Matayus 1 - Bwok-basa Dagwi wuna-na-sira roso tanga pas

Bedabedâ Yɛsu

¹ Vemo ba sé bazâ bedabedâ Yɛsu Kristi, yɛ de à sè yerê Davit, womo de à sè yerê Abraham arɔng:

² Abraham à sè dâ Yishak, Yishak à sè dâ Yakɔp, Yakɔp à sè dâ Yuda na begwa mɛ,

³ Yuda à sè dâ Pɛrɛs tanga Zɛrak, ko neng mɛn, à Tamar. Pɛrɛs à sè dâ Hesron, Hesron à sè dâ Ram,

⁴ Ram à sè dâ Aminadap, Aminadap à sè dâ Nashon, Nashon à sè dâ Salmon,

⁵ Salmon à sè dâ Bowas, ko neng mɛ, à Rahap. Bowas à sè dâ Obet, ko neng mɛ, à Rut. Obet à sè dâ Yɛsɛ,

⁶ ko Yɛsɛ à sè dâ Gbɔng Gwɔ̀m Davit. Davit à sè dâ Sɔlɔmɔn, ko neng mɛ à kana sè hwâ Uriya.

⁷ Sɔlɔmɔn à sè dâ Rɛhɔbɔwam, Rɛhɔbɔwam à sè dâ Abiya, Abiya à sè dâ Asa,

⁸ Asa à sè dâ Yɛhɔshafat, Yɛhɔshafat à sè dâ Yoram, Yoram à sè dâ Uziya,

⁹ Uziya à sè dâ Yotam, Yotam à sè dâ Ahas, Ahas à sè dâ Hɛzɛkiya,

¹⁰ Hɛzɛkiya à sè dâ Manase, Manase à sè dâ Amɔn, Amɔn à sè dâ Yoshiya,

¹¹ ko Yoshiya à sè dâ Yɛhɔyakin na begwa mɛ. E jeng yane, bà jut BeIsrayɛl wɔ e ji sesam e Babilɔn.

¹² E bama de bà jut BeIsrayɛl wɔ e ji sesam e Babilɔn, Yɛhɔyakin à sè dâ Sheyaltyel, Sheyaltyel à sè dâ Zɛrubabɛl,

¹³ Zɛrubabɛl à sè dâ Abihut, Abihut à sè dâ Ɛlyakim, Ɛlyakim à sè dâ Azor,

¹⁴ Azor à sè dâ Zadɔk, Zadɔk à sè dâ Akim, Akim à sè dâ Eliyut,

¹⁵ Eliyut à sè dâ Ɛlɛyazar, Ɛlɛyazar à sè dâ Matan, Matan à sè dâ Yakɔp,

¹⁶ ko Yakɔp à sè dâ Yɔsɛf, yɛ rwâs Marya womo de à tɔ Yɛsu de be tang ɛ, à Kristi, yɛ Mwat de Dagwi a kasa na a sey bemat.

¹⁷ Nepyak yére yi e jeng Abraham vɔk e jeng Davit na sé kuru na yɛ nyaas. Yi e jeng Davit vɔk e jeng de bà jut BeIsrayɛl wɔ e ji sesam e Babilɔn, nepyak o na sé kuru na yɛ nyaas. Ko yi e jeng de bà jut BeIsrayɛl wɔ e Babilɔn vɔk e jeng tɔ̂ Kristi, nepyak yére mo na sé kuru na yɛ nyaas arɔng.

Tɔ̂ Yɛsu Kristi

¹⁸ Bá tɔ Yɛsu Kristi e gwong gwomo ngan: Neng mɛ Marya á sè hwong de Yɔsɛf a hwono hɛ. Ko gyam na a jut ɛ, ba sɛ̀, a vɔk jim yi na Gabik Jɛrɛ.

¹⁹ Yɔsɛf, mwat de ê ra weneng mɛ mo, á sè mwat rwat, ko a simo na a tɛ̀ a Marya rekyen e nuyêl bemat wɛt. Yaga ano, a yong ɛ̀ na a hàla hɛ yaang.

²⁰ Sede yɛ á sè bare pyɛ yemo, tom-lagwi hwak de Darwey a tomo hɛ a dura a yɛ tó mɛ e ji negwi, ko a yang ɛ, “À Yɔsɛf, hwêy Davit, hwo vo bengyip na hwo jut Marya vɔk e lɔ mō na a sè hwā mō wɛt, yaga jim mɛ mo ya sé yi na Gabik Jɛrɛ.

²¹ A rɔda tɔ hwey wen, ko hwà rɔda vo a hɛ rezâ Yɛsu, yaga a rɔda sey bemat mɛ yi e banɛn mɛn.”

²² Mwa pyɛ́ yemo ya té, yaga na be sila mɛ̀ há de Darwey à kana ha yi na zarap Dagwi wɔgɔ,

²³ “Hwong de a tɔk rwas wɛt a rɔda vɔk jim, a rɔda tɔ hwey wen, ko ba rɔda tâng hɛ, à Imanuwɛl.” Cap-hâ reza mo, yɛ à Dagwi a sé tanga wot.

²⁴ Jeng de Yɔsɛf a sene yi e de nevwa, a ra pyɛ de tom-lagwî Darwey o a nɔng ɛ nu na a ra, ko a jut Marya na a sè hwā mɛ.

²⁵ Ko a man na yɛ wɛt sɛ̌ jeng de a tɔ hwey o. Ko a vo a hɛ rezâ Yɛsu.