BeIbrani 1 - Bwok-basa Dagwi wuna-na-sira roso tanga pas

Dagwi a ha e nû Hwey mɛ

¹ Yimo raane, Dagwi à kana ha na bedabeda mot zang pyak e begwong detidetu e nenu bezarap mɛ.

² Ko a remo, e jeng ye yɛnɛ mo, a ga ha na wot e nû Hwey mɛ. À sè yi na hɛ de Dagwi à kana yong jêy mwa. E hɛ arɔng de Dagwi à kasa na he bin vɔk pyɛ̂ mwa e yɛnɛ mo.

³ A sé yi na Hwey mɛ mo de nedyɛt gbɔng nerât Dagwi ne lolo. Hā to sé tyɛng sede Dagwi pyɛ mɛ a sé, ko ha vɔk jey yemo yi na hâ hɛ de ha vɔk reto. Há yong gwong na be fugut a bemasi banɛn mɛn, na yɛn a sè jɛrɛ. E bama mo, há wɔ́ e lagwi, há sangal e vwɔ yegê Dagwi de a vɔk reto de ra dal mwa na nerey.

Yɛsu a dal betom-lagwi

⁴ Dagwi a tɛ̀ Hwey o ha dal betom-lagwi na nerey, sede remo de reza de a nɔ̂ng hɛ ra dal bamɛ̀n mwa.

⁵ Yaga Dagwi a sang yâng hwak e ji betom-lagwi wɛt wɔgɔ, “Hwà sé Hwey hom; yunung ma ga tɛ́ me Da mō.” Kɛ a ye e ra hwak e ji betom-lagwi arɔng wɛt wɔgɔ, “Ma rɔda sè Da mɛ, ko yɛ a rɔda sè Hwey hom.”

⁶ Ko jeng de Dagwi á vey bagât tomo Hwey de hê re nedanelɔ mɛ e jey, a ye, “Tik na mwa betom-lagwi vê Dagwi be re a yɛ fongol.”

⁷ E rà betom-lagwi, a ye, “Dagwi a tɛ̀ betom mɛ be sè sede gùl, ko a tɛ̀ bemât fwom mɛ be sè sede balêm kya.”

⁸ Ko e rà Hwey mɛ, Dagwi a ye, “Hwà sé Dagwi, segwɔm mō sa rɔda nàra gbak-gbak! Hwó gas badu e tē e ra bemat mō de hwó re negwɔm e ra yɛn.

⁹ Hwà tɛ̀ yey na pyɛ́ de ya sé cik, ko hwà kyɛ́ o pyɛ́ de ya sé cik wɛt. Yaga ano, Dagwi de a sé Dagwi mō à kasa hwo, ko à nɔng o nerey na yey pyɛng de mwa yɛ̄ ya dal yemo de a nɔ̂ng besâ sangal mō.”

¹⁰ Ko a to ye, “À Darwey, e hwo de hwà yong jey e susu mo, ko hwà yong belagwi na vɔ mō arɔng.

¹¹ Pyɛ́ mó mwa ya rɔda ba sè vit, yā rɔda kwop sede berugu; ko hwo hwà rɔda nàra.

¹² Hwà rɔda gunung yɛ̄ sede gworugu, ko ba rɔda sege yɛ̄ sede berugu arɔng. Ko hwo, hwó nàra tyɛng kayɛ jeng, neken mō na vɔk yɛnɛ wɛt.”

¹³ Dagwi a sang yâng hwak e ji betom-lagwi wɛt wɔgɔ, “Sangal e ngamo e vwɔ yege hom sɛ̌ jeng de ma re vê repugu mō, na me tɛ̀ ɛn e nɛ̂n bol mō sede pyɛ tikîs bol.”

¹⁴ Ko sɛ̌ betom-lagwi o ba sé sɛ́ arɛt? Yɛn a sé begabik de be ra a Dagwi fwom. Ko e tomsal hɛn, na be sɛlɛ vemo de a rɔda sey neken mɛn.