2 Kɔrintɔs 1 - Bwok-basa Dagwi wuna-na-sira roso tanga pas

¹ Bwok-rwang gwomo yi e vwɔ hom Bulus, tom Kristi Yɛsu yi na simô Dagwi; gwà yi na me tanga gwa mot Timotawus, Vɔk na bemât ekilisiyâ Dagwi de ba sé e Kɔrintɔs tanga mwa bemât Dagwi e yɛnɛ̂ sevwêl Akaya:

² Tik na Dagwi Da mot tanga Darwey Yɛsu Kristi be dura a yin nerat mɛn, na be tɛ̀ yey min ye dyɛng.

Dagwi e wɔrɔk hot e kagwɛ gwong

³ Tik na wot a somo Dagwi, yɛ Dâ Darwey mot Yɛsu Kristi! Yɛ a sé Da de e tosho reyɔm mot, ko a to sé womo de e wɔrɔk hot e kagwɛ gwong.

⁴ E yɛ de e wɔrɔk hot e kanɛ negbang mot, yaga na wot a tɔk wɔrɔk vemo de ba sé e ji negbang nehak; ko wot e wɔrɔk hɛn e gwong de Dagwi a wɔrɔk hot arɔng.

⁵ Tyɛng sede remo de wot e sɔ reyɔm sizɔng yerê remo de Kristi á kana sɔ, ano arɔng, Dagwi e wɔrɔk hot sizɔng yi na Kristi.

⁶ Ka sede wot a vɔk negbang, ko a sé yaga na be wɔrɔk hin, yaga na Dagwi a to sey neken min arɔng. Ko ka sede ba wɔrɔk hot, a sé yaga na yin a sɛ̀ wɔ́rɔk o arɔng. Yi ano, yin a rɔda tɔk niri na reyɔm yerê remo de wot e sɔ.

⁷ Sɛ̂t yey mot na yin ha sé gak. Yaga wot a tɔk, tyɛng sede remo de yin e sɔ reyɔm e gwong de wot e sɔ rɛ, ano arɔng, be wɔrɔk hin e gwong de be wɔrɔk hot.

⁸ À begwa, wot e simo na yin a tɔk yerê negbang de wot á di e sevwêl Asiya. Pyɛ́ mo ya yɛklɛ hot tyɔng wɛt, ya dal gâp niri mot, ko wot á ye waa a kayɛ pyɛ, mwa na neken mot arɔng.

⁹ Mwin, wot á di sede ba ga yɛrɛ a wot shɔt reku. Ko pyɛ́ yane ya té, yaga na ye tɛ̀ ot na wot a ye yɛndɛng e ra bato mot wɛt ko e rà Dagwi de e sensa vemo de ba ga kushu.

¹⁰ E yɛ de a ga kana pat ot yi e gbɔng reyɔm de ra yâng wey na wot; ano arɔng, a rɔda to pat ot. Ko wot a sɛt yey mot e ra yɛ, na a re nuyel na paa ot yi e reyɔm,

¹¹ sede remo de yin e sɛlsɛ hot na newon min. Ano kwong, Dagwi a rɔda sey newon bemat pyak de ba ga ra yaga wot. A rɔda tɛ̀ nerat mɛ e ra wot, ko bemat pyak ba rɔda feng a yɛ yaga wot.

Bulus a sege kwɛngɛl mɛ

¹² Ko di, wot e ra kaa e ra pyɛ́ yemo ngan: Wot a tɔk e ji yey mot, negwɔn mot ná sè e gwong de gwa sé jɛrɛ, ko gwa to sé mwin, yerê gwong de gwa yi na Dagwi. Wot á sangal ano e jey yemo, ko a kat mɛ̀ jeng de wot á sangal tanga yin. A sé e nerat de Dagwi a dura a wot de na tɛ̀, wot a vɔk negwɔn nemo, ko a sé e netsitsɛ̂ng jey wɛt.

¹³ Mwa neha de wot e jɛk a yin e bebok-berang mot na sé yerê nemo de yin a tɔk, ko yin e kyɛm yin a basa nɛ arɔng. Ko ma sɛt yey hom,

¹⁴ tuhak yin a rɔda tɔk ot mwa yɛɛlɛl, mwa ano de a remo yin a tɔk ot yɛt wɛt. Yi ano, yin a rɔda ba tɔk ra kaa na wot, sede remo de wot a rɔda ba ra kaa na yin arɔng tuk de Darwey Yɛsu e ba vɛ̄ hɛ.

¹⁵ Sede remo de ma tó yey e ra pyɛ́ yemo ko tyɔng wɛt, ko ma yong ɛ̀ na me tānga vey di in e mɛsɛng o e ngyen, yaga na yin a bin sɛ̀ nerat zang ba.

¹⁶ Ma yong ɛ̀ na me pe kwey e hane e gwong hom vɔk e sevwêl Makedonya, ko ma rɔda di in jeng de ma sé toyo yi e hwomo arɔng. Ko e bama mo, yin a rɔda tɔk sɛlɛ me e kwɛngɛl hom vɔk e sevwêl Yudiya.

¹⁷ Yin e bare, jeng de ma kana yong kwɛngɛl gwomo, ma kyě ríp me arɛt? Kɛ me yong kɛngɛl hom yaga pyɛ de me pyɛ hom zɔng ma di, ya sé naka arɛt? Me tē “ey”, ko me to tē “wey” arɛt?

¹⁸ Ko di, tyɛng sede remo de Dagwi a sé womo de e ha tsak o, há de wot a ha a yin ha sé yerê hê “ey” na “wey” wɛt.

¹⁹ Yaga Yɛsu Kristi, Hwey Dagwi, de me, na Silas, tanga Timotawus wot a shara a yin reha mɛ a sé womo de e rip há mɛ “ey” na “wey” wɛt, ko yɛ a sé wo “ey” zɔng kayɛ jeng.

²⁰ Yaga kayɛ pyɛ de Dagwi a ga sira e ra yɛ ya sila yi na Kristi. Yaga ano, a sé yi na yɛ arɔng de wot e ye “Ano”, na wot a nɔ̂ng Dagwi mɛ̀ nerey.

²¹ A sé e Dagwi de e tɛ̀sɛ hot mwa tanga yin, na wot a tumal gak e ji sangâl nesa mot na Kristi. E yɛ de a tik ot jaram;

²² a tɛ̀ jɔt mɛ e ra wot na a dura, wot a sé bemɛ, ko a tɛ̀ Gabik mɛ e ji neyey mot arɔng. A nɔng ot hɛ na he sè pyɛ de yê tɛ̀ ot na wot a tɔk tsɛng-tsɛng, ê nɔng ot pyɛ̂ mwa de a ga sira na a nɔng ot.

²³ Ma sira me, ko Dagwi a sé mwât nuha hom wɔgɔ, ma to me toyo vey e Kɔrintɔs wɛt, yaga ma simo na me ra a yin pyɛ wɛt.

²⁴ Wot a sé tɛ̀ in na retek e ra pyɛ́ de yin a rɔda sey tsak o na yɛ̄ wɛt, yaga yin e tumal gak e ji sêy tsak o min o. Ko wot e ra fwom tanga yin, yaga na yin a vɔk yey pyɛng e negya.