JÔP MBWÔP KASHÚ-NWET KYI-KIM NE BYIRAA-BYINYÍDÍNG ḾBYÍ BANET-ÉZEREL 1 - Bokyi Bible

Sátan o/kan Jôp

¹ Nkéré obónge, onyinchéng obónge mú odabángê Jôp, o/mû o-kyú u ké Ôz, mú o/mû o-fâ Osówo, ne o/fé dyityém ne nyǐ. Nyǐ o/mû onet mú onong, ne o/mû o-níbî ng byiko emen eringe nyí nyǐ oo*chi kyibî nang kyibónge*.

² Nyǐ o/mû ne bwǎn-banyinchéng káchâtkányi ne ḿbé banyinyi bachât,

³ ne o/mû ne égot-ebû bujam esim onyiryiká, ne égot-boonyam-atû ḿbú mbu ne kyirún onyiryiká, ne égot-bampong etánge, ne égot-boonyam-atû buyén efee ne bajam batánge. Nyǐ o/mû to ne bǎmgbán chwóó, ne o/mû ne esang o-shwôm nang yeě ké eshê nyí nyi ké kyicê ńkyí esû nyi e-byí i.

⁴ Bwǎn emen ḿbé banyinchéng ba-fwam m echi dyijî ké bunye ké bunye ńdyí burwám ebe kángkáng badace, ne ba-sét ng to bwǎn-bané ebe ḿbé banyinyi dyijî ándyi.

⁵ Ké nkéré mú ací nyí dyijî aa/man, Jôp o-kó ng bwǎn emen ba-bâ o-jware kámbé. Nyǐ o-jwóbê ng ké dyicófóróng pirípirí o-chi byifen o-kye Osówo ké ocím-bwǎn emen kángkáng, ké nǎ, Jôp o/fu, kakíri bwǎn emen baa/chi byibî ba-cábê Osówo ké dyityém ebe. Ké bubwô ámbu, nyǐ o/chi byifen o-jware bwǎn emen kángkáng nkéré.

⁶ Dyicí dyibónge, barím ḿbé banong ba/dabwom ké bushú ḿbú Óburúkpâbí, Sátan mú mu Otu-Byibî-Barím o/mû ké burwám ebe to.

⁷ Óburúkpâbí o-bí Sátan o/fu, wo amu a-chi i ebóng. Sátan o-faa o/fu, me mu n-cen n n-jâ nyín n-jâ nyín, n-yêe ng byikit byimúmú ké ejíí.

⁸ Óburúkpâbí o-bí Sátan o/fu, wo a/kabe nǎ kyi-kim ne Jôp mú ḿgbán ejí. Onet o*fí nang obónge ké ejíí* mú o/fé dyityém ne me* ne mú mu kanong wǎ nyǐ*. Nyǐ mu o-shî ng mě, ne mu o-bám m byiko emen eringe nyí nyǐ oo*chi chwǒm ńkyí nkyi kyibî*.

⁹ Sátan o/faa o/fu, Jôp o/mû o-shî ng ǒ? â o/mû o*fí o-ri ng chwǒm ké kafâ*?

¹⁰ Wo aa/ku ǎ ne kyikû-banet emen ne kángkáng byěm ḿbyí nyǐ mu ne mbyí. Wo amu a-jware ng byěm emen kángkáng ḿbyí nyǐ mu o-chi i, ne aa/kye ǎ byitú byi-jê ḿbyí byidasú oshê omúmú.

¹¹ Nké kántîk, â wo a/koo ǎ kángkáng byěm ḿbyí nyǐ mu ne mbyí, nyǐ o-bwom m ké bushú eyên o-shú ǒ.

¹² Óburúkpâbí o-sét Sátan o/fu, kyi/kwárê. Kángkáng byěm ḿbyí Jôp mu ne mbyí byi/firi ké bubwô eyên. Nké *dachi a-ta Jôp oyén*. Sátan o-dim kâng.

Sátan o/ju Bwǎn ḿbé Jôp o-bên to Esang nyí Jôp

¹³ Dyicí dyibónge, ké nkéré bwǎn-Jôp mbe ké kyise ńkyí wǎn-boné ebe mú okínkán ba-chi i dyijî,

¹⁴ onet-kyitwóm obónge o/bê o-kâm Jôp ne ochéé o-sét Jôp o/fu, be byi/mû byi-kpang ng kyifát ne bampong, ne boonyam-atû bu/mû fáráng ké kyikit ńkyí mbu bu-ryí i baryî.

¹⁵ Ké abe ányi, banet-Shéba ba-rim bunwa ne be ba-jii byitú ámbyi kángkáng. Ba-ju bǎmgbán eyên kángkáng, kyi*da/shwôm me nké n/waa*. Me kǎnchí mú n/fem, n/fu, m-bâ ng ǒ esét.

¹⁶ Ne nyǐ o-kûman ńkyí nyǐ o-sét ng, ḿgbán okíri o/ribi, mú o/sét ǎ o/fu, kasabang ka/kédê ké ebû eyên ne bambâm ebû eyên, ka-ju kámbé kángkáng. Me kǎnchí nké n/fem, n/fu, m-bâ ng ǒ esét.

¹⁷ Ne ḿgbán mún to o-man ńkyí nyǐ mu o-sét ng, ḿgbán okíri o/ribi mú o/sét Jôp o/fu, bambam banet byěm ba-koo ḿbé ba/fím Kadyâ ba/rim bunwa ne be ba-koo bě boonyam-atû, ba-ju bǎmgbán eyên kángkáng, kyi*da/shwôm me*. Me kǎnchí nké n/fem, n/fu, m-bâ ng ǒ esét.

¹⁸ Ne ḿgbán mún to o-man ńkyí nyǐ mu o-sét ng, ḿgbán okíri o/ribi mú o/sét Jôp o/fu, bwǎn eyên ba/mû ké dyijî ké kyise ńkyí wǎn eyên mú okínkán,

¹⁹ ne afú nyí aryên a-fím ké kyikim-dyikán a-ba-bú kyise ánkyi a-ju kámbé kángkáng. Me kǎnchí nké n/fem, n/fu, m-bâ ng ǒ esét.

²⁰ Jôp kâng o-bûu, o-ját byídí emen ké byiko ké bafip. O-pwát dyishí. O-myii o-cít bushú kyísí, o-kye Osówo ofê,

²¹ o-raa o/fu, me ba*da mě efwon ne chwǒm* ne mm*ba/chi m-kpú ne chwǒm*. Óburúkpâbí nké o/kye, kántîk nyǐ oo/koo. Kyi/bát bakpee dyizîn emen.

²² Nang ké byěm ḿbyí byi/chi něen kángkáng, Jôp o*da/chi kyibî* o-bîn nang Osówo*.