1 Jone 5 - BAṈARA KO VAIRU AMA LEVELEVEO

Vai oqu vo Baṉara vo Meqora

¹ Ako kiadamu se tuvevo ke ivo amu vo Jisu inio vo Baṉara o soroeveni Pakio kikevo amu, se inio vo Baṉara ko meqora poso. Ni vo o roquevani vo Mama, vo inio mata o roquemani vo Mama ko meqora poso.

² Eri kale inio animeta meqai nianiia ta animeta me roquema vo Baṉara ko meqora poso. Animeta meqai nianiia ko, ako animeta me roqueva vo Baṉara, ni me zorika sole voko bazu.

³ Roquevo vo Baṉara ta zoriko voko bazu. Ni vo Baṉara ko bazu ta pui tapata kama anime kasi.

⁴ Ako animea kiada mela vo Baṉara ko meqora poso mela ta pizato samela sole tu me qoqotaeko komia peuru ma peuru ko ruqe. Ni animeko tuvevo puevo kale vo Jisu inio animeta koqo me ikou ko peuru ma peuru.

⁵ Ako vo tuvevo o ikani ta Jisu ta vo Baṉara vo Meqora, vo inio vo koqo o ikani ko peuru ma peuru sole.

⁶ Ni vo Jisu Karisito inio o kuevini ni kasa o mela eveni anime voko bapitaiso ko jukale ni mata voko vou ko dara kale. Vota pui kasa opa eve ju ko kiada kale, melai vota kasa o eve koa omuqa quli kale ju ni dara kale. Ni vo Tabu ala Auvana inio o bazuemela ta komi quli ta tuvevo ama, ako vo inio vo tuveano sole.

⁷ Ni zouke quli kio kasa ko ivako vo Jisu:

⁸ vo Tabu ala Auvana, koa ju, ni koa dara. Ni nia zouke ta omadeuma ikio seko bazu anime kasi ama.

⁹ Animeta tuvevo me ika maba poso ko bazu seke melai bazueka keru seke keako quli. Melai Baṉara ko bazu ta kota ka qulepa maba ko bazu, ako vo inio o melai bazueka sole ko tuvevo ama quli vovo Meqora kale avo.

¹⁰ Ni vo tuvevo o ivani vo Baṉara vo Meqora, vo inio koa qulepo ama bazu sala voko bulo kale ko vo Baṉara o melai bazuekako. Melai vo pui o tuvevo putani ta ovai kuirika vo Baṉara ta lipalipa kala, ako vota pui tuvevo o ika sole vo Baṉara o melai bazuekako vovo Meqora kale avo.

¹¹ Ni komi quli kio vo Baṉara o melai bazuekako anime: vota o katimele ko noqola kama saevo, ni vota o katimele koa saevo animeko vai oqu kale vovo Meqora.

¹² Vo o ṉeamuvo ala vo Meqora nio o kovou koa saevo. Melai voa maba vo pui o ṉeamuvo ala vo Baṉara vo Meqora ta pui opa kovou koa saevo.

Erisaṉa animeta noqola kama saevo samela

¹³ Aṉata a rikieva nea riki mekasi me tuvevo me ivani mela vo Baṉara vo Meqora kasi. Ni aṉata a mela rikita tu meta meqai nianiiovou ta erisaṉa ta meta noqola kama saevo samela.

¹⁴ Ni animeta me barani putou animeko vararaito kale vo Baṉara ko tanama kale, ako tuvevo me iva ta vota ota mela viqou animeko paseto sama vararaito sole, koa paseto ko luluekou keru voko vatolo.

¹⁵ Ako vo Baṉara ta o didiemela anime kiadama taku so keru me baseva keru, sole animeta meqai nianiia ta vota o katimela ko quli me basekako quli vokasi.

¹⁶ Esa kala ta o velou vovo lolo Karisito kale ala o saruekou, melai koa sarueko ta pui kopa odievo ama ikio noqola kama voukale, ta voa maba ta o vati vararaitou vovo lolo vo o saruekani, ta Baṉara ta o kativou ko saevo voa maba. Aṉata amai pesipesita se maba poso seko sarueko pui kopa odiemo amu noqola kama voukale. Ikoana ko sarueko koko odiemako noqola kama voukale ni vo o erekani ko ta pui me vati vararaitou.

¹⁷ Ereko ko saruilo, ta kiada keru ti boutare ikio. Melai ikoana kama boutare ko pui kopa odiemelo ama noqola kama voukale.

¹⁸ Ni animeta meqai nianiia ta se lula Baṉara ko meqora poso ke evani ta pui kebeta olani ereko ko boutare. Ako vo Baṉara vo Meqora ta o mati vaila sole, ni vo Setani ta pui opa niumaemou se.

¹⁹ Vo Setani ta okai lekasa pua komia pado ama ruqe ama peuru ma peuru, melai animeta meqai nianiia ta animeta vo Baṉara ko mela.

²⁰ Ni animeta meqai nianiia ta vo Baṉara vo Meqora nio o kuevini ni o katimeleni ko bokao tu animeta me mamuro, sole animeta mevai nianiia vo tuvevo ala Baṉara. Nio erisaṉa animeko saevo ta Baṉara tona ni o Meqora Jisu Karisito tona. Ni vo Jisu inio tuvevo ala Baṉara, ni vo inio o katimelani ko noqola kama saevo.

²¹ So sole a meqora poso, meta tama balauvomo se lipalipa kama baṉara poso!