाहातिन कि मइ तोरोमा हात धारिदेते परमेस्वरइ तोर्हाइ देलो जुन बरदान बाटि ओख्राइ सदुपयोग गरिधारेस्। 7 क्यारेकनि परमेस्वरइ हाम्राइ डरको आत्मा नाहो तर सक्ति, माया र आफिके अधिनमा धारे सक्लार आत्मा देलाटि। 8 उसिगर्ते तइ हाम्रो पर्भुको बारेमा गवाहि देहे झिनलजाहइ। मइ ओख्रो लागि झ्यालखानामा पर्लो कहि मोरो बारेमा लाज झिनमान। तर परमेस्वरको सक्तिमा नाम्रो खबर सुनालार धन्दामा दुख भोगे तयार होखइ। 9 परमेस्वरइ हाम्राइ उदार गरिक्, र एउटा पबित्र मानिस होखे बोलाइक। इ हामि गर्लो धन्दा अनुसार नाहो, तर ओख्रो आफ्नो इच्छा र अनुग्रहभि हो। सन्सार बने कते पनि पहिलिहि इ अनुग्रह परमेस्वरइ खिरिस्ट येसुभि देलो रहिक्। 10 तर अनुग्रह आब हाम्राइ मुक्ति देलार खिरिस्ट येसु आउलोपाछु परकट होख्लो हो। खिरिस्ट येसुइ मिर्तुके नास गरिकनि नाम्रो खबरभि कन्हुँ नासकेलार जिबन परमेस्वरइ परकट गरिक्। 11 एइ नाम्रो खबर प्रचार गरेके लागि परमेस्वरइ मर्हाइ एउटा प्रचारक, मुख्य चेला र मास्टर होखे छानिक। 12 एइ कारनइ मइ दुख भोग्तिहि बाटिन। तर मइ नालजाइतिन क्यारेकनि मइ कख्रोमा बिस्वास गर्लाटिन, मर्हाइ थाहा बाटि। परमेस्वरइ ज्या मर्हाइ सुम्पलाटि, उ कुरा नासकुनज्यालसम्म ओइ ज बचाइकनि धार्ताइ कहिकनि मइ ढुक्क बाटिन। 13 तइ खिरिस्ट येसुमा गर्लो बिस्वास र मायाको बारेमा मइभि सुन्लो सत्य कुराहान्मा मानिसहान्को लागि नमुना बन्हइ। 14 तोर्हाइ जिम्मा देलो सत्य कुराके हामिमा बास गर्लार पबित्र आत्माको सहयोगभि बचाइकनि धार। 15 तोर्हाइ थाहे बाटि नि, एसिया इलाकामा बिस्लार सभइ जनाइ मर्हाइ छाडिकनि गेहाइ। उनहानमध्येमा फुगेलस र हर्मोगेनस् पनि हो। 16 ओनेसिफरसको घर परिवारमा पर्भुइ दया गरुस्, क्यारेकनि मइ झ्यालखानामा रते नालजाइकनि उ मर्हाइ धेरे पल्ट भेटे आइक र हउसला देतरहिक। 17 झन अझि उ रोम सहरमा आउलोपाछु खोज्ले कि खोज्ले गरिकनि मर्हाइ भेटाइकनि ज छाडिक। 18 पर्भु आफ्नो फेरि आउलार दिनमा पर्भुइ ओनेसिफरसके दया गरुस्। मइ एफिससमा रते ओइ मर्हाइ कत्का धेरे सघाइक कहि तोर्हाइ नाम्रोसिन थाहा बाटि। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.