Aanlyn Bybel

3 Jon 1 - Ŋwàklù Fùyèn Kàn Mù Fê (Cameron)

¹ À nyak mu chəh à ndâ Fùyèn ŋwàklù yina ha sô mù Gayùs we a mu kòŋà hamok.

² Mu jə̀mà na nâbi ghə hi yênà kə a jûŋ ha wò a sô mù, fê jə̂mà na wò hi mô kə nâ wu wun wu tâ kəbi wu lum afa a wò mô atɨ̂n à yohnà.

³ Wana ne ghɨ le tì ben fôktì ha mu na wò nè kə nâ gha ye a yi mô hamok, time kə a tô gha afa a ghɨ mô hamok, mu hì saŋle nâ haŋaŋ.

⁴ Gha yile wijə a yi mô hi nì, ma mu fê tokâ saŋli chyâ hi yu na mwəlà mâmù mò kə a tô yi gha afa a yi mô hamok.

Jon bəmhi Gayùs

⁵ Wo fate nê kə nâ fêt ya ha wana ne a sô mù, nâbi wu yu afa ghɨna mò à ghɨ̂t wo khə wi.

⁶ Ghɨna ti fôktì kôŋ ya ha nòn à ghɨt a bimena ghe a ghɨ mô afân. Mòmhi a jûŋ wu lum afa wu kokne a Yènfù ashyə̂, hi nì na gbî ghɨna jwof.

⁷ Wò nè ni, beka ghɨna ti fwu hì gbê nê yênà nì fêt yi Klistù, nê ni, bime wi gâmtìnì ma yi lo ha ghɨta teka ghɨna bimi.

⁸ Yi chwûtè na ghàhnà ghɨt a bimena kəta hi tè gàmtè nki ghɨ̂t mɨ ghɨ̂n kə nâ a jûŋ shyəma ghàhnà hi chîntè fêtà a tô gha afa a yi mô hamok.

Dàyotifìs ghê Dèmitɨliyùs

⁹ Mu ti nyak ŋwàklù ha chìntê ghɨt a bimena, biyani Dàyotifìs we a wù kòŋà kə hi tê mò a tû, tunhi hi yute gha ye a mu jìsa atɨ̂n.

¹⁰ Mu nè bênà nâbi yini ma mu fokti gha ghe a wù nè. Mu nè fôktèlò gha a bəmana ghe a wù jìsà kum ghàhnà nì fəm ye a wù wama. Wu nê ni, yi mê wi kə ni. Wu tunhe hi tè fye wana ne, fê tâmtè ghɨt ghe a ghɨ khɨŋa hi tè fyî, jûmà fihe ghɨna a nòn a ghɨt a bimena.

¹¹ Kə wò bè sine gha yi be a sô mù, wo bɨlà sine kə yi jûŋì. Nâbi nde we a wù nè gha yi jûŋì mò ghê Yènfù amok, we a wù nè gha be mò teka wù timè yen Yènfù.

¹² À bè nâbi nde jîsà kə a jûŋ kum Dèmitɨliyùs. Wu chyə kə nâ a jûŋ kə te gha Fùyènì ye a yi mô hamok chwùtè. Nâ ghàh boŋa jîsà kə a jûŋ kum wûn, wo khə na gha ye a ghàh jìsà kum wûn mò kə nâ hamok.

Toŋtî yi gokheni

¹³ Mu kəta a gha hi jìs ha wò ghɨ dô kə ni, biyani kôŋà wi hi nyàk yi nyâk gha mɨ ghɨ̂n.

¹⁴ Mu kwàktè hi bèn hi yen a wò kə a mu tuk afân. Mu bênà ma ghàh à wò biti gha atɨna kə nâ nì jwo.

¹⁵ Yutìnì Fùyènì hi mô ha wò. Sunsu ghàhnà se a su mô afân chinhe toŋtînì ha wò. Toŋti ha sun se a su mô afâ kə wù mòk wù mòk.

« Vorige

Volg ons:

Geborgde skakels

Advertensies