Jemisi 1 - Panga ea Kya 1895

¹ JEMISI, uhayi mwa Anyambě, na mwa Upangiyi Jisu Kraist, o jomu ja makaka na mabale, ba di vanjanganango; Mbolani.

² Bana b‘ ina, langakati yâni kabo mbya pa o inyěni o kwakěni o mayějudwě ma mangâ‐mangâ;

³ ikabojana o yowuděteni, n‘ iyějudwě j‘ ikamidě janyu i hakiděndi iyika.

⁴ Ndi iyika i diyaki na ehavu aju ya hânjâbiyěngo, ovaně nd‘ inyěni o ka diyěni hânjâbiyěngo, na leniyango, pěněpěni elombo.

⁵ Oningě moto inyěni o jadi a pěněkě iyowě, a uwake Anyambě, a věkě moto wěhěpi n‘ ulema bwe, a tâbe; na jâ i ka věwi mâ.

⁶ Nd‘ a uwake n‘ ikamidě, a vongole; ’kabojana a vongolakě a te pani ka ebuluwa ya manga, e hěhěkiyě n‘ upupě, na yâ e bolonganaka.

⁷ Ikabojana moto těně a pikilakiya na a ka pahiyandi elombo o Upangiyi a jadi.

⁸ Moto wa melema mebale a mbwenga‐mbwenga na njeya jaju jěhěpi.

⁹ Mwan‘ ina w‘ inyanga ihâlě, a peyake nana a betudwěngo;

¹⁰ ndi enami, na na a yěvudwěndi; jambojana a ka tombandi o mâ na malângâ ma mbusanga.

¹¹ Jambojana joba i běkě puměngo, na yomu e dikanakidě, i vivilakidi mbusanga, na malângâ maju ma pukwaka, na bwamu bwa ehini aju bo nyangaka; nonaně tepě o enami a ka segě o itamuwedi jaju.

¹² Ibâtâ na moto a hindinakě iyějudwě; ’kabojana o mâ a běki bendwěngo, a ka pahiyandi korowa ya eměnâ, ya Upangiyi e di yohaněngo ba tândâkě mâ.

¹³ O moto a běkě yějudwěngo, a vâke na, Mba yějudwi na Anyambě, jambojana Anyambě a yâlě o yějudwě na bobe, na mâ mětě a yějěkiyě moto ka moto;

¹⁴ ndi moto wěhěpi a yějěkudwěndi o mâ a dulakwě n‘ edoko aju mětě, na mâ a kâpâkwě.

¹⁵ Nandi o edoko e běkě kahango, e jaki bobe; na bobe o bâ bo běkě hânjâbiyěngo, bo jakandi iwedo.

¹⁶ Bana b‘ ina ba tândâkwě, o humamakeni.

¹⁷ Bova boyamu bwěhěpi, na bova bwa hânjâbiyěngo bwěhěpi, bo ndi oviya oba, bo hubakandi oviya Hangwě a bwe a jadi, a ha bě n‘ iluwa, tombe edingihě y‘ iluwa.

¹⁸ A jaki hwě n‘ upango mwaju mětě, na ndaga ja pâkwě‐pâkwě, na ho diyake jângâ ja bebuma bya boho‐boho bya bekeha byaju.

¹⁹ Bana b‘ ina ba tândâkwě, o yowuděteni ekaye, na moto wěhěpi a diyake bokěngu n‘ iyowě, bodilo n‘ ikala, bodilo na malingwa;

²⁰ jambojana malingwa ma moto ma hakidě pangaka hohonganěngo ya Anyambě.

²¹ Nandi věngěkiděni sěkě yěhěpi, na bobe bo tombakě njělě, o ka pahakiyani ndaga i liyakwě, i ka yâlě o yongě malina manyu.

²² Ndi diyakani bahayi ba ndaga, hanga kabo bayoki pa, iyaba janyu mětě.

²³ Ndi ’kabojana moto a dite kabo uyoki mwa ndaga, nd‘ a diye uhayi a pani ka moto a ’mbwakiyě boho bwaju bo janakudwě o egeno:

²⁴ ikabojana a ’mbwakiyi mâ mětě, na mwa vala pělě na ’yaju elěngiyaha na mâ behaliděngo jângâ ja moto ijaju i diyakě.

²⁵ Ndi moto wěhěpi a ’mbwakiyě o elekanako e di hânjabiyěngo y‘ ihulama, na mâ lilimiděngo omě, a bě uyoki u behalakidě, ndi uhayi mwa ehavu, moto těně a ka vambwěndi ibâtâ na ’had‘ aju.

²⁶ Oningě moto ka moto inyěni o jadi a yěněněkě na a nd‘ ukaliyi, na mâ a pangiye emi aju, nd‘ a haka yabaka ulema mwaju mětě, ikaliyedi ja moto těně i te naně.

²⁷ Ikaliyedi i kěngěngě, na jâ i diye n‘ ibeva o boho bwa Anyambě nd‘ ekadi; ipepuwa ja nyuwe na myalika o etuniya abu, na o tata nyola aju mětě ebalo ya he e diye.