Mammaasa 1 - KITAABA WAAQA

Dansuma mammaasa

¹ Kunini mammaasa Solomoni, ilma Daudi, ka hayyu Israeli.

² Mammaasi kunini qaroomafi gorsa dansa namaa kenna, ka hubacha guddole namaa daru.

³ Mammaasi kunini adaba dansa namaa kenne nama d'ugaa qajeela, ka nama gargari infille, nama tolcha.

⁴ Inni nama woma imbeenne woi barsiise, kaimale beekhaafi qalbi dansa kennafi.

⁵ Mammaasi kunini nama wobeekhule beekha dare, nama wobaratele qajeelcha,

⁶ aka akanaani worri dubbi mammaasa hubate, gaafi worri qarooni gaafatule qajeelche deebisu.

Aka kaima gorsani

⁷ Nami qalbi horachu fed'u, qaraa fiit'e AABBO Waaqa sodaachu male. Daalleeni qarooma tufate woi barachu diddi.

⁸ Ilma kiyya, dubbi haatetiifi abbeeti d'agayi.

⁹ Barsiisani worraa adaba si mid'aasiti, akuma sureefi imuuni dansaani nafa si mid'aasitu.

¹⁰ Ilma kiyya, yo worri ch'ubbuu ch'ubbu keesa si buusu fed'e, ee jette gula indeemini.

¹¹ Hegeri nami d'ufe dubbi akana tanafa siini jed'a: Kooti, nama ijeemnu barbaanna! Nama woma iyyakini fayyuma tana haana!

¹² Worri kunini yo nu garre nagayafi fayya qaba ammo yo nu huji worra hobaamne, reefuma boolati guurani?

¹³ Nu waan worra heddu saamne, mana, keennatini galanna!

¹⁴ Kooti, woliini nu yaasi, waan saamne suni gargari qoodanna! Yo dubbi akana tana sini jed'ani.

¹⁵ Ilma kiyya, worra akasi suni gula indeemini, iraa fagaad'i.

¹⁶ Worra suni harki worra waan hamtu inhanqatu, guddo ijeechaa arifata.

¹⁷ Nami ka teete simpirreeni isa ilaaltu t'urura kaufi himmalle;

¹⁸ nami waan akasi tahu sunini ufuma t'urura ufi kaye ufi ijeesa.

¹⁹ Karaani nama irreeni woi saamu sunuma, karuma suniti lubbu worraa balleesa.

Aka qaroomi nama yaamu

²⁰ Ch'aqasi! Qaroomi gabayaafi kara dira keesaleti nama yaamu jira.

²¹ Inni fullo diratifi fulla nami iti wolwoldau ch'ufati lalabe nama yaamu jira:

²² Isani daalleeni, haga yoomi daalluma keesa tau feetani? Isani haga yoomi beekha tufachu lakiftani? Isani haga jirtani woma imbaratani?

²³ Gorsa kiyya ch'aqasa; anini dubbi dansaani isani gorse beekha kiyyale isanii qooda.

²⁴ Anini, koota jed'e isani yaame ufi jibbaad'e, ammo isani na inch'aqamne, yokhaani naa jalaa inqamne.

²⁵ Isani gorsa kiyya ch'ufa diddani, yo anini isani qajeelchule na jibbitani.

²⁶ Tanaafi yo gaargali isani qabatu anini isani kobla. Anini yo badiini isaniti d'uftu isani goyeesa.

²⁷ Hojja badiini sunini aka bubbe isani fuute aka hobombolati isani d'oofte, isani laalefatani d'ukubsatani.

²⁸ Duuba isani qarooma yaamtani, ammo anini isani jalaa inowaad'u. Isani fulla ch'ufa na barbaadani ammo na ingartani.

²⁹ Isani beekha jibbitani, guyya ch'ufa AABBO Waaqa sodaachu diddani.

³⁰ Isani takaa gorsa kiyya infud'anne, yokhaani hojja anini isani qajeelchele odu inkaamne.

³¹ Tanaafi amma woma isanii male argatani, hujuma teesaniti d'iba isanitini d'ufa.

³² Nami woma imbeenne waan qarooma didufi dua. Daweeni daguma keesa hobaati.

³³ Ammo nami na d'agayu nagaya argata. Inni soda male nagayaani taa.