Ɛsta 1 - Bwok-basa Dagwi wuna-na-sira roso tanga pas

Da Vwel Ahasɛrus a yong gbɔng nzem

¹ Pyɛ́ de ba ha e ngamo ya té e jeng Da Vwel Ahasɛrus. Yɛ Ahasɛrus womo de a re negwɔm e ra bavwêl begbɔng begwɔ̀m naga kuru baba na vɛ betaama (127) yi e Indya vɔk e Etiyopya.

² E jeng yane, á sè sangal e ra gwofwa negwɔm mɛ e gbɔng repomô Shushan.

³ E shey hê negwɔm mɛ hê netat, a yong nzem rê pyɛ́ yaga mwa begbɔng begwɔ̀m bavwel, na bemât badu mɛ. Begbɔng bemât como vê Pɛrsya na Medya, na nèy lɔ gwɔ̀m tanga begwɔmna bebak bavwel o, mwa bá sè ɛ.

⁴ A ra nepɔlɔ naga na kuru rwit (180), a sè ra nzem o, yaga na a bin dura mɛ nepolôs yas mɛ tanga gbɔng nerey na mwa pyɛ̂ háshe a bemat bayis yê segwɔm o.

⁵ Bama de nepɔlɔ nane na yɛnɛ hɛn, Da Vwel o a yong pyɛ̂ nzem yaga beras mwa de ba sé e hwomo e majêy lɔ mɛ e Shushan, begbɔng bemat tanga besɛl o. Ba ra nzem o e bwî majêy lɔ mo, ko ba tɛ̀ nepɔlɔ netaama e de râ nɛ̀.

⁶ Ba tɔrɔ kwɔn o na nedirî berugû linen bepɛng na ve wilwil, ba vos vɛ na rik linen puruk pɛng o na ve zwey, ko ba rɔgɔs e ra bewɔ́rɔ dyam pyɛng e ra beta gacik ve maabel. Ba to tɛ̀ gàt de ba yong na dyam shinang na dyam pyɛng e ra retîs kwɔn o de ba yong na beta berat vè bùm detidetu.

⁷ Ba nɔ̂ng bemat o nshî anap e ji neshǐ de ba yong na dyam shinang, ba yong kakɛ mo detu. Nshî anap ne Da Vwel o ná sè shɛrɛk.

⁸ Bá sɔ nɛ̀ tyɛng na redu, vit a mwat de á yâng hwak pyɛ cak, yaga Da Vwel o a ga ha a bemât fwom mɛ, be ra a kawɛ mwat tyɛng na pyɛ de a simo.

⁹ Ano arɔng, Hwārwey Vashti a yong a beha nemɛn à nzem rê pyɛ́ mo e bák mɛ.

Hwārwey Vashti a byɛs Da Vwel Ahasɛrus

¹⁰ Tuk hê taama, Da Vwel á sè e ji sefeng nshî anap. A yila berɛmɛt betaama de ba sé bagat na yɛ, vɛ à Mɛhuman, na Bista, na Harbona, na Bikta, na Abakta, na Zetar tanga Karkas.

¹¹ A nɔng ɛn nu, be wɔ̀ vey na Hwārwey Vashti e nuyel mɛ na kpîn negwɔm e rato mɛ. A simo dura a begbɔng bemat mɛ na bwang bemat o nerât bayis mɛ, yaga a sé rwat e bɛrɛng tyɔng wɛt.

¹² Ko jeng de berɛmɛt o ba wɔ̀ ha a yɛ tomô Da Vwel, Hwārwey Vashti a kyɛ́ ɛ nà wɔ. Da Vwel a wok shom tyɔng wɛt, ko pyɛ mo ya re a yɛ yey.

¹³ A hwo jāma badu yi na bemat de ba tɔk pyɛ́ de ya kyě tē, yaga a sé negwɔn mɛ, na a bin rangâl bemât tɔk badu, na be vo a yɛ redu.

¹⁴ Bemât bagat na yɛ de ba vos a yɛ badu, vɛ à Karshena, na Shetar, na Admata, na Tarshish, na Mɛrɛs, na Marsena tanga Mɛmukan. Yɛn vɛ a begbɔng begwɔ̀m betaama vê Medya na Pɛrsya, e vɛ de be tɔk wɔ̀ di Da Vwel kayɛ jeng, ko ba to sé vê yel e ji segwɔm o.

¹⁵ Da Vwel o a rangal hɛn a ye, “Me, Da Vwel Ahasɛrus, ma ga tomo vɔk na Hwārwey Vashti na redu, ko a kyɛ́ ɛ nà raa redu mo. E ji badu mot, e sɛ́ de bê ra na yɛ ɛ?”

¹⁶ Mɛmukan a hwo dura e nuyêl Da Vwel na begbɔng begwɔ̀m, a ye, “Pyɛ de Hwārwey Vashti a ra ya sé vyes e nuyêl Da Vwel nju mɛ zɔng wɛt, ko na begbɔng begwɔ̀m na bwang beras mwa de ba sé e ji mwa bebak bavwêl Da Vwel Ahasɛrus arɔng.

¹⁷ Hâ pyɛ́ Hwārwey Vashti a ra, ha rɔda yel e betong beha mwa, hê tɛ̀ ɛn, be hwo byɛs beras mɛn, ko ba rɔda tē, ‘Da Vwel Ahasɛrus a nɔng nu, be wɔ̀ vey na Hwārwey Vashti e nuyel mɛ, ko a kyɛ́ ɛ nà vey.’

¹⁸ Ko di, behâ begbɔng bemât Medya na Pɛrsya de ba ga wok pyɛ de Hwārwey Vashti a ga ra, yɛn a rɔda wɔ̀ ha a beras mɛn ano yunung arɔng. Hemo ha rɔda tɛ̀ beha kagwa be byɛs beras mɛn, ko beras ba rɔda tɛ̀ shom na beha mɛn arɔng.

¹⁹ “Yaga ano, ka sede hwo, à Da Vwel, hwà di a jam, ko tik na hwo tɛ̀ redu wɔgɔ, Vashti a kwon to vey e nuyêl Da Vwel Ahasɛrus ko tyɔng wɛt. Tik na be jɛk, be wuna redu mo e ji badu Medya na Pɛrsya de be tɔk sege vɛ wɛt. Ko hwo nɔng nerey nehwarwey mɛ vɔk na hwā mó hwak de a dal ɛ.

²⁰ Ano kwong, jeng de ba rɔda mok redu rane e mwa yɛnɛ̂ vwêl Da Vwel, ko beha ba rɔda nɔ̂ng beras mɛn nerey, yi e berey o vɔk e besɛl o.”

²¹ Ha hane de Mɛmukan a ha ha jam a Da Vwel tanga begbɔng begwɔ̀m, ko Da Vwel o a ra tyɛng ano.

²² A tɛ̀, be tomo na bebok-berang vɔk e bavwêl begbɔng begwɔ̀m mwa, ba jɛk a kavɛ bemât bavwel na yerê lem mɛn tanga yerê gwông jɛk mɛn wɔgɔ, kawɛ rwas a sè dalɔ e lɔ mɛ, na a ha lem mɛ.