१ तिमोथि 1 - बोटे1 हाम्राइ मुक्ति देलार परमेस्वर र हामिइ आस गर्लो खिरिस्ट येसुको आग्याअनुसार खिरिस्ट येसुको पेरेरित मइ पावलको तर्फभि इ चिट्ठि बिस्वासमा मोरो छउना जस्ने तिमोथिके लेख्तिहि बाटिन। 2 हाम्रो परमेस्वर बुबा र खिरिस्ट येसुइ तोर्हाइ अनुग्रह, दया र सान्ति देउस्। गलत सिछाको बिरुधमा चेतावनि 3 मइ माकेडोनिया परदेस जितेखेरि तोर्हाइ ज्या कलो रहिन ओइ अनुसार एफिसस सहरमा ज बिसेस् र उथि गलत सिछा सिखालाहार मानिसहान्के ओस्नो नागरे कहि कडा आग्या देहइ। 4 र उनहान्के मानिसइ बनालो काहानि, र कनहुँ नासक्हेलार बुबा पुर्खाको कुरामा दुस्हि बिसे आग्या देहेस्। क्यारेकनि एस्नो कुराइ भनाभन र झगडा मात्रे गराताइ र परमेस्वरमा बिस्वासको जिबन जिउलाहारहान्के केइ पनि फाइदा नागर्ताइ। तर परमेस्वरको धन्दा त बिस्वास गर्लार मानिसहान्इ मात्रे गरे सक्तात्। 5 हाम्रो आग्याको उदेस्य इ हो कि बिस्वासिहान एक आर्काके माया गरे, जुन माया सुद्द हिर्दय, नाम्रो र ननाम्रो छुट्यालार बिचार र सत्य बिस्वासभि आउताइ। 6 कत्हेक जना मानिसहान त इ कुराहान छाडिकनि बेर्थको कुरामा अल्मलेलाटाइ। 7 र उनहान चाहिँ मोसाको धर्म नियमको गुरु होखे खोज्तात् तर उनहान्इ आफिइ बोल्लो कुरा र सत्य हो कहि सिखालो कुरा आफिइ ज नाबुझ्तात्। 8 मोसाको धर्म नियमके नाम्रोसिन मान्लार कुरा ठिक हो कहि हामि सभइके थाहा बाटि। 9-10 मोसाको धर्म नियम नाम्रो मानिसको लागि नाहो, तर धर्म नियम नामान्लार, आग्या पालन नागर्लाहार, परमेस्वरके बिस्वास नागर्लाहार, पापिहान, अपबितर् र दुस्ट, आफ्नो आफ्नो आमा बुबाके मार्लाहार, मानिस मार्लारहान्को लागि, बेभिचारिहान्को लागि, बेटाइ बेटासिन ज बिहा गर्लार, मानिसके बेच्लाहार, फटाहा बोल्लारहान, फटाहा गवाहि देलारहान र सत्य सिछाको बिरुध धन्दा गर्लाहारहान्को लागि हो कलार हाम्राइ पनि थाहा बाटि। 11 हामिइ सिखालो सत्य सिछा चाहिँ आसिस देलार परमेस्वरको महिमित नाम्रो खबरमा पाहेताइ। अनि परमेस्वरइ बिस्वास गरिकनि इ नाम्रो खबर प्रचार गरेके लागि मर्हाइ जिम्मा देलाटि। परमेस्वरइ गर्लो दयाको लागि धन्येबाद 12 मर्हाइ सक्ति देलार खिरिस्ट येसु हाम्रो पर्भुके धन्येबाद देतिन, क्यारेकनि ओइ मर्हाइ ओख्रो सेवा गरेके लागि बलियो बनाइक र मर्हाइ बिस्वासिलो ठानिकनि ओख्रो सेवाको धन्दामा छानिक। 13 तर पनि मइ त येसुके बिस्वास गरेकते पहिलि पर्भुको कुरा काट्तरहिन, ओख्रो मानिसहान्के सतातरिहिन र ओख्रो बदनाम गर्तरहिन, तर मइ इ अन्जानमा र अबिस्वासि रते गर्लो कारनइ पर्भुइ मर्हाइ दया गरिक्। 14 खिरिस्ट येसुमा होख्लो बिस्वास र माया ओइ ज मर्हाइ दिहिक् र मोरो लागि हाम्रो पर्भुको अनुग्रह प्रस्सत मात्रामा खन्याइदिहिक। 15 खिरिस्ट येसु पापिहान्के बचाए सन्सारमा आइक। इ बोलि सत्य र सुइकार गरे लाएकको बाटि। अनि पापिहानमा सभइ कते बड्को पापि मइ हो। 16 तर खिरिस्ट येसुमा बिस्वास गरिकनि कन्हुँ नासक्हेलार जिबन पाउलारहान्के कत्का धेरे सहिकनि पर्खे सक्ताइ कलार कुरा देखाएके लागि मइ अरु कते धेरे पापि मानिस होख्लोइ खिरिस्ट येसुइ मर्हाइ दया देखालाटि। 17 जुगे जुगको राजा कन्हुँ नामर्लाहार र देखे नासक्हेलार एउटा मात्रे परमेस्वरके आदर र महिमा सधइभरि होखुस्। आमेन। 18 मोरो छउना जस्ने तिमोथि, तोरो बारेमा पहिलिहि मानिसहान्इ परमेस्वरभि बोल्हेलो कुराहान्को कारनइ हउसला पाइकनि पर्भुको नाम्रो खबरको लागि मन लगाइकनि धन्दा गर कहिकनि मइ तोर्हाइ आग्या देतिन। 19 तइ आफ्नो बिस्वासमा इस्थिर रहेस्, नाम्रो र ननाम्रो छुट्यालार बिचारके बचाइकनि धारेस्। क्यारेकनि कुन्हुँ कुन्हुँ मानिसइ नाम्रो र ननाम्रो छुट्यालार बिचार अनुसार नाचल्लो कारनइ आफ्नो बिस्वास नस्ट गर्लाटाइ। 20 ओइमध्येमा हुमेनियस र अलेक्जेन्डर हो। परमेस्वरको कुरा काटे छाडुस कहिकनि मइ उनहान्के बिस्वासिहान्भि छुट्याइकनि सइतानको हातमा सुम्पिदेलाटिन। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.