Марк 1 - Сыйлы Инжил бла Забур

Ахия файгъамбарны келиую

¹ Аллахны Уланы Масих Иссаны юсюнден Хайыр Хапарны башланнганы.

² Файгъамбарланы китапларында: «Ма, Мен билдириучюмю Сени аллынгда иеме, ол а Сени аллынгда жолунгу хазырлар»;

³ «Къум тюзде къычыргъанны ауазы: „Раббийге жол хазырлагъыз, Анга тюз ызла этигиз!“ дейди», – деп жазылгъаныча,

⁴ Сууда Кёмюлдюрюучю Ахия къум тюзде кёрюндю. Ол, гюняхла кечилир ючюн тобагъа къайтышып, сууда кёмюлдюрюлюрге керекди деп ууаз бере эди.

⁵ Битеу Иудея къыралны халкъы да, Иерусалимлиле да анга келип, бары да кеслерини гюняхларын айтып ачыкъ эте, анга Иордан сууунда кеслерин кёмюлдюрте эдиле.

⁶ Ахияны кийими тюе жюнюнден эди, белинде белибауу да териден эди, ашы да мачала бла чегет бал эди.

⁷ Ол: «Мени ызымдан менден Кючлю келеди; мен ийилип Аны аякъ кийимини бауун тешерге тийишли да тюйюлме.

⁸ Мен сизни суу бла кёмюлдюргенме, Ол а сизни Сыйлы Нюр бла кёмюлдюрлюкдю», – деп ууаз бере эди.

Исса ишин башлайды

⁹ Сора ол кюнледе Исса, Галилеяны Назарет шахарындан келип, Ахиягъа Кесин Иордан сууунда кёмюлдюртдю.

¹⁰ Исса суудан чыгъа туруб’а, олсагъат кёкле ачылып, Сыйлы Нюрню, кёгюрчюн кибик Кесине тюшгенин кёрдю.

¹¹ Сора кёкледен: «Сен Мени сюйюлюннген Уланымса, Мен Санга ыразыма», – деген ауаз келди.

¹² Андан сора мычымай Нюр Аны къум тюзге элтди.

¹³ Исса анда къум тюзде, шайтандан сыналып, къыркъ кюн турду, жаныуарла бла болду. Анда Анга мёлекле къуллукъ эте эдиле.

¹⁴ Ахия тутулгъандан сора уа, Исса Аллахны Патчахлыгъыны юсюнден Хайыр Хапарны билдире, Галилеягъа келди

¹⁵ Эмда: «Заман жетгенди, Аллахны Патчахлыгъы жууукълашханды: тобагъа къайтышыгъыз эм Хайыр Хапаргъа ийнаныгъыз», – дей эди.

¹⁶ Галилея кёлню къаты бла озуп бара туруб’а, Шимонну бла аны къарындашы Эндрейни, кёлге чабакъ ау ата тургъанларынлай кёрдю. Бу адамла чабакъчыла эдиле.

¹⁷ Сора Исса алагъа: «Мени ызымдан келигиз, Мен сизни адамланы тутуучула болурча этерме», – деди.

¹⁸ Ала да олсагъат, чабакъ ауларын къоюп, Аны ызындан тебиредиле.

¹⁹ Сора, алайдан бир кесек озгъанлай, Ол Зебедейни жашлары Якъупну бла Ахияны кёрдю. Ала да къайыкъда чабакъ ауларын жамай тура эдиле.

²⁰ Исса олсагъат аланы чакъырды. Ала да, аталары Зебедейни ишчилери бла къайыкъда къоюп, Иссаны ызындан тебиредиле.

Исса харам нюрлени къыстайды, ауруулуланы сау этеди

²¹ Сора Кафарнахумгъа келдиле. Шабат кюн Исса, мычымай синагогагъа кирип, юйретип башлады.

²² Аны юйретиуюне сейирсине эдиле, нек десегиз Ол аланы дин алимлеча тюйюл, къудурети болгъанча юйрете эди.

²³ Аланы синагогаларында харам нюрю болгъан бир адам бар эди, ол къычырып:

²⁴ «Къой бизни, Назаретли Исса! Сени бизни бла не ишинг барды? Сен бизни жояргъа келгенсе! Сени ким болгъанынгы билеме, Аллахны Сыйлысыса!» – деди.

²⁵ Исса уа: «Тын, бу адамдан чыкъ!» – деп харам нюрню тыйды.

²⁶ Харам нюр, аны къалтыратып, уллу ауаз бла къычырыкъ этип, аны ичинден чыкъды.

²⁷ Сора бары да сейирсиндиле, алай бла бир-бирлерине: «Бу неди? Неди бу жангы, къудуретли юйретиу? Ол харам нюрлеге да буйрукъ этеди, ала да Анга бойсунадыла!» – деп сора эдиле.

²⁸ Сора терк окъуна Аны юсюнден хапар Галилеяны битеу ол тийресинде жайылды.

²⁹ Кёп турмай синагогадан чыгъып, Якъуп бла эм Ахия бла, Шимонну бла Эндрейни юйюне келдиле.

³⁰ Шимонну къайын анасы уа къызыу ауруп жата эди эмда олсагъат Иссагъа аны айтдыла.

³¹ Исса, аны къатына келип, къолундан тутуп къобарды. Тиширыу къызыу аурууундан олсагъат сау болду эмда алагъа шапалыкъ этип башлады.

³² Ингир болгъанда уа, кюн батхан заманда, Иссагъа битеу ауругъанланы бла жинлилени келтирдиле.

³³ Битеу шахар эшиклени аллына жыйылды.

³⁴ Анда Исса кёп тюрлю аурууладан къыйналгъан кёплени сау этди, кёп жинлени адамладан къыстады эмда, Ол Масих болгъанын билгенлери себепли, жинлеге сёз айтыргъа къоймады.

³⁵ Эрттенликде уа бек эртте туруп чыкъды да адам болмагъан жерге кетип, анда тилек эте эди.

³⁶ Шимон да, аны бла болгъанла да Иссаны ызындан бардыла.

³⁷ Эмда Аны табып, Анга: «Бары да Сени излейдиле!» – деп айтдыла.

³⁸ Ол алагъа: «Жууукъ эллеге бла шахарлагъа барайыкъ, Мен анда да ууаз берейим, нек десегиз Мен аны ючюн чыгъып келгенме», – деди.

³⁹ Сора Ол битеу Галилеяда аланы синагогаларында ууаз берип жюрюй эди, жинлени да къыстай эди.

Исса келепен ауруулу адамны сау этеди

⁴⁰ Анга келепен ауруулу келип, Анга жалбарып эмда Аны аллында тобукъланып: «Сюйсенг, мени тазаларгъа болаллыкъса», – деди.

⁴¹ Иссаны анга жаны ауруп, къолун узатып, анга тийип: «Сюеме, тазалан!» – деди.

⁴² Ол сёзден сора келепен ауруу олсагъат андан кетип, ол тазаланып къалды.

⁴³ Исса анга къаты айтып:

⁴⁴ «Сакъ бол, бир кишиге бир зат айтма, алай а барып, дин къуллукъчугъа кёрюнюп, тазаланнганынг ючюн, адамлагъа шагъатлыкъгъа, Муса буйрукъ этген къурманланы элт», – деп олсагъат аны ийди.

⁴⁵ Ол а, чыкъгъанлай, болуннганны хар жерде жайып билдирип башлады. Ол себепден Исса энди шахаргъа ачыкъ киралмады, алай а тышында, адам болмагъан жерледе турду. Ары Анга хар жерден адамла келе эдиле.