Yuda 1 - Bwok-basa Dagwi wuna-na-sira roso tanga pas

¹ Bwok-rwang gwomo yi e vwɔ hom Yuda, sam Yɛsu Kristi na gwà Yakɔp arɔng, Vɔk na yin de Dagwi a ga yila hin, yin de yɛ Da mot a tɛ̀ yey na yin, ko Yɛsu Kristi a sé gyep in arɔng:

² Tik na Dagwi a tosho reyɔm min sizɔng, na a tɛ̀ yey min ye dyɛng naka, na a to sila hin na tɛ̂ yey mɛ arɔng.

Bemât basa vê bɔs

³ À besâ yey hom, ma kana ye ngyɛ́k tyɔng wɛt na me jɛk a yin e ra neken de Dagwi a nɔng ot nɛ mwa hot. Ko ma di, a sé gbing-gbing na me jɛk a yin, na me shonong e ra yin wɔgɔ: Tumal hin gak, na yin a gyep pyɛ́ de yin a sey tsak o na yɛ̄, yēmo de Dagwi a nɔ̂ng bemat mɛ zang hining zɔng, ko he pere vey yaga mwa jeng.

⁴ Yaga bemat behak de ba tɔk Dagwi wɛt ba ga yel e ji min yaang. Yɛn a sé doyo há e ra nerat de Dagwi a dura a wot, yaga na yɛn a bin sɛ̀ gwông ragâs gwōt. Yɛn a to sé kyɛ́ ɛn Yɛsu Kristi, yɛ nju mɛ de a sé Dalɔ mot na Darwey mot. Yimo raane, bà kana jɛk e Bwok-basa Dagwi e ra gwong de Dagwi a rɔda ba gang bemat yerê vane na shɔt.

⁵ Mwa ano de yin á kana tɔk pyɛ́ yemo ngan o, ko me simo na me to bare a yin yɛ̄ wɔgɔ: Darwey à pat BeIsrayɛl hyɔl yi e sevwêl Misra, ko e bama mo, à wey na vemo de bà sey tsak o wɛt.

⁶ Bàre hin na betom-lagwi arɔng; yɛn à gyeng neyɛnɛ̂ reto de bà kana nɔng ɛn wɛt, ko yɛn à hàla kwɔ̂n sangal mɛn. Yaga ano, bà jut ɛn na be wɔ̀ tik ɛn e kwɔn de ha sé mwangalang sedesi e rɔ́gɔs na ngyang nesheneshey, sɛ̌ ba wul gbɔng jeng de Dagwi a rɔda ba ra a jey shɔt.

⁷ Bàre hin na Sɔdɔm na Gɔmɔra, na bwang bapomo de bà sè bagat. E yerê gwong gwane mo de bemât bapomo mo yɛn à ragas nejwang tanga pyɛ́ vyes de bemat ba tɔ́k ɛn na râ yɛ̄ wɛt. Yɛn vane mo ba sé sɔ reyɔm yaga neves mɛn e kya sana yɛnɛ mo, yaga na be sè pyɛ tabak na bwang bemât mwa.

⁸ A sé ano arɔng na bemat de ba ga yel e ji min: Yɛn e bɛrɛng pyɛ́ e ji negwi, ko pyɛ́ mo ye tɛ̀sɛ hɛn na yɛn a ragas banɛn na babek mɛn. Yɛn e byɛs retô bemât nuyel, ko yɛn e to ha há ves e ra betom-lagwi de ba vɔk gbɔng nerat.

⁹ Yɛ Mikayɛl de a sé gbɔng o e ji betom-lagwi à ka ra negwɔn yerê nane wɛt. Jeng de yɛ à sè ra cuna na gwɔ̀m cēng e rà revîn Mose, à ka simo na a gang gwɔ̀m cēng o na shɔt, na a ha há ves e ra yɛ wɛt, ko a ye, “Tik na Darwey a gyong o!”

¹⁰ Ko bemat o be ha há ves e ra kayɛ pyɛ de yɛn a tɔk yɛ wɛt. A sé e pyɛ́ de babek mɛn be simo de yɛn a tɔk yɛ̄ sana báre sede ngyāma. Ko pyɛ́ ma yemo de ye wey na yɛn.

¹¹ Yaa kukuuk! Yɛn á sè raa gwong de Kayin à raa. Yɛn á to tɛ̀ bato mɛn e ji buru yerê hê Balaam yaga simô dyām. Ko yɛn á vey na sogô nehywɛ sede Kɔra, ko bá wey na yɛn arɔng sede bà wey na yɛ.

¹² Negwɔn mɛn na sé pyɛ byɛs jeng de yɛn e wuna hɛn na yin e de rê pyɛ́ na bemín, yɛn e tɛ̀ a yin rekyen, ko yɛn e bare na bato mɛn zɔng. Yɛn a sé sede bale de gul gwo gangas vɛ, ko rwak wo tɔk rop wɛt. Ba to sé sede batîn cɔ́gɔt de be mara wɛt, mwa ano de jeng marâ vɛ à yane; yɛn a sé sede batîn cɔ́gɔt de ba ga lùyu vɛ mwa yi e berinis o, ko ba ga to kushu hywiri.

¹³ Yɛn a sé sede bagung nshi de gwogul gwo gangas na yol; ko tomong ves mɛn de be ra sana rekyen ba sé sede fulu de be paa. Yɛn a sé sede netangacɛn de ne halsa begwong mɛn, ko ba ga yong a yɛn kwɔn e dem de ha sé mwangalang vit a yere mo, na yɛn a bin sangal ɛ̀ nesheneshey.

¹⁴ Yimo raane, Enok de à sè wo netaama e yere mɛn yi na Adam à kana ha sede zarap Dagwi e ra bemat o, ko à ye, “Di in, Darwey a rɔda ba vey na betom mɛ vê jɛrɛ gu sana basa,

¹⁵ na a ra shɔt e ra bemât mwa. A rɔda ba gang mwa vemo de be raa Dagwi wɛt na shɔt yaga tomong mɛn de ba sé ve Dagwi wɛt, ko yaga mwa neha neves de bemât banɛn o ba ha e ra yɛ.”

¹⁶ Bemat vane mo de ba sé e ji min yɛn e sǎ e de neha gwɔrɔng, ko yɛn e gangas a bemat behak buru e ra pyɛ́ de ye té na yɛn. Yɛn e raa cwey pyɛ́ vyes de babek mɛn be simo, yɛn e dak ragey e ra bato mɛn, ko yɛn e vos bemat na rwâk-nu, yaga na yɛn a bin sɛ̀ pyɛ de yɛn e simo.

Tabak tanga vô redu

¹⁷ À yin besâ yey hom, bàre hin na pyɛ́ de betom Darwey mot Yɛsu Kristi bá kana ha a yin.

¹⁸ Yɛn á yang in, “E jeng ye yɛnɛ mo, bemat behak ba rɔda ba vey, ko yɛn e ba shɛgɛsh hin. Yɛn a rɔda ba raa cwey pyɛ̂ jey, yaga yɛn e raa Dagwi wɛt.”

¹⁹ E yɛn vɛ de be vɛ̀sɛ na gas e ji bemat; be tɛ̀ neyey mɛn e ra raà pyɛ̂ jey zɔng, ko yɛn a to vɔk Gabik Dagwi e ji mɛn wɛt.

²⁰ Ko yin à, à besâ yey hom, ré in nuyel e de ras e ra retîs pyɛ́ de yin a sey tsak o na yɛ̄, yēmo de ya dal mwa na nejɛrɛ. Rá in won na retô Gabik Jɛrɛ.

²¹ Ko gyéng in bato min bagat na Dagwi de a tɛ̀ yey mɛ na yin. Rá in ano e jeng de yin a sé gyeng na Darwey mot Yɛsu Kristi a ba nɔng in neken gbak-gbak, yaga a tosho reyɔm min.

²² Wok in nemwishish vemo de be dasap na pyɛ́ yemo.

²³ Tá in behak yi e kya, na yin a sey neken mɛn. Wok in nemwishish behak, ko rá in ano na bengyip arɔng; ko yin ka ra berugu mɛn wɛt, vemo de ba ga tɛ́ ɛn gbiridik yi na ragâs pyɛ̂ banɛn de yɛn a vɔk cwey yɛ̄.

Somô Dagwi

²⁴ Tik na wot a somo Dagwi, de a vɔk reto na a gyep in sana gaba yi e gwong mɛ. E yɛ de a vɔk reto na a tɛ̀ in sana vɔk pyɛ cak vyes, na yin a to vɔk yey pyɛng sizɔng, ko a rɔda vey na yin e nuyel mɛ, na yin a di gbɔng nerat mɛ.

²⁵ Yɛ nju mɛ a sé Dagwi, Mwât Sey ot yi na Yɛsu Kristi, Darwey mot. Tik na a vɔk gbɔng nerat, na gbɔng nerey, na segwɔm, na reto yi e mwa jeng de ya ga kwey vey e yemo tanga neshey gbak-gbak! Ano.