Mark 4 - l'taamitsinikssin Mark manistaitsinikatoohpiayi 1972

Jesus isskska̱nistsiiwaiks ma̱hkanistsapipo̱mmaahpiawa Jesus uses planting as an example

¹ Jesus ma̱ttsitomatapi̱tssksinimaatstohki omi̱ o̱mahksikimi Galilee. Iiko̱maisskaohkoaawa iitsi̱tssapa̱oowa a̱a̱hkioohsa'tsisi. Kakohto'tsaakapa̱i'poatsiiwaiksi omi̱ a̱a̱hkioohsa'tsisi, ki o̱tapiy'ssina itohka̱naissa̱o̱piwa.

² Iika̱kawoyi otssksinima̱atsaahpiaiksi ki o̱tsskskanistahpiaiksi.

³ Iihtsita̱i̱tsinikoyiiwaiksi omi̱ ni̱naayi a̱i̱sapipommayini napayi̱i̱nin'ssimaan.

⁴ Omi ita'wa̱a̱niita'piksim omi̱stsi napayi̱i̱nin'ssimaani istsi̱kiistsi o̱mika moohsoko̱yika itsi̱tohpi'yawa, ki pi'ksi̱i̱ksi itso̱watoomiawa.

⁵ Istsi̱kiistsi o̱mi otsi̱takayoohkotoksko otsi̱tsi'naksksaahkoa'sspi itohpi̱'yi; omi̱stsi iihtsa̱pipommaopistsi iihtsi̱kkam'ssaisskii otsa̱yi̱pisttanistsissawa.

⁶ Annimayi ota̱i'tapo̱mayiksistoyissawa omi̱stsi sapipo̱mmaanistsi iitsika̱nipittsiyawa iihtsitsi'tsiiyawa

⁷ ki anni̱stsi iihtsa̱pipommaopistsi iitsi̱tsspiopi'yawa ksisi̱i̱ksi; omi̱ksi ksisi̱i̱ksi sta̱mito'tsitska̱kawoyi ki omi̱stsi saapipo̱mmaanistsi iihtsi̱tsa̱wattssaisskiiyi ki iihtsa̱wayiina'siyawa napayi̱i̱nin'ssimaani.

⁸ Kii, istsi̱kiistsi iihtsa̱pipomaopistsi itohpi̱'yi o̱mi itsi̱tssoka'piihpi isksa̱a̱hkoi. Itoma̱tapssa̱i̱sskiyawa, ki noohki̱tsspssa̱i̱sskiyawa ki itsi̱i̱na'siyawa napayi̱i̱nin'ssimaani; istsi̱kiistsi o̱mistsi mi̱i̱nistsi niiyi̱ppoyawa, istsi̱kistsii na̱aippoyi, ki istsi̱kiistsi kiipi̱ppoyiina'si.

⁹ Ki oma̱ Jesus itani̱stsiiwaiksi, “Ikkamohkotta̱yoohtsimiinoaainiki, i̱sstsiiwokika!”

Tsa̱ anista̱piwa Jesus omohta̱i̱sskskanistahpi mata̱pii Why Jesus taught people with parables

¹⁰ Ma̱tsissamowa, anni̱ksao'ki noohka̱yisstsiyiks annisk Jesus iitohpo̱'kiiwo̱o̱yaw anni̱ksi na̱a̱tsikopotsiks ma̱hkitsitapoohsaw annisk Jesus ota̱i'tsitaopissi. Ota̱i'to'toohsawa, iitani̱stsiiyawa̱yi, “Noohkso̱poya'panikkinnaan anni̱hka kitsskskani̱ssini.”

¹¹ Ki oma̱ Jesus a̱'nistsiiwaiks, “Ksiisto̱waawa, kita̱akssksinima̱atsootsspoaawa manista̱o̱kakihtsimaahpi A'pistotookiwa. Istsi̱kiiksi mata̱piiks ma̱taotsistapi'tsi̱maiksawa̱yi; a̱i̱stsina'yisstsiwakatomiawa isskska̱nissiists.

¹² Ota̱a̱niihpi Isaiah a̱i̱ssksa̱omana'siwa: Imaka̱i̱ssksa̱apasskisawa ma̱hkotsistapi'takssawa, ma̱taisska̱akohkottsissinootsi̱maiksawai atsistapi̱'takssini; ikka̱mohkottotsistapi'ta̱kisawa, a̱konai'tsinihkatsimatsiyawa A'pistotookiyi, ki ota̱kitsissiinomookoayawa̱yi opahtsa̱'pssoawaistsi.”

¹³ Ki Jesus itani̱stsiiwaiks, “Kitsi̱i̱nisawaotsistapi'tsi'poaaw a̱mohk nitsskskani̱ssini, ki anni̱stsi ma̱ttsstsi̱kiistsii, tsa̱ kita̱kanistotsistapi'tsi'poaawaistsawa?”

Jesus a̱i̱soka'panistsiiwaiks o̱tsskskanissini manista̱panio'sinaists Jesus explains the meanings of His parable

¹⁴ Ki oma̱ Jesus itso̱poya'panistsiiwaiks omi̱hka otsskskani̱ssinihk: “Ihta̱i̱tsiniko'ahsii o̱tapiy'ssina ota̱a̱nissiistsi A'pistotookiwa a̱o̱miksistaisapipommao'pa.

¹⁵ Istsi̱kistsi iihta̱aksapipommaopistsi a̱kitohpiyi omi̱i̱hka moohsoko̱yiihka. Istsi̱kiiks mata̱piiks a̱nniayi; niita̱yoohtsimiaw A'pistotookiyi ota̱a̱nissiistsi; ki otsi̱naita̱waistohkokoaayawa Maka̱'pato'siyi ki itsa̱waomanistaotsimiaw A'pistotookiyi ota̱a̱niihpi.

¹⁶ Istsi̱kiistsi iihta̱aksapipommaopistsi a̱kitohpiyi otsi̱takayoohkotoksko. Ni'to̱yi niitsi̱i̱yi istsi̱kiiks mata̱piiks; a̱aitsiksimatomai'tsimiks ota̱a̱niihpi A'pistotookiyi,

¹⁷ ki ma̱ta̱o̱manisto̱o̱ma ksawai ki ma̱ta̱i̱sami̱yiika'kima̱waiksawa. Piitsio̱hkitstsi'ki mi̱yiko̱yi tsa̱htaw itohko̱yisayiksiksinowahpiaw ono̱hkaomai'takssawa, ki ita̱o̱matskaohsiyawa.

¹⁸ Istsi̱kiistsi iihtsa̱pipommaopistsi a̱kitapsspioohpiyi omi̱ksi ksisiyiksi. Anni niitsi̱i̱yi istsi̱kiiks mata̱piiks, a̱yoohtsimiksi ota̱a̱nissiistsi A'pistotookiyi

¹⁹ ki oto̱ma̱o̱maohta'paitsiihtaahsawa ma̱hkohkaakootsa'pssawa ki a̱mostsi kana̱o̱mia'nistsiistsi, a̱inawohtsita̱i̱stta̱'pihkimiaw A'pistotookiwa ota̱a̱nissiistsi kii ma̱tattohtsita̱o̱hkoyiki̱i̱waiksaw opa̱i̱tapiy'ssoaawayi.

²⁰ Istsi̱kiistsi iihtsa̱pipommaopistsi a̱kitohpiyi matsoa̱'psksaahkoi. Ni'to̱yi niitsi̱i̱yi mata̱piiks a̱yoohtsimiksi A'pistotookiyi ota̱a̱nissiistsi ki a̱o̱mai'tsimi̱ksayi, ki a̱mokskayi iihtsita̱yistapipomikka'pssiaw opa̱i̱tapiy'ssoaawayi, kii ma̱hkitsitapssoka'pssaw A'pistotookiyi; anni̱i̱ksao'ki ka̱a̱ki'nakohtohkoyikio'piks; oki, omi̱i̱ksiao'ki sta̱miita̱'pohtohkoyikio'piks.”

Iika̱kawooyi Jesus o̱tsskskanissiistsi Jesus' examples are many

²¹ Jesus itani̱i̱yiihka, “Oma̱ a̱kohko'takiwa ana̱akima'tsi, ma̱taakitsistaahsto̱omaatsi i̱sski ki a̱kssii; a̱aksistapiki'tsoohtooma̱yi otsi̱taaksso̱kanattsspiayi.

²² Oki. Omi̱ iksisa̱toohpi a̱nnohka, i̱ssoohtsika a̱ki'tska'pi; ni'to̱yi niitsi̱i̱yi, ka̱ta̱o'tsi̱stapi'tsi'pi a̱nnohka, i̱ssoohtsika a̱kitotsistapi'tsi'pa.

²³ Asa, ikka̱mohkottoohtookiinoainiki, isstsi̱i̱wokika!”

²⁴ Jesus soka̱ttanistsiiwaiks, “Soka̱'pisstsiiyika! Ksiisto̱waawa, istsi̱kiks mata̱piiks kanista̱i̱skskammaahpoaayi, ni'to̱yi kita̱akanistsskskammokoaawa A'pistotookiwa; ksiisto̱waawa a̱nnayi A'pistotookiwa kita̱akootsitssksiyiksskska̱mmokoaawa.

²⁵ Oki. Oma̱ na̱i̱ksim'sta̱a̱wa ma̱hkotsistapi'takssi, a̱nnayi a̱aksspomoawa ma̱hkotsistapi'takssi; oma̱ayi ka̱ta̱'yaiksim'sta̱a̱wa ma̱hkotsistapi'takssi ma̱tako̱noaohko̱ttotsistapi'takiwaatsi.”

A'pistotookiwa otsi̱naay'ssini a̱a̱niitstsiiwa God's kingdom spreads

²⁶ Jesus itani̱i̱wa, “Anni manista̱aka̱niitstsiihpi A'pistotookiwa otsi̱naay'ssini: Oma̱ ni̱naawa ikka̱m'ssapipommaasi,

²⁷ omi osa̱pipommaani niito̱hkanista̱yakssaisskiiwa i̱makayo'kaasi ki i̱maksawaayo'kaasi; ma̱tohkanaotsistapi'tsi̱maatsiks o̱mohtohkottssaisskiihpii omi̱stsi osa̱pipommaanistsi.

²⁸ Ksa̱hkoyi niito̱o̱hkanistsitaisaisskiiyi sapipo̱mmaanistsi; ki ai'sa̱i̱sskiisawa, a̱i̱nawaayiina'ssiawa.

²⁹ Ki aa̱i̱'tsissawa, oma̱ ni̱naawa otsi̱n'ssimaani, a̱akitsi̱pohkiima̱yi ki a̱aki̱nai'tsoyistsipi̱nnimayi.”

³⁰ Oma̱ Jesus ma̱ttaniiwa, “A'pistotookiwa otsi̱naay'ssini iiksi̱yikowa a̱hkanistohkottsso̱poya'pitsinikato'pi. Amoohk atsini̱kssinihka kita̱akohtsspommootsspoaawa ka̱hkohkottohtsi̱i̱stapotsistapi'takssoaayi manista̱aka̱niitstsiihpi.

³¹ A'pistotookiwa otsi̱naay'ssini a̱nni niitsi̱i̱wa mi'ksini̱tsiimiks isto̱o̱koainokoi. Ani̱i̱stsska isto̱o̱koainokoistsska ika̱ohpokiyawa, ki ai'sapi̱pommatookiawa

³² ika̱i̱pispssaisskssoyiawa ki ika̱waaka̱a̱niito'kaniksiyawa, ki pi'ksi̱i̱ksi mattsita̱o̱yi̱i̱'sskaayawa.”

³³ Amo̱o̱hka manista̱i̱tsinikihpi Jesus a̱nniayi noohkani̱stasa̱akotsistapi'takia̱ttsiiwa amo̱yi o̱tapiy'ssini. Ma̱tstamo'sohkohka naissksinima̱atsi̱i̱waatsitsaiksi ma̱hkohtsitssksini'sawayi;

³⁴ a̱issksaisskskanistsiiwaiksi. Ki a'ohpoki̱i̱'tsita'pa̱o̱pimassaiksi o̱miksi otohpoko̱omiksi, ki a̱nniksayi a̱i̱'sopoya'pa̱nistsiiwaiksi.

Jesus issi̱ksopom'sstaawa Jesus calmed the wind

³⁵ Nii'to̱yi ksiistsiko̱yi ota̱'yikotakohsi, Jesus itani̱stsiiwa omi̱ksaayi ota̱i̱ssksaissksinima̱atsaiks “Ma̱'ksao'pama̱atoo'p a̱moya o̱mahksikimiiyi.”

³⁶ Ki omi̱ksi otohpoko̱omiks ota̱issksinima̱atsaiks itsa̱'kapa̱atsiiyiaw amo̱ o̱tapiy'ssin, sta̱mitssapa̱aka̱o'piiyiaw omi̱m a̱a̱hkioohsa̱'tsisi omi̱ Jesus otsi̱tssapao'piihpiim. Ki sota̱momatapa̱a̱hkioohsiiyiawa. Iitsstsi̱i̱'piihka noohka̱ttohpo̱'kia̱a̱hkioohsi.

³⁷ Ki omi̱yiihk omohta̱yaahkioohssawa, ito'tsiyikssopowa ki iksi̱pahka'piiwa. Amo̱ya otsi̱yikohpai'kim'skaahsi sota̱mitomatapssapikoyi omi̱m a̱a̱hkioohsa'tsisi. Ki imatohta̱isttaatsiiyiaw.

³⁸ Oma̱ Jesus itapa̱'taayo'kaawa omi̱m a̱a̱hkioohsa'tsisi; ni̱i̱tsso̱kohkiskaawa. Omi̱i̱ksi otohpoko̱omiks otsi̱taiksikiinokaiks. Otsi̱tanikkaiks, “A̱i̱ssksinima̱atsstohki̱! Kika̱tao'kohtsiki̱i̱hpa a̱tama̱aksiniitso'ssi?”

³⁹ Jesus itsipoa̱owa. Itssi̱tsipssatoom amo̱ya sopo̱o̱yi; aaniiwa, “Miina̱ttssopossa!” Itssi̱tsipssatoom amo̱ya aohki̱i̱yi; aaniiwa, “Miina̱ttohpai'kim'skaat!” Ki sta̱m'sawa̱ttssopo̱o̱wa, ki sta̱min'sspiko̱yiwa amo̱ya aohki̱i̱yi.

⁴⁰ Ki Jesus iina̱i̱'tanistsiiwa omi̱i̱ksi ota̱i̱ssksinima̱atsaiks, “Kita̱kohkottsawaiko'pohpoaawa; kita̱kohkottaisstakakkihpoawa.”

⁴¹ Ki misko̱ma̱o̱maisskai'ko'po̱mmiawa ki otsiksi̱pisatsimmokaiks omi̱i̱ksi ota̱i̱ssksinima̱atsaiks. Itawa̱a̱nisttsiyiiawa, “Tsa̱htaw a̱hkanistapa'pipisatsitapiwa amo̱ mata̱piiw oma̱ttaayoohto̱yissi sopo̱o̱yi?”