Luka 1 - Bwok-basa Dagwi wuna-na-sira roso tanga pas

¹ Bemat pyak bá kana ye ngyɛ́k na be jɛk pyɛ́ yane de yá kana té e tē mot.

² Bá kana jɛk pyɛ́ de wot á wok yi e nenu bemât nuha. Yɛn á di pyɛ́ mo yi e susu mo, ko bá tɛ̀ ɛn be shara hâ Dagwi.

³ Ano kwong, à gbɔng mwat Teyofilus, ma ngyɛgɛt pyɛ́ mo mwa yi e mɛsɛng o, ko ma di a sé naka na me jɛk a hwo yɛ̄ e gwong de ya té.

⁴ Ma sé jɛk ano, yaga na hwo bin tɔk netyɛ̂ng pyɛ́ de bá kana ha a hwo.

Tom-lagwi a vey ha rehâ tɔ̂ Yohana wo batisma

⁵ Jeng de Gbɔng Gwɔ̀m Herodes á sè re negwɔm e sevwêl Yudiya, mwat hwak á sè e hwomo de á sè piris; reza mɛ, à Zɛkarya. Á sè wo yerê bepiris ye Abiya. Bá tâng hwā mɛ, à Ɛlisabɛt; yɛ á sè yerê Aharon de à kana sè darwêy bepiris.

⁶ Negwɔn bemat beba vane mo ná sè cik e bayîs Dagwi. Bá raa badu Dagwi mwa, bá gyili ko rining wɛt.

⁷ Yɛn á vɔk hwey wɛt, yaga Ɛlisabɛt á sè sang-gwon. Ko mwa hɛn bá kana pɔl ba e jey.

⁸ Tuhak, Zɛkarya a ra fwom mɛ gwo bepiris e Gbɔng Duk Re Fongol, sede remo de jeng fwôm yere mɛn ya to vey.

⁹ E ji negwɔn bepiris bá kana tɔ́k ɛn na kasa mwat e tē mɛn, na a rangas pyɛ nesang hyɔɔlɔl vɔk na Dagwi. E tuk hane mo, ba hwo kasa na masâ sesek, ko kasa mo ha hwo e ra Zɛkarya de a yel e Gbɔng Duk Re Fongol wo Darwey.

¹⁰ E jeng rangâs pyɛ nesang hyɔɔlɔl o, mwa regyɛng bemat rá sè e majey, bá sè ra won.

¹¹ Ko e ji jeng, Zɛkarya a di tom-lagwi hwak wo Darwey, a tumal e vwɔ yege gàgbang rangâs pyɛ nesang hyɔɔlɔl o.

¹² Sede Zɛkarya a di ɛ, a ye lot, ko bengyip ba vo ɛ.

¹³ Ko tom-lagwi o a yang ɛ, “À Zɛkarya, hwo wok bengyip wɛt! Dagwi a ga wok won mō: Hwā mō Ɛlisabɛt ê tɔ a hwo hwey wen, ko hwà rɔda vo a hɛ rezâ Yohana.

¹⁴ Hwà rɔda vɔk yey pyɛng, na hwo wok neta arɔng. Ko bemat pyak ba rɔda vɔk yey pyɛng yaga tɔ mɛ,

¹⁵ yaga a rɔda sè gbɔng mwat e bayîs Darwey. A kwɔn sɔ nshî anap kɛ pyɛ cak detu de ye tɛ̀ mwat a feng wɛt. Ko Gabik Jɛrɛ ha rɔda vɔk reto e ra yɛ yimo yɛ e jîm neng mɛ.

¹⁶ A rɔda toyo na BeIsrayɛl pyak vey na Darwey Dagwi mɛn.

¹⁷ Ê sè mwat de a vɔk Gabîk reto sede Eliya à kana vɔk raane, ko ê kyè e nuyêl Darwey o. Ê tɛ̀ beda tanga nèy mɛn na be to kyè e ji nesa na bemɛn, ko ê toyo na bemat de be gyenges hâ Dagwi wɛt, na be raa negwɔn vemo de ba sé cik e bayîs Dagwi o. Ano kwong, ê yong a Darwey yerê bemat de ba ga yong ɛn na be ra a yɛ fwom.”

¹⁸ Zɛkarya a yâng tom-lagwi, “Yi e rɛ̌ de mê tɔk pyɛ́ mo ya sé ano arɛt? Ma ga kwop, ko hwā lɔ hom arɔng a ga kana pɔl ba e jey.”

¹⁹ Tom-lagwi o a toyo a yɛ, a ye, “Me wɛ, à Gabriyɛl. Ma sé tumal e nuyêl Dagwi de a tomo me na me vey ha na hwo, na me vey a hwo na yɛgɛt yat yemo.

²⁰ Ko di, hwà sey tsak o na há hom wɛt. Yaga ano, hwô sǎ yuu, ko hwô tɔk to ha wɛt sɛ̌ tuk de pyɛ́ yemo ya rɔda ba té, sede remo de ma ha a hwo. Mwin, pyɛ́ yemo ya rɔda té e jeng de ya jam.”

²¹ Regyɛng bemat o ra sé tumal e majey, ra sé gyeng Zɛkarya. Bemat o ba langat hɛn pyɛ de ya tɛ̀ ɛ a ros e Gbɔng Duk o ano.

²² Ko jeng de a nusu e jey, a tɔk to ha na yɛn wɛt. Yaga ano, ba tɔk, a ga di negwi-ywey e kwɔn o. A ha na yɛn na vɔ zɔng, ko a tɔk ha na nu wɛt.

²³ E jeng de Zɛkarya a yɛnɛ nepɔlɔ̂ fwom mɛ, a toyo vɔk e lɔ.

²⁴ E bamâ jeng tyɔng, hwā mɛ Ɛlisabɛt a hwo vɔk jim, ko a kyě lɛsɛ hɛ pɛl tungun. A ye:

²⁵ “Pyɛ à yemo de Darwey a ra a me: A tosho reyɔm hom, ko a pat pyɛ de ya tɛ̀, ma sè pyɛ byɛs e tê bemat.”

Tom-lagwi a vey ha rehâ tɔ̂ Yɛsu

²⁶ E jeng de Ɛlisabɛt á sè na jim pɛl tyiimin, Dagwi a tomo tom-lagwi de be tâng ɛ, à Gabriyɛl vɔk e repomo rehak e ji sevwêl Galili de be tâng rɛ, à Nazarɛt.

²⁷ A tomo hɛ vɔk na hwong hwak de mwat hwak de ba tang ɛ, à Yɔsɛf a hwono hɛ. Mwat o á sè yerê Gbɔng Gwɔ̀m Davit, ko rezâ hwong o, à Marya.

²⁸ Tom o a wul e kwɔn de Marya a sɛ́, ko a yang ɛ, “Show! Dagwi a sé tanga hwo, hwo de hwà ga sɛ̀ nerat sizɔng yi na yɛ!”

²⁹ Neha mo na bɔrɔk Marya e ji yey mɛ tyɔng wɛt, ko a sé a yɛ kpɛɛ na yerê ye show hane mo.

³⁰ Ko tom-lagwi o a hwo ha na yɛ, a yang ɛ, “À Marya, hwo wok bengyip wɛt! Dagwi a ga dura a hwo nerat mɛ.

³¹ Di, hwà rɔda vɔk jim, ko hwô tɔ hwey wen, ko hwà rɔda vo a hɛ rezâ Yɛsu.

³² A rɔda sè gbɔng mwat, ko Dagwi De A Dal Na Reto Mwa ê tang ɛ, à Hwey hom. Darwey Dagwi a rɔda nɔng ɛ gwofwa negwɔm yere mɛ Davit,

³³ ko a rɔda re negwɔm e ra mwa yére Yakɔp gbak-gbak. Segwɔm mɛ sê vɔk yɛnɛ wɛt.”

³⁴ Ko Marya a hwo yâng tom-lagwi o, “Yi e rɛ̌ de pyɛ yemo yê tɔk té arɛt, yaga ma sé yorom-hwong ɛ?”

³⁵ Tom o a toyo a yɛ, a yang ɛ, “Gabik Jɛrɛ hê vey e ra hwo, ko retô Womo De A Dal Na Reto Mwa rê ba sè tanga hwo. Yaga ano, bê tâng hwey de hwô tɔ mo, à Wo Jɛrɛ tanga, à Hwey Dagwi.

³⁶ Ko di, cang mō Ɛlisabɛt a vɔk jim, mwa ano de a ga kwop. Bemat bá kana tē, a sé sang-gwon, ko mwin, pwɛl mɛ gwô tyiimin a gwomo na jim o.

³⁷ Vit a pyɛ de ya dal gâp Dagwi na a ra!”

³⁸ Ko Marya a yang ɛ, “Ma sé sam Darwey. Tik na pyɛ mo ye té na me ano, sede remo de hwà ha.” Ko tom-lagwi o a kyè yi na yɛ.

Marya a wɔ̂ rekyɛn na Ɛlisabɛt

³⁹ E ji nepɔlɔ nane, Marya a hwo sogo, ko a kyè dey-dey vɔk e repomo rehak de ra sé e ji sevwêl berakû Yudiya.

⁴⁰ Jeng de a wul e hwomo, a wɔ̀ yel e lɔ Zɛkarya, ko a yâng Ɛlisabɛt show.

⁴¹ Jeng de Ɛlisabɛt o a wok ye show Marya mo, hwey de ha sé e jim mɛ ha diris. Ko Gabik Jɛrɛ ha sɛ̀ reto e ra Ɛlisabɛt,

⁴² ko a hwo hanat na gbɔng fwɔ, a ye, “Dagwi a ga tɛ̀ nerat e ra hwo, nemo de na dal ne bwang behâ mwa, ko a to tɛ̀ nerat e ra hwey de hwà rɔda tɔ arɔng!

⁴³ Me ma sé wà de nêng Darwey hom ê vey na me arɛt?

⁴⁴ Yaga e jeng de ma wok ye show mō, hwey hemo de ha sé e jim hom ha diris, yaga ha vɔk yey pyɛng.

⁴⁵ Hwà sé wo yey pyɛng, yaga hwà sey tsak o, hâ Darwey de ba ha a hwo ha rɔda sila hɛ!”

Marya a somo Dagwi

⁴⁶ Ko Marya a ye, “Ma sé somo Darwey na yey hom mwa;

⁴⁷ Dagwi, Mwât Sey me, a tɛ̀ ma vɔk yey pyɛng,

⁴⁸ yaga yɛ a bɛrɛng me na nehywɛ, me sam mɛ de ma vey pyɛ cak wɛt! E ngamo nuyel, mwa bemat yi e mwa jeng bê ye, ma sé wo yey pyɛng,

⁴⁹ yaga Dagwi a ra a me gbɔng pyɛ, e yɛ wɛ de a vɔk retô mwa, yɛ a sé jɛrɛ arɔng.

⁵⁰ E tosho reyɔ̂m mwa vemo de be wok bengyip mɛ; toshô reyɔm mɛ mo ha vɔk yɛnɛ wɛt.

⁵¹ A nára vwɔ mɛ gwo gap, ko a shara mɛ̀ vemo de be tos bato mɛn e begwông bare mɛn.

⁵² A paa vemo de ba vɔk reto yi e beta negwɔm mɛn, ko a nɔ̂ng vemo de be dyɛng bato mɛn nerey.

⁵³ A jut pyɛ́ ryat, a nɔ̂ng bemat de vyong ye vos ɛn, sɛ̌ ba sirik e ngyen, ko a ro vemo de ba sé bedaberey, a tik ɛn vɔ sǎn.

⁵⁴ A ra pyɛ́ de a ga sira a bedabeda mot e ra yɛ̄, ko a vey sɛlɛ BeIsrayɛl de be ra a yɛ fwom.

⁵⁵ A bare na a tosho reyɔ̂m Abraham tanga yére mɛ mwa gbak-gbak.”

⁵⁶ Ko Marya a sangal e hwomo na Ɛlisabɛt sede pɛl tat; e bama mo, a toyo vɔk e lɔ.

Tɔ̂ Yohana wo batisma

⁵⁷ Sede jeng de Ɛlisabɛt ê tɔ ya pom, a tɔ hwey wen.

⁵⁸ Bemât vwara mɛ tanga cang mɛ ba wok, Darwey a ga tosho reyɔm mɛ sizɔng, ko ba vɔk yey pyɛng tanga yɛ.

⁵⁹ Tuk hê rwit, bemat ba hwo vey na be wɔ́ a hwey o e cwɛl, ko ba simo na be tɛ̀ a hwey o zâ da mɛ Zɛkarya.

⁶⁰ Ko neng mɛ a ye, “Wey! Ba rɔda tâng hɛ, à Yohana.”

⁶¹ Ba toyo a yɛ, ba yang ɛ, “Kée! E ji yere min, vit a mwat de be yishi hɛ na za hemo!”

⁶² Ko ba hwo ha na dâ hwey o na vɔ, ba rangal hɛ za de ê simo a vo a hwey o.

⁶³ Zɛkarya a jāma be nɔng ɛ pyɛ de ê jɛk e ra yɛ. Ko jeng de ba nɔng ɛ, a hwo jɛk, “Be tang ɛ, à Yohana.” Ko yɛn a langat hɛn mwa.

⁶⁴ E ji jeng o, relêm Zɛkarya ra viri hɛ, ko a hwo ha, a somo Dagwi.

⁶⁵ Bengyip ba vo bemât vwara mɛn mwa, ko hâ pyɛ́ mo mwa ha shara hɛ vɔk e kahɛ kwɔn e ji sevwêl berakû Yudiya.

⁶⁶ Mwa bemat de ba wok há mo ba tɔrɔng e ji neyey mɛn, ba ye, “E yere wɛ̌ mwat de hwey hane mo hê sè arɛt?” Yaga ba di, retô Darwey ra sé tanga hɛ.

Há de Zɛkarya a ha yi na retô Dagwi

⁶⁷ Gabik Jɛrɛ ha sɛ̀ reto e ra dâ hwey o, Zɛkarya, ko a hwo ha sede zarap Dagwi, a ye:

⁶⁸ “Tik na wot a somo Dagwi, yɛ Dagwi wo BeIsrayɛl! A ga vey na a sɛlɛ bemat mɛ, ko a viri hɛn yi e sesam.

⁶⁹ A tomo na Mwât Sêy bemat wo reto, na a vey sey ot. Mwat o a sé yerê Davit, yɛ mwât fwôm Dagwi.

⁷⁰ A raane, à kana sira yi e nenu bezarap Dagwi vê jɛrɛ wɔgɔ”,

⁷¹ ê sey ot yi e bemât repugu mot, yi e vɔ mwa bemat de be bɛrɛng hot fus.

⁷² À kana sira a bedabeda mot wɔgɔ, ê tosho reyɔm mɛn, ê bare wɔgɔ, à kana wuna hɛ na sira tanga yɛn arɔng.

^73-74 À kana sira a dâ beda mot Abraham, a rɔda sey ɛ̀ hot yi e vɔ bemât repugu mot, na wot a bin ra a yɛ fwom sana wok bengyip.

⁷⁵ À kasa hot, yaga na wot a bin sè jɛrɛ, na wot a to sè cik e bayis mɛ mwa jeng de wot a sé na neken.

⁷⁶ “Ko hwo, à hwey hom, ba rɔda tang o, à zarap Dagwi, yɛ Dagwi De A Dal Na Reto Mwa. Hwô tānga kwey e nuyêl Darwey na hwo yong a yɛ begwong mɛ,

⁷⁷ na hwo ha a bemat mɛ wɔgɔ, Dagwi a rɔda hàla a yɛn banɛn mɛn, ko yi ano, a rɔda sey ɛn.

⁷⁸ Dagwi mot e tosho reyɔm mot, ko e wokos nemwishish mot arɔng. Ê tomo a wot na mwât sɛlɛ yi e lagwi de a sé sede negbêy gwi de ne ta e zang-gwi gasi, na ne nɔng ot negbey.

⁷⁹ Negbey o ne ro lwil reku de gwo tɛ̀sɛ a bemat bengyip, ne dura a wot gwong de gwo tɛ̀ yey mot ye dyɛng.”

⁸⁰ Hwey o ha ras e rebek na tɔ̂k pyɛ̂ Dagwi arɔng. Ha sangal e hey sɛ̌ jeng ya vey de hê dura tô hɛ na BeIsrayɛl, na he hwo fwôm hɛ.