Mark 3 - l'taamitsinikssin Mark manistaitsinikatoohpiayi 1972

Jesus iihko̱ttotoyiiwa omi̱ ni̱naayi iihko̱'mikin'sstsiyinayi Jesus healed the man with a crippled hand

¹ Ki oma̱ Jesus i̱tsskito'toowa omi̱ otsi̱taomowoohpiawa omi̱i̱ksi Jews. Ki oma̱ayi' ni̱naayiihka ma̱tokamo'tsikin'sstsi.

² Ki anni̱i̱ksao'ki mata̱piiks sta̱mikakaisstaiks ma̱hkohkossksinowahsaawayi ma̱hksipahtsa'pssi. Iiksi̱yiksskskammiawa anniiska Jesus ikkama̱akitstsi'ki ota̱kohkottotowayi anni̱hk issiko̱piiksistsiko.

³ Oma̱ Jesus itani̱stsiiwa omi̱ iihko̱'mikin'sstsi, “Poohsapoota. O'tsipo̱yita.”

⁴ Itani̱stsiiwa omi̱i̱ksi mata̱piiks, “Anni̱hka kitoka̱kihtsimaanowaayi; tsi̱a̱ a̱a̱nia'si̱wa a̱hkanisttsitsikio'pi anni̱hka issiko̱piiksistsiko? Amo̱o̱hk aka̱kihtsimaan; tsia̱ a̱a̱nia'siwa: a̱hksspomowahsi ki a̱hkakanahsi? Amo̱hk aka̱kihtsimaan; tsia̱ a̱a̱nia'siwa: a̱hksika̱motsiipiaahsi oma̱ mata̱piiwa ki ma̱hkoksistotsissi opa̱i̱tapiy'ssini?” Omi̱i̱ksi mata̱piiks ma̱tsitohkaani̱i̱waiksaw.

⁵ Oma̱ Jesus i̱ksawaahsimmiiwaiks. Ita̱a̱htoissammiiwaiks; ki̱i̱wa otsi̱i̱maokimahpiaiks, iksi̱kimmiiwaiks oto̱maisaohko̱ttaana'pssaiks ki otsawa̱o̱kamotsitsiihta̱yissaiks. Itani̱stsiiwa omi̱ ni̱naayi, “Sta̱m'sskohto̱yisaoksiki̱n'sstsaakita.” Ki ota̱i'sa̱o̱ksiki̱n'sstsaaksai, itsso̱ka'pssiwa.

⁶ Ki omi̱i̱ksi Pharisees ota̱i'sakskstsii'saw omi̱ otsi̱taomo̱woohpiaw, itohpo̱ko̱piimiiyaw stsi̱kiiks oma̱nikapiimiks annisk otsi̱sttsipihkini̱naaimoaawayisk a̱a̱nista̱yinayi Herod. Ki a̱nni̱ksao'kiaw ita̱o̱kakihtsimayawa ma̱hkanistsi'nitohpiaw anniiska Jesus.

Jesus otsi̱taokakiaanistahpiyi o̱tapiy'ssini Jesus preaches to a crowd

⁷ Oma̱ Jesus ki anni̱ksk ota̱i̱ssksinima̱atsaiks ota̱i̱'tapssowoohsawa o̱mahksikimi Galilee, omi̱i̱ksi ika̱kaitapiiyi itohpo̱'kiiwo̱'yawa. Ki anni̱ksao'ki iihto̱'tooyiks Galilee ki omi Judea

⁸ ki Jerusalem, ki saipa̱woohtsi a̱a̱nistoohpi ‘Idumea’, ki anni apa̱moohtsi niyi̱tahtayi a̱a̱nistoohpi Jordan; ki stsi̱kiks iihto̱'to̱oyawa omi̱stsisk aka̱i̱tapisskoyistsk a̱a̱nistoohpiawa ‘Tyre’ ki ‘Sidon’. Anniksao'ki o̱tapiy'ssin iihtohka̱nitao'to̱yiaw otohtsimma̱a̱niawa annisk Jesus ota̱waanisttsiihpi.

⁹ Ki omi̱i̱ksi mata̱piiksi a̱nni niitaka̱i̱tapiiyi, oma̱ Jesus itani̱stsiiwa omi̱ksi ota̱i̱ssksinima̱atsaiks otohpoko̱omiks, “Ma'tomo̱o̱kik a̱a̱hkioohsa'tsi. Nita̱kitsitssapi̱poyi nita̱akitsawopottsiskooko.”

¹⁰ Iika̱kaitapiiyiyaw otsi̱i̱kaohkottotowaiks. Ki anni̱i̱ksao'ki na̱i̱sttsiistomiiks sta̱mohtaiskohtoohpaawaniaw ma̱hkakoohkitsiksiinahsawayi.

¹¹ Ki anni̱i̱ksao'ki mata̱piiksi na̱i̱psstsistomatsiiw maka̱'pato'siiks. Ai'noa̱ssaawa omi̱ Jesus, iitsita̱o̱'tsistohkohpaawaniawa, ita̱i̱sohkawaaniiyawa,

¹² “Ksiisto̱wakaoka A'pistotookiwa oohko̱yi.” Oma̱ Jesus iitsi̱i̱yikanistsiiwaiks omi̱i̱ksi maka̱'pato'siiks ma̱hkstai'totosttohsaiks a̱a̱nistahpi.

Jesus otsi̱tohsiihkatahpi na̱tsikopottsiitapiyikska Jesus chose the twelve

¹³ Oma̱ Jesus itsita̱pa̱misoowa niito̱mmoi, itsi̱tsspiinihkatsiiwa onnata̱kaitapiyi o̱miiksi ota̱i̱ssksinima̱atsaiks, iitohpo̱kitapamiso̱omiiwaiks a̱mohka niito̱moihka. Omiiks iyitapo̱oyiksi,

¹⁴ a̱nniksayi na̱o̱'toyi na̱a̱tsikopottsitapiyi. Itani̱stsiiwaiksi, “Ko̱mohtohsiihkatohpoaaw a̱hkitohpoka'poaawahkao'si, ka̱hkita̱niitoohsoaayi ka̱hkitsitsi̱nikatahsoaayi A'pistotookiwa;

¹⁵ itsstsi̱yi mata̱piyi kita̱kohkottsiistsskomowaawayawa otoka̱'pato'siimoaawaiks.”

¹⁶ Oki. Amoksi na̱a̱tsikopotsiiks a̱a̱nistayawa: Simon (Jesus na̱ita̱aksinihkatsiiwayi ‘Peter’);

¹⁷ o̱ki, a̱moksayi o̱sskanimmotsiyi James, John, ohko̱waiks a̱mohk a̱a̱nistawa ‘Zebedee’ (Jesus ma̱ttsitsiita̱aksinihkatsiiwaiks ‘Poa'nikis’ — aanista̱panio'ssina ‘i̱ksahposskitsipahpiyawa’);

¹⁸ o̱ki, omiksi Andrew, ki oma̱ Philip ki Bartholemew ki Matthew, ki Thomas; oki oma̱ James, o̱nna a̱mosk a̱a̱nista̱yiska ‘Alphaeus’; ki oma Thaddeus; o̱ki oma̱ Simon a̱o'totamihka'siwa;

¹⁹ ki oma̱ Judas Iscariot — a̱nnahkaoka anna̱hka iisimio̱matsskaiwahk anniisk Jesus.

²⁰ Ki oma̱ Jesus itahka̱yiwa. I̱i̱ksskai'tapiiyi ota̱yaaksisstsiiwokiks, oosto̱yi ki otohpoko̱omiks ma̱takohko̱ttsinao'to̱oyi̱i̱waiksaw, iko̱maisskai'sina'sa'piwa.

Jesus otsi̱i̱tsskaama Maka̱'pato'siyi Satan is Jesus' enemy

²¹ Omi̱i̱ksi o̱kso'koaiks ota̱'yoohtsim'ssi, otsi̱totossammokaiks, otawa̱a̱miisi amoksi mata̱a̱piiks, “Ma̱tattokakiwa Jesus.”

²² Omi̱i̱ksi ni̱naaiks, a̱i̱ssksinima̱atstohkatoomiks natowo̱ka̱kihtsimaani, iihto̱'tooyaw Jerusalem; a̱waaniiyaw, “Ma̱hksi̱kaawattsistotoka maka̱'pato'siwa anna̱hk Jesus.” Ki o̱miks noohki̱i̱tssimiksi a̱waaniiyaw, “Oma̱ o'tota̱moka'pato'si a̱i̱poyisskohtoyiiwayi anniiska Jesus ma̱hkohtaohkottsiistapssko'ahpiayi maka̱'pato'siiks.”

²³ Ki oma̱ Jesus, o'ta̱ayoohtsi'ssi ota̱waaniihpiaiks, itomo̱i̱piiwa omi̱i̱ksi mata̱piiks. Ki a̱i̱kakohtsskska̱nistsiiwaiks; a̱a̱niiwa, “Maka̱'pato'siwa ma̱takohkottsistapsskoyiiwaats oosto̱yi oma̱nikapiimiks.

²⁴ Oki. Amoksi mata̱piyi ikkamo̱'kiaisikahko̱'sawa ki ikkami̱tawatta̱wahkaotsi̱i̱yissaw, ota̱kitohkottomo̱'tsookoayawa noohki̱i̱tsitapiiks.

²⁵ Oki. Ki a̱moksi kayo̱'koa'tsiiyiksi ikkama̱i̱sata'pssis a̱kita̱niitooyaw.

²⁶ Ni'to̱yi niitsi̱i̱wa oma̱ maka̱'pato'siwa; o̱miksi oma̱nikapiimiks ikka̱ma̱wa̱awatta̱i'tsskaasi, ma̱taaksisamowa a̱kitsoatohkaaksistoowa'pssiwa o'tota̱moka'pato'siwa.”

²⁷ “Oki. Ki a̱mo ikkamma̱aksipistohpattskoasi omi̱ sko̱na̱ta'pssi ma̱hksikamma'sayi a̱ksstsinao'to̱o̱missksipisttsiiwayi, ki a̱nnia ki a̱kitohko̱ttsikamoyi'wayi.”

²⁸ “Isstsi̱i̱wokik! Mata̱piiks a̱kohko̱ttsssiinomoyi osawo̱mmitsitapiy'ssoawaistsi ki o̱miks otsi̱i̱kanistahpiaw A'pistotookiyi.

²⁹ Ki ikka̱mmi̱tsstsi'ki iihta̱o̱ksi'poyi omi Natowo̱ttaki, A'pistotookiwa ma̱takohkottssksspommokiwa. Amohka a̱nni ni'tsi̱pahtsa'pssiwa ma̱takohkottohtsssiinomooki̱wa.”

³⁰ (Jesus a̱nnihkayi iihtani̱stsiiwaiks, otawa̱a̱nii'ssi a̱moksi mattsstsi̱kiiks mata̱piiks oosto̱yi omohto̱'taksistoa'pssi omi̱ maka̱'pato'siyi.)

Jesus oksi̱sstsi ki osska̱iks Jesus' mother and brothers

³¹ Oma̱ Jesus oksi̱sstsi ki osska̱iks iitsito̱'to̱oyi. Itsa̱yayoohkimayi omi na̱a̱pioyisi. Itsi̱psstotohka'taayawa ma̱hkssakssayi.

³² Ki i̱kskai'tapiyi mata̱piiks iihkani̱to'tako̱piiyaw Jesus. Ki itani̱stawa, “Asaa, o̱maoka kiksi̱ssta ki kisska̱iks a̱kao'tooyawa; itsa̱ya̱o̱piiyaw. Kita̱waanikkiaw ka̱hkitapssakssi.”

³³ Ki oma̱ Jesus itani̱stsiiyawaiks, “Niksi̱ssta ki nisska̱iks itsa̱ya̱o̱piiwaiksaw? Ma̱tsi'taoksi̱sstaatsiks ki anna̱a̱hk ma̱tsi'ta̱yosska̱naiksawa.”

³⁴ Ki itahto̱ssammiwa amo̱ksi mata̱piiks. Ki itani̱i̱wa, “Ki a̱moksao'ki mi̱kistohkanaoksi̱sstsaawa ki nito̱sskanimmayawa.

³⁵ Aa. Ki amooksi a̱wanistotsimiksi Ni̱nni ota̱a̱niihpistsi, ki a̱nniksiayi nitsikso̱'koammayawa.”