Luke 21 - BAṈARA KO VAIRU AMA LEVELEVEO

Naboko ko katizato

¹ Ni Jisu ta o tadatake ni o meake se batiro amu ke pikani seko seleni Jelepade kale sai kekai katizatako zaekale,

² ni vota mata o keake kama pado matu ozaoza kama naboko koko pikako omuqa diri seniti.

³ Sai nio vota eri kiolake, “Aṉata a bazuemela me, komia ozaoza kama naboko ko vaekako ta kobe kai paloasa sea kiadamu ke vaekako.

⁴ Ako seta ke vaeka sole kama kobu pala seko batiro, melai komia naboko ta koko ozaoza kale kota ko puarika pado ama koko ṉeamuzato sole,” kiolake.

Jisu kai bazuto Jelepade ko biresuko

⁵ Ni kake Jisu ko disaipeli madu ta kekai pesipesitake koa Jelepade, koko kelo ta matu uria keloma ni matu ileile ama koko lado poso ni koko zalozaloni se maba poso ke puarikema tu kevai rauraeko vo Baṉara. Melai Jisu ta eri ma kiolake,

⁶ “Kiadama komi quli meme qeako ta ko kilo ama taku kale ta puliama ka pado otu ko lado ta kopa loilou ko ṉaviko zaekale, melai koa kiadama ti kana madu inio ke biresukou,” kiolake.

Tapata ni naqunaquto poso

⁷ Ni seta ke kuimaevake vo ni eri kikelake, “Lekasa, noi keru inio ko quli ta ko ereilou? Ni loma quli mamola ikio ko elo ama tu ko mamola pueko koko ereilo ama quli?” kikelake.

⁸ Nio Jisu ta eri kiolake, “Balauvomo, tu puliala ta o lipalipaemelou me. Ako matu kubo maba madu inio ke kilou ni eri kikevou, ‘Aṉa inio voa Pakio vo Baṉara o pitoevani lala!’ kikevou, ni Taku ta lula kota baroa!’ kikevou. Melai meta pui me luluemou se.

⁹ Ni so keru meme viqou keru ko matuma pazokinio ko bazu ni ke navio kude kanaekinio ko bazu melai meta pui me ṉalou, ako ko quli poso ta kota ereilou kuleto, melai kota pui ko kasekako ikio peuru ma peuru ko paitopaito ko taku ta sipole kota barou kio,” kiolake.

¹⁰ Ni vota obeta olake pesio ni eri kiolake, “Matumatuma peuru poso ta ko kati pazokiniou kama edoloma matumatuma peuru poso ni toutou poso ta kokai kasakeovou kama edoloma toutou poso.

¹¹ Ni matuma nunu ta kota elou, ni nioṉe ni ave poso komia kiadakoi, ni aqasiele ama quli ni ṉaloṉalo ama quli ta kota kilou aukale azo.

¹² Ni puliako koa kiadama quli elo nio se maba madu ta ke kilou ni ke noqoemelou me ni ke niumaniumaemelou me, ni seta ke melati ziovou titizikinio kale ilusato ko pade kale ni seta ke vaemelou me pirito pade kale. Ni seta ke melati ziovou me se aikovakova poso ni qavuna ko matuma maba poso ko kuleto ako meta aṉa me luluelani mela sole.

¹³ Soama taku kale inio meta meqai bazutou ko Uri ama Bazu sea maba madu kasi.

¹⁴ Meta vatoekomo meko bulo kale tu meta pui niuniala meqai elou ko quli me koqo meqai iko ama ko quli ko melai kuiriziovo ama,

¹⁵ ako aṉata a qatimelou me ko pesio ni uri ama kerukeru sole ko puliala kala pado mevo kana opa roveovo ama lipato tamela iko ni tamela tizaeko.

¹⁶ Meko niania ni mama ni visi ni kaka poso ni meko mabamu ni meko baerebaere poso ta ke melati ziovou ni ke vaemelou meko kana madu ko pizato kale. Ni kake mela me ta ke vouvaemelou,

¹⁷ ni kiadamu ta ke melai kaikuapou, ako meta aṉa me luluelani mela sole.

¹⁸ Melai puliama kama pado meko lezu kale ama tou ka lava ta kopa tamela zopuliovou.

¹⁹ Meta pizaka lojo emo meko oqu kale nio meta me qovou ko noqola kama saevo,” kiolake.

Jisu kai bazuto Jerusalema peuru ko biresuko

²⁰ Ni Jisu ta mata eri kiolake, “So keru meme qelou keru ko Jerusalema pazokinio ko maba madu ke qoloekou keru, inio meta meqai nianiiovou ta kota sipole inio kota biresukou kimevou.

²¹ Nio se Jiudia peuru poso kale ke evani ta ke soqoilou sopu poso kale, ni se koa Jerusalema peuru kale ke evani ta ke soqoilou, ni koa matu peuru ko kupekupe ke evani ta pui kepa kai amaqeovou ko.

²² Ako koa taku kale inio vo Baṉara ta o koqotaemou se maba poso tu ko Tabu ama Riki kikolani ta tuvevo ko elou.

²³ Matuma duki sama quli se molu ama niania poso kasi ni se molele meqora poso samu kasi ko ereilo ama koa taku kale! Matuma upotuqu ni tapata ta ko ereilou koa peuru kale, ni vo Baṉara ko koqotato ta ko movou sea maba poso.

²⁴ Kake sea maba poso ta ke vouvaemou benisi kale, ni kake ta ke mati ziovou piripiri amu kiadama matumatuma peuru poso kale. Ni se pui Jiu amu ta kekai lekasa puovou ko Jerusalema ti kobeta okotou vo Baṉara oma zariekake taku tu ke lekasa puo,” kiolake.

Aṉa maba a eveni lala ko vaito

²⁵ Ni Jisu ta mata eri kiolake, “Kama mamola ta ko ereilou ṉaniu ni kaboso ni Suti poso tona. Ni se peuru ma peuru kale ama maba poso ta keta ka ṉalou ko ivere ni koko qeo ko ovaṉo.

²⁶ Se maba poso ta kuroumamaru keta elou seko ṉalo kale seko tareko kale koko kilo ama quli pado ama peuru ma peuru kale, ako kiadama pizato poso aukale ama ta ko vezovezokatou sole.

²⁷ Ni koa taku kale inio aṉa maba a eveni lala ta a buratou, ni aṉata a qilou lei ko valuvalu ni se maba poso ta ke lelou aṉa aṉako matuma pizato ni ṉaṉaidara sase.

²⁸ So keru ko quli ko tanitou keru ereilo, meta me lojolou ni me dadatikou meko lezu poso, ako meko pakiezato ko taku ta sipole sole,” kiolake.

Piqi ore ko podepodeti

²⁹ Nio Jisu ta omai bazuekake se komia podepodeti ni eri kiolake, “Meta kerukeruekomo ko piqi ore ni so jari kiadama ore poso.

³⁰ So keru me meda ka kea keru koko vairu ama vezuvezu, meta mebe kai nianiia inio ta koa taku kiadama quli ko qotupo ko ta sipole inio kio.

³¹ Omadeuvo so jari nio, meta me qelou kiadama quli ta so ko kalou, ni meta meqai nianiiovou ta vo Baṉara ko lekasa puo ta sipole kota barou kio.

³² “Tuvevo avole aṉata a bazuemela me, kiadama komi quli poso ta ko ereilou puliako se erisaṉama maba poso vou.

³³ Au ni miduku ta kota ruvurou, melai aṉako bazubazu ta maba pui ti pui kopa ruvurou,” kiolake.

Taku kati vailo

³⁴ Ni Jisu ta mata eri kiolake, “Meta vailomo! Pui kai mumuasa puilo ko ṉojola ni nozueko ko piza kama ju ni tiṉoliṉoli kai elo komia taku ama saevo ko quli, ako pui uri tu koa matuma ṉaniu ta taukavole ko melai baro

³⁵ omadeuvo sipata jari. Ako koa ṉaniu ta ko barolou kiadama maba peuru ma peuru ke evani kasi.

³⁶ So sole meta vailomo ni ka vararaitomo kiada keru ko pizato tu meta me bakiovou kiadama ko quli ko ereivako quli kasi azo, tu meta me lojolou aṉa maba a eveni lala ko kuleto,” kiolake.

³⁷ Ni ṉaniu poso kale inio Jisu ta o nianiiekatake Jelepade kale, ni ipu poso kale nio vota ota saqorake sai kazo ni ota evake Olive Ore sama Sopu kale.

³⁸ Ni kiadama vikale poso kiadama maba poso ta ke olake Jelepade kale didievole vo.