Náhum 1 - Bokyi Bible

¹ Nyín kyitwóm kyi-kim ne oshê mú Nyínyíve, ńkyí chwǒm-akat nyí Náhum mú mkpábé mú odasét byiraa-Osówo, mú o/fím Ekóshi o/ri, o-sáng to ké nwet.

Kafâ ńké nke ka-sa ng Óburúkpâbí ne Nyínyíve

² Osówo Óburúkpâbí oo*ryuu banchi byibî*. Nyǐ mu o-kyâ banet ḿbé mbe ba-kán n ǎ ké dyishí busông. O-kúng ng kafâ esa emen o-só kámbé ewa.

³ Óburúkpâbí oo*sa kafâ osa ósa*. Nké nyǐ mu ne busa, ne oo*mîng banchi byibî busông ekye*. Kyikit ńkyí Óburúkpâbí odacen, afú nyí aryên a-tugi ng. Éfíbí ányi édúkǎndú nyí edabyí ké byikit ḿbyí odacím byiká.

⁴ Nyǐ o-nyán n baya ḿbé baryên ne buce byi-núng, o-chi byifát ḿbyí Báshan byi-jwóm, o-chi kaku ńké Kámel ka-jwóm, o-chi ekong-byichí nyí Lebánon e-kpú.

⁵ Eku nyí nyáám e-náng ng, nyí kyísí e-sámê ké bushú ḿbú Óburúkpâbí. Esí e-náng ng â Óburúkpâbí o/ribi, ejíí ne kángkáng banet emen e-tím m banê.

⁶ Ké nkéré kafâ ka-kú ka-sa ng ǎ, yeě odaman ekpen. Yeě odaman efem ké kyibî-busa-dyityém emen. Nyǐ o-pwó ng kafâ esa emen wǎ bumang-okwâ. O-cím m aká a-sêe rugirugi a-bírî édúkǎndú.

⁷ Óburúkpâbí mu kanong. Nyǐ o-ku ng banet emen ké nkéré afaníkong. Nyǐ o-tî ng banet ḿbé ba/bê ba-kâm ǎ kanong.

⁸ Nyǐ o-ju ng [banet-bushwôn emen] kángkáng wǎ kace ńké kadasú ka-pám ké bakô, o-ju ng banet ḿbé mbe ba-kán n ǎ ké dyishí.

⁹ Ebóng kyibî ńkyí bamu ba-kabe ng kyi-kim ne Óburúkpâbí. Nyǐ o/chi o-ju běn. Onet o*fí mú oda ǎ ekán ké dyishí kyi-shwôm kampén kabónge*. [

¹⁰ O/chi o-shí běn wǎ ákyikó ne aro nyí aa/jwóm.]

¹¹ Wo, ǎ oshê mú Nyínyíve, kyibî-onet kyi/fím ányi ńkyí nkyi kyi-kabe ng kyibî kyi-kim ne Óburúkpâbí.

¹² Nyín něen ńkyí Óburúkpâbí mu o-sét ng banet emen ḿbé Ézerel. O/fu, nang ké banet ḿbé Asyírya mbe ne busa ne ba/jê, ba/chi ba-ju kámbé ba-rím. Banet ejí, me n/chi běn ba-ri busông, nké mm*ba/chi n-chîchi éné*.

¹³ Kántîk, n/chi n-chi busa ḿbú ké búsóng ḿbú Asyírya bu-man, n-két bamgbokobá ḿbé ba/bwá běn.

¹⁴ Nyín něen ńkyí Óburúkpâbí oo/sét kyi-kim ne banet ḿbé Asyírya. O/fu, mbé baa*ba/chi ba-kyú ne bwǎn ḿbé ba/chi ba-kúng dyizîn ebe dyi-ca kashú*. N/chi m-bên erím-bakye nyí nyi ké byise-bakye ebe esháng. Me n-kú n-sím m dyikun ńdyí banet ḿbé Asyírya. Ba*da/kwárê mú badachîkpen*.

¹⁵ Tún n̂ achi ba-ri, onet-kyitwóm mu o-fím m ké eku o-bâ ne kyitwóm ńkyí kyinong. O-kú o-bâ ebasét dyikpóge ńdyí baa/kpógê. Banet ḿbé Júda, chi n̂g ajî-byifen enen, ba-kúng ńkyí ba/ryí Osówo ocím shwaneshwane ba-kye ǎ. Bambên atyém baa*ba/chi ba-chîkye bunwa ké esí enen ne banyá*. Baa/ju kámbé kángkáng.