Aanlyn Bybel

Jûd 1 - Ŋwàklù Fùyèn Kàn Mù Fê (Cameron)

¹ À nyak mu Jûd ŋwàklù yina ha ghàn. Mô wut wù fètana ha Jisòs Klistù, a wâ nè Jêms. Mu nyak ŋwàklù yina ha ghàn wana ne a jûŋà ghe a ghɨ toŋa fihe, ghàn na ghɨ hi chyə a Yènfù atɨ̂n à yì kòŋ, à mô Bì, Jisòs Klistù kine ghàn.

² Mu jə̂mà na Yènfù kwohi seni ha ghàn, ma wù fo yutìnì ha ghàn ma wù fê tòkà kôŋà yê kə nì ghàn ashyə̂.

Jûd kɨn kum fòktìsu fəmsu

³ Mu chehì kôŋàlò hi nyàk ha ghàn, a sun samsu jûŋsù njwo Yènfù ti chîntì bônhì ghàhnà à jɨ̀m, biyani mu ti yen na yi jwôfàlò na mu nyâŋhè nyak à tobhi ghàn na ghàn hi fêtà nâ nì jyaka hi khɨte bimî ye a ghɨt a Fùyènà kəta. Bimî yin mô kə yì mòk ma Yènfù tî fo ha ghɨt a wuna kə hamok.

⁴ Mu jìsà ni beka ghɨt ale ti nyamti lyi a ghàhnà a fùtɨ̂n, a mô à ghɨ̂t ma ghɨ ti fwək tum a yì kòŋ yì Fùyèn a ghàhnà kokhe lyi hì nê gha a tu liŋa a ghɨna atɨ̂n. Ghɨt mɨ ghɨ̂n khə wi Yènfù, tunhi Chichà ghàhnà wù mòk we a ghàhnà kəta, a mô Bâba Jisòs Klistù. Ŋwàklù Fùyèn hì mô ma yì tî jîs kum nki ghɨt mɨ ghɨ̂n fôktì na Yènfù bè saka bobhelò ghɨna.

⁵ Mu khəlò kə nâ na ghàn hì khəlò gha mɨ ghɨ̂n biyani kôŋà hi fè yɨ̂ŋtì ha ghàn nâbi te Bâba tì fihi ghɨt a Isalì a ngə̂k yi lak yi Ijìb biyani a hì mô a yi bàm atɨ̂n wù kahi bobhi ghɨt a Isalì ghe a ghɨ tì faŋa hi bimî ha wûn.

⁶ Ghàn yɨŋti anjèlsu Fùyèn se a Yènfù tì ne, ghɨ kwut ghɨna nì chyaksu kə amok atɨ̂n à bɨn a finana beka su tì de luk we a Yènfù tì fo ha ghɨna hì khɨŋa luk wu ngaŋtenu. Yènfù nî, ghɨ kwut ghɨna, ghɨna mô hi faŋ kə a sù chyak nâ shyəma tuk wu saku bê kpen.

⁷ Ghàn fê kwakti kəbi tèk yi Sodòm nì tèk yi Gòmoliyà nì tèk tu le tê a tu ndùku bakhe a tu tèk afân. Ghàn lyi te chwèna te ghɨt a tu tèk mu tɨ̂n ndùku boŋa buma chyə kə yi chyə̂ te sù bwû ghê ywena, kôŋà nâbi ghə nê kə yi nî, ghɨ bobhi ghɨna nì wusu wu nê na ghɨna faŋ kə atɨ̂n te yi kɨ̂n ha ghɨt à jɨ̀m.

⁸ Ghɨt ghɨ̂n a ghɨ nyamte lye a ghàn a fùtɨ̂n ni boŋa nê kəbi ni. Ghɨna ni nè be nì wunu ghɨna kum gha ghe a ghɨna jìsà na ghɨna yena a sù jem. Gha atɨna ti nî ghɨna tunhe jyak a Fùyènà, sûlè anjèlsu Fùyènsu a nyə̂.

⁹ Nâbi Maykèl te wù mò a tô a anjèlsu Fùyènsu tà tì môm hi sùlè deblì te ghê yinì ndùku kəta gùfna kum gun yi Musìs. Wu tì bɨlì jis kə ha yinì na, “bâ Yènfù kântè wò.”

¹⁰ Biyani ghɨt ghɨ̂n mò jîsà gha a be kum gha ghe a ghɨna ywo, khɨle wi. Ghɨna khə gha kə yi kwàktì te nyamsu ghə̀nsù, a mô a gha mɨ ghɨ̂n a ghɨ bobhe ghɨna.

¹¹ Ngə̂k yì chìk mò a ghɨna a tû! Ghɨna ni chyə kə chyənà ye a Kên ndùku chyə shyəma wù ywi wâ nì. Ghɨna nyɨŋa kəbi yi bàm wu kâ te Balàm ndùku nyɨŋa. Ghɨna tunhi hi yu ha Yènfù kə te Kolà, fu hì mô hi bè bobhi ghɨna kə te fu tì bobhi wûn.

¹² Ghɨna ndokò hi yə mwə̀ mù yə̂mù chîntè nì ghàn, ghɨt mɨ ghɨ̂n hi mô kə te yi liŋ a ghàn a fùtɨ̂n ma ghɨ ti boŋ ben ndokò hì yə̂, wume wi. À nê hì mô wu yu mefû ghɨna kwâktè kə ngɨŋsu ghɨna su. Ghɨna mô ni te sù mbàk te fufa china, su chyâlà biyani bê wi nì wuli. Ghɨna mô ni te mu kâk mù tam biyani yu kpên, mu tê mu jə̀ tamu. Ghɨna mô te mu kâk te ghɨ shika chwokte ghaŋtu a chyə̂, mu kputi mihì.

¹³ Ghɨt mɨ ghɨ̂n ni mò kəbi te mòlû a jwô yì chìk, gha ghɨna a wumena ha mwə̀lû lôtè kwoka kəbi te wôŋlù jwô wu ta a wu yu afa fufa china. Ghɨna mô ni te mu jên, mu buma yine mô kə yi mô, ma Yènfù ti de wu lùk wu fina kə ni na mù faŋ afû kə amok.

¹⁴ À tì jis Enòk, ma wù hì bênà à ghɨt sàmba yi bàm kə hi yìmì a Adàm wu tuk na, “Ghàn yen, Bâba wu bênà ghê anjèlsu wunsu yulesu, su dô kə ni,”

¹⁵ ghɨ hì saka kə ghɨt à jɨ̀m hi chwùtè banhe a gha be ghe a ghɨna nè, nì jîs yi be ye a ghɨt a gha be mɨ ghɨ̂n jìsà kum wûn.

¹⁶ Ghɨt mɨ ghɨ̂n faŋ hì dumlè kə yi dûmlì, ngane kə yi nganî ghɨt ale. Ghɨna ni nè kə a gha ghe a kwâktì tu ghɨna tu chwùtè, a dûtè kə yi jîs yi ghaŋhini wùni a ghɨna yi jwô. Ghɨna lehe jìsà jîs yi fomani hi tè fye mwə̀ mù ghɨ̀t.

¹⁷ Biyani, a mô ha ghàn a sun sam su jûŋ sù, ghàn kəta hi kaha kwàktè gha ghe a ghɨt a tuma Bâba ghàhnà Jisòs Klistù ndùku jîsà na kə yi bè gânà.

¹⁸ Ghɨna tì jis na, “Tuk mù gòkhemù bè bênàlò ma ghɨta fwu ma ghɨ hi lehe ghàn, a mô à ghɨ̂t chyə̂ kə te njyàsu wùnsu ghɨna su khɨŋa.”

¹⁹ Ghɨt mɨ ghɨ̂n mô à ghɨ̂t, bênà nì jyàhînì, kəta wi Yohnà Fùyènà a ghɨna fùtɨ̂n, a tihe kə kwâktì tu betu ghɨna.

²⁰ Biyani, a mô ha ghàn a sun sam su jûŋsù, ghàn kəta hi tè gàmtè a ngɨŋ sanisu hi tè ləmâ a ghàn a yi bimî, a mô yi bimî, yule kpenê. Ghàn shihi jə̀m, ghàn jis Yohnà Yulena hi tihe ghàn.

²¹ Ghàn hi chyə̂ chyənà sanisu, khə hamok na Yènfù kòŋàlò ghàn. Ghàn hi gbùtè hi khɨte chyənà ye a yì bè mê wi te Bâba ghàhnà Jisòs Klistù kwohe seni fo ha ghàn.

²² Ghàn hi kwohe seni ha ghɨt ghe a ghɨ kante yi kantî gha ye a ghɨ bime.

²³ Ghàn hi sâkà ghɨt ale, fihe ghɨna wu wùs shyəma ghɨna bon. Ghɨt ale mò kəbi a ghàn a fùtɨ̂n, ghàn kəta hi tè kwohe yi sen ha ghɨna. Biyani ghàn hi tôknè ghàn a ghɨt mɨ ghɨ̂n kum a gha a njyàsu wùnsu ghɨna su, bu ya ma ghɨ finhi ghàn.

Jə̂m yi gokheni

²⁴ Ghàhnà hi kokhe Yènfù. Fu kəta jyaka hi khɨte ghàn na kə ghàn fen, kəta a jyak hi nì na ghàn yulê kpena, ma ghɨ hi kəta wi lɨŋi nâ hakoh, fê kəta a jyak hi lèmà ghàn a wun a fùtɨ̂n à yi ban yi chiki, na saŋlî yi chiki hi mô ha ghàn.

²⁵ Ghàhnà hi kokhe Yènfù. A mô kə wûn wù mòk a wù mò Fùyèn. A bônhè wun ghàhnà tohne a Jisòs Klistù Bâba ghàhnà. Kokhînì yen ha wun nì ngumlînì. Yèn fe a fu saka ghàhnà mô fə̀n, kəta a jyak a yû mù jɨ̀m. Yi mô chîn kə yi ghəl te yi ndùku mô ashyə̂, mô hi tê mò kə ni a mu yu mù jɨ̀m. Àmèn.

« Vorige

Volg ons:

Geborgde skakels

Advertensies