Zooɛ 2 - Yálá laawoo hɛɓɛ (dc)

Yai-Laa nwɔ hvólói pa mɛ̨nį

¹ Dulu hvɛɛ Siɔn taa mɛ̨i, tómą nwɔ́ yee mąąhəɠɛɛ ɓa. Nɔi lonnii kəlee di kpɛlin, mąąhɔlɔɓo, Yai-Laa nwɔ hvólói aa həli; Yaai kɛ mąą kpuai.

² Volói tii kaa a tɛɛhilɛ kpinį yɛ ɓo a tulɔ kpinį. Gaa a yələ yɛɛ hvóló, a tulɔ kpinįn ŋį hvóló. Gaa yɛ tulɔ kpinį a pɛlɛ ɲeeɠaa diɛ, Beeləɠaai ka! Di kpulu hu kɛnɛ̨, hɛn da hva tɔɔ di la. Ku hvo ta yili ɲɔ̨nwɔ̨mąn gaa li; Ku hvo nwɔ̨nɔ̨ pai ɲɔ̨nwɔ̨mąn gaai.

³ Di kaa yɛ tíi kələn nwɔ̨n, diɛ kɛɛ kələn di tɔwɔ, di pulu yɛ lɛɛ a gbalan. Gɛɛ di hvo pa, nɔi ə kɛ yɛ Yálá-taa lon ma. Lɔi kpoloon mə da nɛɛ di pulu. Hɛn nɔpee ta hva kulɔ a di yee wolo.

⁴ Di gilɛ həɠə pələ kaa yɛ hoo, diɛ laŋin yɛ kɔ́ kɔ́ hooɠaa.

⁵ Da lɛɛ yee hu, di too dakpɛli hu; di tin ə ɓo yɛ kɔ́ kɔ́ wotoloɠaa, yɛ nwɔ̨n nən aa kɛi pola kɛ́ɛ́ kpalaa hu. Yɛ nwɔ̨n a kɛi kala kpala mįi, diɛ pa yɛ kɔlaɠa hvaŋą kɛnɛ̨; di tɔɔ pələ pɛliɛ ɉu gɔ́ ɓa.

⁶ Da kɛi lɛɠɛ nuą diɛ, nu kəlee da kpɛlin a ɲɔw, nu kəlee ɲɛ̨ilai mąą a hvalin di ɲɔw pələ ɓa.

⁷ Da gilɛ həɠə yɛ kilɛn nąŋąa. Diɛ tɛ hįį ɓa yɛ kɔ́kulááɠaa. Di ɲɛ̨i hvaŋąą di tɔwɔ di ta hva həɠə gbaalə mɛ̨i.

⁸ Da hva mɛlan vana. Mąąhɔlɔɓo, gəlee ɲɛ̨i kaa di tɔwɔ, diɛ li yɛ gbąnąą kɔ́w, da hva həɠə ɲɛ̨li ɓa.

⁹ Da pu taa mɛ̨i, diɛ laŋin ɉįi kpoloon mɛ̨i, diɛ tɛ bɛlɛ́ɠaa ɓa, diɛ lɔ finɛɛtɛlɛɠaa ɓa yɛ nwuɔ̨ nuą.

¹⁰ Nɔi yɛ dumo di tɔwɔ. Yələkɔlɔn yɛ kpɛlin. Hvóló da ɲąnin di hu yɛ kpinį. Pɛmɛ̨lɛ̨n-gɔw ta hva hvə lə.

¹¹ Yii kpɔ Yai-Laa woo kaa nii tɔɔi, nwɔ kɔlaɠai nwun na, lono və nwɔ kulaaɠaa diɛ, nuąi da nwoo pɔ mɛ̨nį kɛ, gbalai tɔɔ Yai-Laa nwɔ hvólói kɛnɛ̨i, mąą ɲɔwa, gbɛɛ ɓə a pɛli tɔɔ na?

Ka pənə ka pa Yai-Laa pɔ

¹² Yii hu kɛa! Yai-Laa woo li: Ka pənə ka pa bɔ́ ka kwəi tɔ̨nɔ̨ mɛ̨i. Ka hín nɔ, ka wɔlɔ, ka ka woolaa.

¹³ Ka lii ɓə mąąnɛ̨ɛ̨ ka ɉu ɓɛla ka mąą həɠə hvəi. 'Ka pənə ka pa Yai-Laa ka wɔ Yálái pɔ. Gbalai tɔɔ, nwɔ mɛ̨nį lɛlɛɛi, yɛ nu mąąwɛli kaa; Nii holi laa walaa, ɛlɛɛ, nwɔ ɲɛ̨imąąwɛli kaa hu kɛnɛ̨i, a mɛ̨nį nwąnąą laa nuą diɛ, yili hva gwəinɛ̨ɛ̨. Nwɔ lii nɛ̨ɛ̨ gwəi kɛnɛ̨. Niiɓa hvaa ə mɛ̨nį nwąnąą laa nu ɓa.

¹⁴ Gu hvo gbaɠala kɔ́lɔn akɛ gaa pai pənəi ə gu mąąwɛli kaa. Akɛ Yai-Laa gu wɔ Yálái kaa pai lúwɔ́ lɛɛi naa pulu, ə gɛ, guɔ gɔ́ a lɔɔ da gu yəi hinhɛ̨nŋąa.

Hin nɔɔ da Yálá hvɛliɛ

¹⁵ Ka tulu hvɛɛ Siɔn daai, ka hin noloɓo, ka ɲąąkpɔn gɛnɛ̨ɛ loloɓo.

¹⁶ Ka nu kəlee ɲąąkpɔn, ka ɲąąkpɔn mąąhəɠɛɛ too ka ka ɲąąkpɔn, ka nɛapɛlɛɛɠaa təli, ə mą kɛ ɲįnį kpələ lɛapɛlɛɛɠaa. Hulɔnon aa nɛ̨ą həɠə a nįnɛ̨ ə kulɔ ɲəi bɛlɛ́n, nɛ̨ą həɠɛɛ nįnɛ̨ ə kulɔ ɲíi pɛlɛ́ mu.

¹⁷ Gwɛəli heai da ɉaláá kulɔi di lɔwai, ɉaláá laa həli nuą di tɔɔlaa di wɔlɔ, diɛi a Yai-Laa nwɔ tínuą. Diɛ kɛ diɛ: «Yai-Laa! Yɛ nu huwui mąąwɛli kaa, hvó ə́ kwɛlin mɛlɛ too, hvó gɛ a lɔi takpɛliɠaa di wɔ yɛlɛ kulɔ ɉu hɛn, diɛ kɛ kpɛli ma: Di wɔ Yálái kaa mi?»

Yai-Laa ə nwɔ nu huwui woo pulu pənə

¹⁸ Yai-Laa nwɔ lɔi wɛli kaa mą, a nwɔ nu huwui ɲɛ̨imąąwɛli kaa,

¹⁹ Yai-Laa ə nwɔ nu huwui nwɔ hvɛli woo mu hon Yɛ diɛ: «Yili ɓa, gáá pənəi ŋį́ mɔ̨nun dɛɛ ka pɔ, da lɔ, ɛlɛɛ da wulɔ nįnɛ̨. Ka káá pai pilɛi ɉu, və́ kɛa pai ka kɛi a nu huwu takpɛliɠaa di wɔ yɛlɛ kulɔ ɉu hɛn.

²⁰ Ka yowo a həɠə ɲánwuɔ̨ pələ, ŋį́ mąą kwɛa kaa, gɛ́ bili lɔi kpoloon ɉu kpalaa hu. Di mąąkpɛɛ nuąi di tɔwɔ pələ, gɛ di pili voló həɠəi pələ gboloyá hu. Yiiɠaa di pulu pələ, gɛ di pili ɉɛɠɛi pələ gboloyá hu, di powa lulɔ kun yɛ tɛ a ɲɔ̨nwɔ̨ɔ̨, di kun yɛ ɲɔ̨n bɛlɛ nuą diɛ. Nuąi kpɔ ka di mɔ̨nɔ̨ ɓo tii, bələ ɓə da haa la.» A tɛ̨ą Yai-Laa aa mɛ̨nį ɲɛ̨i kɛnɛ̨ɠaa kɛ.

²¹ Lɔi! Hvo ɲɔw! Kwɛinɛ̨ɛ̨ kulɔ ə́ pili yələi a kwəinɛ̨ɛ̨. Mąąhɔlɔɓo, Yai-Laa aa mɛ̨nį kɛnɛ̨ kɛ.

²² Lɔwɔ huwɔɠaa! Ka hvo kɛa ɲɔw! Lɔwɛi kalaɠaa daa tɛlin wuluɠaa daa ɓa. Ɓɔɔlaa wulu da viɲəɠaa yeelaa aa hvólóon.

²³ Siɔn daai nuą, ka kwəinɛ̨ɛ̨ kulɔ. Ka ɓə́lə́n ka pili yələi. Yai-Laa ka wɔ Yálái laa hu. Mąąhɔlɔɓo, aa tulɔ tɛɛ ka pɔ; a hamą tulɔ. Yɛ ka nwun mąąɓo. Yɛ pənə yɛ tulɔ pu ka mɛ̨i a hamą lɔɔ tulɔ. Yɛ pələi ə kɛi gɛ la a bɔlɔ.

²⁴ Mɔ̨nun dan ɉiiɠaa laa aa hvɛɛ a mɔ̨nun, di wɔ hɛnɲaŋąɠaa laa ə hvɛɛ a lɔɔ da wulɔ nįnɛ̨.

²⁵ Yai-Laa woo ka, yɛ diɛ: Gwəlanŋąa kpɔ, gbəligbiɛɠaa da peeləɠaa, ɉaiɠąa da hviliɠaa, diɛi a nwɔ́ kɔlaɠai diɛ ŋį́ ɲąątɔɔ kaa, diɛ kɛɛ kala la kaa; Ŋą́ gəlee pɔɔi kulɔ ɉu.

²⁶ Ka káá pai kɔ̨nɔ̨n mį́i, kaa pilɛ ɉu, kaa Yai-Laa ka wɔ Yálái tɛ̨́nɛ̨́. Yaai mɛ̨nį kpɛa-kpɛa tii kɛ, nwumɛ̨ hva kɛa tɛ a nwɔ́ nuąi a yələ ta.

²⁷ Ɛlɛɛ ka gɔlɔn kaa diɛ, ɲą́ą́ gbinįi gáá Israɛlə nu huwu lɔwai. Kaa diɛ: Gáá a Yai-Laa ka wɔ Yálá. Ɲɔ́nwɔ́man və mą. Nwumɛ̨ hva kpɔ kɛa tɛ a nwɔ́ nuą a yələ ta.