Efisu 1 - Panga ea Kya 1895

¹ PÂLU, utodu mwa Jisu Kraist n‘ upango mwa Anyambě, o baiyamu ba jadi o Efisu, na o batwě batwě o Kraist Jisu:

² Ehekwě n‘ inyěni, na jonga oviya Anyambě, Hangw‘ ahu, na oviya Upangiyi Jisu Kraist a jadi.

³ Ibâtâ na Anyambě, na Hangwě y‘ Upangiyi mwahu Jisu Kraist, a di hwě vambiyango ibâtâ j‘ Ilina jěhěpi, o loboko la hěvěni, o Kraist a jadi:

⁴ ikabojana a di hwě pânângo o mâ mětě a jadi, ijanga ja he i to yalwě, na ho diyake hole, ho diye na njěnji o boho bwaju n‘ itândě.

⁵ A pânâki hwě o vyo o iludwě ja bana na Jisu Kraist, hohonganěngo o mbya eyamu y‘ upango mwaju.

⁶ O ibendě ja ivenda ja ehekwě aju, eyaju e věki hwě o a tândâkwě a jadi.

⁷ O mâ nd‘ o hwě ho di na ivango na makiya maju, iyidwě ja bobe, hohonganěngo na bwinge bwa ehekwě aju;

⁸ eyaju e tumbakě o hwě ho jadi n‘ iyowě na bokeli bwěhěpi;

⁹ yowuděngo hwě ihâwě j‘ upango mwaju, hohonganěngo o mbya aju mětě, eyaju e lenakidě mâ mětě:

¹⁰ ovaně nd‘ ikabo ja egombe e ka timě, a ka yolě byěhěpi ta o Kraist a jadi, be jadi o hěvěni, na be jadi o he o mâ mětě.

¹¹ Na mâ tepě nd‘ uwahu a di pahiyango ijiga, pânwěngo hohonganěngo na ehoka y‘ upango mwaju.

¹² Na ho diyake ba ibendě j‘ ivenda jaju, ba pitakidě Kraist o egombe ya boho.

¹³ Na mâ tepě uwanyu a pitakidě, tepě n‘ inyi na yokani ndaga ja pâkwě‐pâkwě, sango eyamu y‘ iyonga janyu; na mâ uwanyu a kamakidě, na o yanganakudwě tepě n‘ Ilina Iyamu i yohanakudě inyěni, o běkidi kamiděngo. I jadi punu ya ijiga jahu,

¹⁴ kwanga na la ivango ja tango e di hambwěngo, o ibendě ja ivenda jaju.

¹⁵ Ovaně tepě umba, mbi běki yokango ikamidě janyu o Upangiyi Jisu, n‘ itândě opělě ya baiyamu běhěpi:

¹⁶ mbi bě dângo ivě ja akeva opěl‘ anyu, n‘ ituba janyu o makaliya mamě;

¹⁷ na Anyambě y‘ Upangiyi Jisu Kraist, Hangwě ya ivenda, a ka věyě inyěni ilina ja iyowě n‘ ilevudwě, n‘ iyowě jaju.

¹⁸ Na ovaně nd‘ o mâ a ka bumudě mihâ ma ibweyidě janyu; ovaně nd‘ inyěni o ka yowěni nyanga ya ipite i jadi o indudwě ijanyu i ndanakudwě, na nyanga ya boněně bw‘ ivenda ja ijiga jaju i věněkě o njamba ya baiyamu ba jadi,

¹⁹ na nyanga ya viyagano ya boněně bwa ngud‘ aju opěl‘ ahu ya ba kamakidě, na ihadě ja ngud‘ aju eněně.

²⁰ A levakidě yâ na Kraist, o mâ a pumbwakidě mâ oviya iwedo, na mâ mâ diyiděngo o enâ aju mětě eyomi,

²¹ o loboko la hěvěni, kebengo boněně bwěhěpi, na ngudi, na ukilikili, n‘ ipangiya, na dina jěhěpi i tubakwě, hanga kabo o he těkaně pa, ndi na o e vakě tepě:

²² na mâ vaměngo belombo byěhěpi ibomako ja matambi maju, na mâ mâ věngo na a diyake molo mwa belombo byěhěpi o tyâtyi,

²³ e jadi nyolo aju, ilonda jaju i londakě byěhěpi o byěhěpi.