Yɔwɛl 1 - Bwok-basa Dagwi wuna-na-sira roso tanga pas

¹ Há de Dagwi Darwey a ha a Yɔwɛl Pɛtuwɛl.

Pyɛ́ de rawal wa re

² À yin bemakuk, tē in naka, tik na kawɛ mwat e ji Yuda a wet betong. Pyɛ cak yerê yemo ya ga kana té e jeng min kɛ e ye beda min a?

³ Ha in a nèy min reha mo, na yɛn a vey ha a nèy mɛn, ko nɛ arɔng na rɔda ba ha a zamang de he kyè vey.

⁴ Pyɛ de bètàrmaje ba tɛt ɛ, rawal wa re, pyɛ de rawal wa tɛt ɛ, yɔ́rɔ begwòng ya re, pyɛ de yɔ́rɔ begwòng ya tɛt ɛ, yɔ́rɔ wey na pyɛ́ ya re!

⁵ À yin de yin a ga feng siring, sene hin yin tosho! À yin de yin a ga sɔ nshî anap, dak in sekun! Yaga siring min wa ga tala hɛ.

⁶ Bemât comô vwel hak ba ga hwo e ra vwel hom, ba vɔk gap tyɔng wɛt, ko ba dal gâp bara, yìn mɛn be re sede ve gukum, na jōro sede yê hwâ gukum.

⁷ Yɛn a ga wey na batin cɔ́gɔt anap hom, ko ba ga tangal batîn regwi hom, ba ga peshe bebǒk o e vwel, ba tɛ̀ nelang o ne pɛngɛ.

⁸ À bemat hom, tosho hin sede yorom-hwong e ji berugu sesin, de e tosho rekû mwat de e hwono hɛ.

⁹ Vit a pyɛ̂ yeneng kɛ nshî anap de bê nára nɔrɔ̂ yɛ e Gbɔng Duk Re Fongol. Bepiris, yɛn bemât fwom mɛ, be ra sesin.

¹⁰ Vit a pyɛ́ e hiri, sevwel sé ra sesin, yaga ba ga wey na pyɛ̂ yeneng vit, nèy anap na ga hworok vit a nshi, ko batîn pat ba ga tē nɔɔshɔsh, vit à něy.

¹¹ À yin bemât cap, lashe hin yey, à yin de yin e yong hirî anap dak in sekun, yaga alkama na baale, ey, ba ga wey na mwa pyɛ́ de ba how.

¹² Batîn cɔ́gɔt anap, na vê regwi ba ga tē nɔɔshɔsh; batîn cɔ́gɔt pomigiranet, na tyet tanga apɛl, ey, mwa batin cɔ́gɔt ba ga hworos. Yey pyɛng de bemat o bá kana vɔk ya ga toyo hɛ e jim.

¹³ À yin bepiris hom, yin vemo de yin e ra fwom e gàgbang nása nenɔrɔ̂ yas! Tɛ̀ in berugû sesin min, na yin tosho. Wɔ̀ yel in e Gbɔng Duk Re Fongol na yin a pɔl e de sesin! Vit a pyɛ̂ yeneng kɛ nshî anap de bê nára nɔrɔ̂ yɛ e Gbɔng Duk Re Fongol wo Dagwi min.

¹⁴ Nɔng in nu na bemat be tik rê pyɛ́, yila hin bemat mwa e tulâ jɛrɛ! Tula hin bemakuk, na bemât vwel o mwa. Tula hin e Gbɔng Duk Re Fongol wo Dagwi min, na yin a tosho a Dagwi Darwey.

¹⁵ Áaa waa, à jeng o! Jeng Dagwi Darwey ya ga vey bagat, jeng gawey yi na Dagwi Wo Reto Mwa.

¹⁶ Wot sè bɛrɛng be sè wey na pyɛ̂ re mot ko wot a tɔk ra pyɛ cak wɛt. Be sè wey na yey pyɛng mot e Gbɔng Duk Re Fongol wo Dagwi mot.

¹⁷ Pyɛ́ de ba tus ya kushu e vwel na nehwogot. Vit a pyɛ̂ yeneng de bê wɔ̀ tik e gban. Ano, begban de ba ga hala vɛ hal ba ga gabsa, ba tɛ́ ɛn barin.

¹⁸ Yas ye rus! Kàra berɔndɔng be tosho na rezot, vit a sehwey yaga vɛ. Kàra tyīmit ba sé sɔ reyɔm rining o.

¹⁹ À Dagwi Darwey, ma sé tosho a hwo yaga nekwɔn sehwey mwa na batîn cɔ́gɔt ba ga hworos, yaga kya ha re yɛ.

²⁰ Ngyāma arɔng ya sé tosho a hwo yaga nerɔt na ga hworos hwɔ́k-hwɔk, kya ha ga re nekwɔn sehwey.