Behadi 1 - Panga ea Kya 1895

¹ Ejanganangobo ya bohoboho eamě e lěnděkiyedi âvě, Teofilo, e diyakindi ya bea Jisus be yalakidě iha n‘ iyokudě beěhěpi.

² Kwanga nala buhwa boaju bo nângâkudwě oba, na mbuhěmbuhě ka Mâ‐a sombiya metodu meaju me pânâkidi n‘ Ilina Iyamu:

³ Ibaju ba levakidě nyolo ’aju mihâ o betuniya beaju be běki tombango, na ndembo i ha ’bě na ngudi ya bomwě penda, a yěněněki na bâ mabo ma hwi manai, a kalaka o pělě ’a belombo bea ipangiya ja Anyambě:

⁴ O Mâ‐a diyaki lataniyango na bâ, a langwakiyi bâ na ba takete o věngěmě o Jěrusalěmi, ndi ba vengake mohano mua Paia, umuanyu u di yokango n‘ Umba.

⁵ Ikabojana Jân a ma bapitaisakandi mětě na miba, ndi hwi ja yaviye nd‘ o bapitaiswěni n‘ Ilina Iyamu.

⁶ O bâ‐ba lataniyedi ka bâ‐ba uwa Mâ, na, Paia, o ka timbě tepě Israěl ipangiya o egombe těkae?

⁷ Ka Mâ‐a vâ na bâ, na, E ibě ’anyu y‘ iyowě ja begombe, tombe bepedi bea Paia be di vaměngo o ngud‘ ’aju mětě.

⁸ Ndi o ka pahiyandini ngudi oningě Ilina Iyamu i pugingě inyěni; vâkâna wa běndini tali jamě o Jěrusalěmi na Judia yěhěpi, na Sameria, kwanga nala o ihuku ja he ja yaviděngo.

⁹ O Mâ kalidi belombo tě ekabe, ba umbwakiyate, ka evindi ya nângânâ bâ Mâ o mihâ mabu.

¹⁰ O bâ‐ba diyakidi ba umbwakiya oba dongodongo, o Mâ‐a diyakidi a betaka, ba hilěte bato babale ba di těměngo baka na bâ n‘ ibâtâ itano.

¹¹ Ba vâki tepě, na, Inyi bamo ba Galili, e lě nde eanyu e di těměngo o ’mbwakiyani oba? Jisus tě i nângânudwě inyěni na ’la o Hěvěn ekadi, A ka viyate nyanga tě eanyu e yěněkě Mâ‐a kěkě o Hěvěn ekaně.

¹² Ka bâ‐ba timba o Jěrusalěm oviya ukodi u tubakwě, na, Âlivět, u didi oviya o Jěrusalěm ekěndâ ya buhwa bo‘ Iyâjâ.

¹³ O bâ‐ba pâkidi ka bâ‐ba beta o ilika via oba, ba diyakindi ovoně Pitě, na Jems, na Jân, na Andru, Filipo, na Tâmas, Batâlomiu, na Matiu, Jems ja Alfios, na Saimân Silote, na Juda mwa‘ nyangwě na Jems.

¹⁴ Ekaba běhěpi ba diyakite ikando j‘ ikaliya n‘ ihâhâlidě jâkâ, na bajo, na Meri nyangwě ’a Jisus, na bana ba nyangwě.

¹⁵ Jâ hwi tědině ndi ja Pitě i těměkidi o hanganě ya beyokwedi, na, (tango ’a mina yěhěpi ta e diyakindi ka kama na mabo mabale),

¹⁶ bamo na banabina, ndaga tě ya Ilina Iyamu e kalakidi ovyo n‘ udumbu mua Devidi o pělě ’a Judas a tumbwanakidi ba nângâki Jisus, ekaně e diyakite na e ka hohonganandi.

¹⁷ Ikabojana a langakudwěndi o tango ’ahu, na mâ‐a diyaki tepě a duwa mběi o ’havu tě ya minise ekae.

¹⁸ Nandi momo tě ekaně a hambakindi ehiki na mahomano ma bobe; o mâ‐a kwi molo na he, ka mâ‐a tumbiya na hanganě, ka miya meaju mea pumě.

¹⁹ E diyakite yowaněngo na badiya ba Jěrusalěmi běhěpi, ovaně ndi o ehiki těyeně e ma tubakwě na emi ’abu mětě, na, Asěldama, yeně e ndi, na, Ehiki ya makiya.

²⁰ Ikabojana e lěndwěngo o ejanganangobo ya Psamu na, Ediya ’aju e diyake ebobolo, e diyake na moto: na, Ipangiya jaju i nângâkwě na mot‘ upâkwě.

²¹ Ovaně vâkâna bamo tě ba jopi na hwě ulingo mua Upangiyi Jisus u jindi na hwě ekaba,

²² Oviya baptisma ya Jân, nala o buhwa tě iboaju bo nângânâkudwě hwě, umbâkâ a ’lwakudwě tali na hwě y‘ ipumbuwa jaju.

²³ Ka bâ‐ba pânâ babale, Josěf i tubakwě na Barsabas, a ma tubakwě na Justus, na Mataias.

²⁴ Ka bâ‐ba kaliya, na, Âvě Jěhova, a di yowěngo melema mea bato běhěpi, levakidě o babale ekaba uâvě a di pânângo,

²⁵ na ovaně nd‘ o mâ‐a ka nângě mběi ya ehavu tě ya minise n‘ utodu ya Judas e kwaki na bobe ekae, na ovaně nd‘ o mâ‐a ka ’lě o iboko viaju mětě.

²⁶ Ka bâ‐ba vě kwai jabu, ka kwai ya kwa na Mataias; ka mâ‐a langwě o tango ya jomu ja metodu n‘ utodu ’mbâkâ.