Efyíshan 1 - Bokyi Bible

¹ Me Pôl mú ké okabe mú Osówo mu onet-kyitwóm-Jisos Karâs nké mu n-sáng ng léta mún n-kye banet-Osówo ḿbé mbe ké Éfyísus, ḿbé mbe ba-kyâ Jisos Karâs ofê.

² Kyi/bát Osówo Bonchí eten ne Jisos Karâs, Otu Kyítá eten bakye běn ochwâp ne bunyîn-dyityém.

Banjware ḿbé mbe ba-fím m ké Busun ḿbú Karâs

³ Bâ n̂g byi-kó Osówo mú mu Osówo ne Bonchí mú Jisos Karâs, Otu Kyítá eten asǎma. Ké nǎ, nyǐ oo/jware bě ké ocibi eten ne Karâs, ké okye mú o/kye bě kángkáng banjware ḿbé Busun emen ḿbé mbe ba-fím m kyíbóng.

⁴ Osówo o/cá bě kpá o/fu, be byikyú banet emen ké ocibi eten ne Karâs, ne o-kûchi ejíí, eringe nyí be byidakyú banet ḿbé banong, ḿbé ba*fí ne kyibî ké bushú ḿbú emen*. Ké nǎ, ké kyijé emen,

⁵ Osówo o/kabe kpá o-tî kyikû ké esim o/fu, ké bubwô ḿbú Jisos Karâs, nyǐ o/kpaa bě o-fé ké byiko emen wǎ bwǎn emen. Ńkyín kyi/mû ké bunyîn-dyityém emen ne okabe emen.

⁶ Bâ n̂g byi-kpee Osówo ké kiǐtí-ochwâp emen mú nyǐ o/kye bě dyikáá ké bubwô-Wǎn-dyityém emen.

⁷ Ké nǎ, ké bubwô-bukyû ḿbú Karâs, Osówo oo/chi bě byi-fem. Ányi kyi/byí, Osówo oo/pwoo bě byibî eten. Ochwâp mú Osówo o/rêe,

⁸ mú o/kye bě chwóó ké bubong ne byinyídíng emen kángkáng.

⁹ Osówo o/chi ńkyí o/mû o/kabe, ne o/chi bě byi-nyît okabe mú mu ǎ ké dyityém, mú nyǐ o/tigi kyikû ké esim o/fu, nyǐ o-chi i ké bubwô-Karâs.

¹⁰ Okabe mú Osówo o/tî o/fu, nyǐ o/chi o-chi ké nkéré mú nkéré oo/kwárê, mu něen. Nyǐ o/chi o-bâ ne kángkáng byěm kyikit kyibónge ḿbyí nyǐ oo/chi. Kángkáng byěm ḿbyí ké bubóng ne ḿbyí ké esí ne Karâs wǎ otu-dyishí.

¹¹ Ne Osówo mu o-chi i kángkáng byěm wǎ eringe o/fu, nyǐ o-chi i ké okabe emen, ne nyǐ o/cá bě be banet-Jûs o/fu, be byikyú banet ḿbé emen ké ocibi ne Karâs, ké bubwô-okabe mú emen mú mu ké ńkyí oo/tigi o/fu, nyǐ o-chi i, kyi-fím ké kiimkpet kyikû.

¹² Bâ n̂g kâng, be banet-Jûs mú byi/mû bambwôp kashú ḿbé byi/tî achi ké Karâs, byi-kpee busan-Osówo ḿbú ragerage.

¹³ Ne eringe ebónge nké kyi/mû ne ben to mú ba*fí banet-Jûs*. Ké nkéré ba/jwo kyitwóm ńkyí ntûntû, ńkyí nkyi Bǎmpém ḿbé Banong ḿbé ba/bê běn ne onyii, ben baa/bángê ké Karâs ne atyém enen. Ne Osówo oo/tî běn ekap ké byiko nyí ben ba/já ǎ nyǐ ké Busun-Osówo ḿbú nyǐ o/kye běn, ḿbú nyǐ o/mû o/ryí ocím.

¹⁴ Busun-Osówo bu-chi i mbwôp kashú-eyáré nyí Osówo o/kye bě, nyí nyi e-tông ng e/fu, be byi/chi byi-koo eyáré nyí Osówo o/ryí banet emen ocím, ne nyi e-tông ng to e/fu, Osówo o/chi o-chi banet ḿbé mbe ḿbé emen ba-fem ké byibî. Bâ n̂g byi-kpee busan emen ḿbú ragerage.

Nshwam mú Pôl o/fé

¹⁵ Ké bubwô ḿbún, kyi-fím ké nkéré mú me n/jwo kyi-kim ne dyityém enen ńdyí ba/fé ne Jisos, Otu Kyítá, ne kyi-kim to ne kyijé enen ńkyí bamu ba-tông ng kángkáng banet-Osówo,

¹⁶ me n*da/mîng ne Osówo asǎma ekó* ké bubwô enen*. Me mu n-zîim m běn ké banshwam ejí.

¹⁷ Ne mu m-bí ng Bonchí eten mú mu o-san n ragerage, mú mu Osówo mú Jisos Karâs, Otu Kyítá eten n/fu, okye běn Busun emen ḿbú bu/chi bu-chi běn ba-nyît byinyídíng ḿbyí Osówo, bu-tông běn Osówo, eringe nyí ba/chi ba-nyît ǎ.

¹⁸ Me mu m-bí ng ǎ n/fu, obâa atyém enen ba-ri kiinwángé emen, eringe nyí ben badanyît eyáré emen nyí byimu byi-tî ng achi eten ké nyǐ, nyí byi/chi byi-koo ké bubwô ḿbú okô emen, ne eringe nyí banjware ḿbé baa*nwa eri* ḿbé nyǐ o/ryí banet emen ocím ba/jê.

¹⁹ Ne eringe nyí busa emen ḿbú mbu bu-chi i bě mú byi/bángê ké Karâs bǎmkpóngé ké atyém bu/jê kanong kanong. Busa ḿbún ḿbú mbu bě ké atyém něen mbu dyizong dyibónge wǎ kiǐtí-busa

²⁰ ńkyí nyǐ o/tông ké nkéré mú nyǐ o/jwóbê Karâs ké bukyû, ne o-bi ǎ me ké kyicê-bubwô-etyebéng emen kyíbóng.

²¹ Ányi nké Karâs mu otu o-shwôm kángkáng byibî-barím ne byibî-bací ne busa-bakye nang burá ne kángkáng batu-ashí ḿbé kyíbóng. Nyǐ o/shwôm kángkáng azîn nyí adatông busa ké nkéré mún ne ké mú mu o-bâ.

²² Osówo o/tî kángkáng byěm ké byiká ḿbyí Karâs, ne o-yip ǎ o-kye banet-ékwâbashi nyí Karâs wǎ Otu Kyítá mú o/rêe o-shwôm mú kángkáng byěm.

²³ Banet-ékwâbashi ámbe ba-chi i enyam-byiko nyí Karâs, nyí e/chi ǎ o-kwárê, nyǐ mú mu o-chi i kángkáng byěm ké kángkáng byikit byi-kwárê.