Nehemyâ 1 - Bokyi Bible

Ńkyí kyi/kim Nehemyâ kyi-kim ne Jerúsélem

¹ Nyín něen byěm ḿbyí Nehemyâ mú wǎn-Hakalyâ o/chi. Ké otukáku mú badakó Kyíselep, ké dyije ńdyí Otu Atazékez oo/rí aje bujam wǎ otu mú Pésha, me, Nehemyâ m/mû ké Súsa mú dyityém-oshê.

² Wǎn-boné ejí obónge mú onyinchéng, mú odabángê Hánanyi o/fím Júda o-fyi ne burwám-banyinchéng bakíri, ne m/bí kámbé kyi-kim ne Jerúsélem ne barî-banet eten ḿbé Jûs, [ḿbé ba/fím Bábyílon ba-fyi, ḿbé ba/mû ba/kúng kámbé ba-jâ ne mbé.]

³ Mbé ba/sét mě ba/fu, banet ḿbé [ba*da/kpú* ne baa/fyi ké byise ba/mû ké kiǐtí-busông.] Ba/fu, bacinbánet ḿbé mbe ba-kyú u fáráng ne mbé mbe ba-tún n banet-Jûs ámbe fúú. Mbé ba/sét mě to ba/fu, ekpe nyí Jerúsélem e/tôong búbú, ne afyi to ba*da/bwât ne* kyi-fím ké nkéré mú ba/shí kányí*.

⁴ Ké nkéré n/jwo ńkyín kángkáng, n/kyú me n-tii. Me n/ta dyikán ké ací chwóó, byiryíng n*da/ryí*. N/fé nshwam n-kye Osówo n/fu,

⁵ Osówo Óburúkpâbí mú mu kyíbóng, wo amu kiǐtí, ne be byimu byi-shî ng ǒ. Wo amu a-tî ng ocím eyên kanong kanong mú a/ryí ne banet ḿbé wo amu a-jê ng kámbé ne mbe ba-chi i ńkyí wo a/sét.

⁶ Óburúkpâbí, bírî achi a-tún mě a-jwo nshwam ejí mú mu n-fâ buchú ne esû ké bubwô-banet-Ézerel ḿbé bǎmgbán eyên. Me mu n-sét ng n/fu, be banet-Ézerel bii/chi byibî. Banchí ejí ḿbé kpákpá ne me bii/chi byibî.

⁷ Be bii/chi byěm ḿbyí bii*nwa ké bushú eyên* ne byi*da/chi ńkyí wo a/sét*. Be byi*da/tî byije ḿbyí wo a/kye Músis mú ḿgbán eyên o-kye bě*.

⁸ Zîim ńkyí wo a/sét Músis a/fu, â ben banet-Ézerel ba*da/fé dyityém ne me* me n/chi n-chi běn ba-pwôo byiryibyiryi ké eshê ekíri.

⁹ Nké â ben ba/bírî ba-kâm mě ba-chi ńkyí me n/sét běn, me n/chi m-bwa ne ben esim ké kyikit ńkyí me n/cá n/fu, ba-kû mě efé nang ba/bwa ba-pwôo byiryibyiryi ké ejíí emúmú.

¹⁰ Óburúkpâbí, nyín něen banet eyên ḿbé mbe bǎmgbán eyên. Wo a/nyii kámbé ké busa eyên ḿbú kiǐtí.

¹¹ Fwôo atông a-jwo nshwam ejí ne banshwam ḿbé kángkáng bǎmgbán eyên ḿbé áku, ḿbé mbe ba-ryuu ng ǒ ofê ekye. Nyángê mě kurún, a-chi otu eten o-ri mě bafip. Ké nkéré ámu, me m/mû ntî bato mú otu-Pésha.