Marko 3 - NTSHOB NSI

Mèn ze bu i jum nà

¹ Yésu bèn ntsho ntùm sinagogue; mo' mèn be bwe ndù bu i jum.

² Bo nke nte miag num Yésu num neyen a be z'a yate mèn lé' Sabbat là, bo tshùa bwe kà mbot'é.

³ A tshob mèn ze bu i jum nà ndù: Lo tù netèt bag!

⁴ A tshob bo ndù: Ntshù' bam neghù numebwô ke nukebwô lo lé' Sabbat, neyôg mèn ke nezwi i à? Là bo mi ntswe.

⁵ A lôte yub nja ntù, nywin neshu, nummbe bo lo ke ghù kondèn, a tshob mèn nà ndù: Nyit bu o! A nyit bu i, bu i bèn mbe mal i.

⁶ Ba Férésia be tum be ndùse, ngù ntse'te boa ben Hèrodé num nediag mba bo nsi tshùa kà zwi Yésu là.

Mba Yésu tsho' ghazi'te nu i ntshob bàa gham nà

⁷ Yésu boa ghazi'te nu i bèn njam kaṅ dibantse; mo' mà bwoṅ benntùn fe Galiléa ntam njam i. Mo' mà bwoṅ benntùn bèn mbe ju' nu i, ndo mba Yudéa,

⁸ Yérusalém, Iduméa mba ntùm ngô ts'a na' mbe mbwe Yordan mbaṅ Tiro mba Sidon nà, nse' ntèl i.

⁹ A tshob ghazi'te nu i ndù bo nabte kenu yi ndù a tswe bwe kà benntùn fél i, nummbe bo lo yàme.

¹⁰ Mb'a ke njate benntùn yàm nà, njoṅ benntùn fa tse bo na' ntswe nge' là kù nde nèn mbaṅ i, ndiag nekwag i.

¹¹ Ba ywètkebwô be yen i, ngwù nsi mbwe i, nkua' neta, ntshob ndù: O b'a Mén Nsi.

¹² A tshù' yub ndù kà bo ghù benntùn lèn i.

¹³ A ko' num mbale, ntsiaṅ ben tse tu wul i kô là, bo se' ntèl i.

¹⁴ A tsho' ben ntu ntshob bàa gham bo à bo ke ntswe, a ghù ntum yub bo nèn ntshob ntshob Nsi,

¹⁵ ngù ngù' neta' ywètkebwô yi.

¹⁶ A tsho' yub ntshob bàa gham: Simon z'a tswi lén se ndù Pétro là,

¹⁷ Yakobo mén Zèbèdéo mba Yohané mfèl Yakobo, a tswi sub lén ndù Boanergés, yen nà bagt'a ndù bon fambaṅ,

¹⁸ mba Andréa, Filibo, Bartélémi, Matio, Tomas, Yakobo mén Alféo, Tadéo, Simon mén la',

¹⁹ mba Yuda Iskariot z'a na' nswèn i là.

Nukebwô num Ywèt Nelàne

²⁰ A bèn mbèn njam ntùm ndà. Bwoṅ benntùn bèn nse' yi yàme, boa ghazi'te nu i ke ku' nejù mba jujù.

²¹ Ngelaṅ tunndà i ju' là, bo se' netshùb i, nummbe bo lo ke ntshob ndù tu i ke' bwô.

²² Ghalèn ṅwa'ni Nsi tse bo na' mfe Yérusalém nà tshob ndù: A ghù Bèèzèbul, mba ndù: A ke nta' ywètkebwô à num lén mfen ba ywètkebwô.

²³ A tsiaṅ yub mbaṅ i, ntshob tsemo' tànkùt bo ndù: Be Satan ta' Satan à ndùke?

²⁴ A be ze nufen ghabte wul i là, mba yen nufen nà ke' ku' netswe.

²⁵ A be ze tunndà ghabte wul i là, mba yen tunndà là ke' ku' netswe.

²⁶ A be ze Satan ma' tu wul i ntsho, mbèn ngabte wul i là, mb'a ke' ku' netswe, là mb'a mi.

²⁷ Sàm mèn ke' ku' netsho ndà mèn neta, ndagte tshu tse, a be z'a ke' bwôgmbwe nkut yen mèn neta là, kà njôg ndagte ndà i là.

²⁸ Kua' nenùne me tshob bin ndù: Njoṅ nukebwô fa mba tshabte fa tse bon benntùn num ngù là, bo nsi lagte bo,

²⁹ là mèn z'a nsi tshabte Ywèt Nelàn nà, mba bo ke lagte tse yi, a vù ntsha yoṅ ntshù'.

³⁰ Nummbe bo lo ke ntshob ndù: A ghù ywètkebwô.

Mà Yésu mba fèt tse

³¹ Màab mba fèt tse se', ntswe njù, ntum benntùn mbaṅ i, bo tsiaṅ i.

³² Bwoṅ benntùn tswe mbaṅ i, ndiaṅ i mbume, bo tshob yi ndù: Tshù, màan mba fèt tsho tse bandum mba tse bènnzwi num njù nke ndiag o.

³³ A bùnte, ntshob bo ndù: Màa b'a we? Fèt tshàm b'a ba we?

³⁴ A lôte njoṅ benntùn fa tse bo diaṅ i mbum nà, ntshob ndù: Tshù màa mba fèt tshàm ni!

³⁵ Mèn z'a ghù ju ze Nsi kô là, mb'a b'a mfèl àm ze mandum mba mfèl àm ze mènnzwi mba màa.