Zooɛ 1 - Yálá laawoo hɛɓɛ (dc)

¹ Yai-Laa wooi həli Petuɛlə lon Ɉoɛlə ɓa ya ka:

Peeləɠaa pa mɛ̨nį

² Nu pɔlɔɠaa, 'ka nwóó ŋɛ̨i mɛ̨n, ka ka wəli tɔɔ kaai a nɔi hu nuą. Mɛ̨nįi ŋɛ̨i ta aa ta kɛ ka wɔ yɛnɛ̨ɛ̨ hu? A wala kɛ tii, ka nąnnii di wɔ yɛnɛ̨ɛ̨ hu?

³ Ka ɉu kulɔ ka lonnii diɛ, ɛlɛɛ, ka lonnii di mo di wɔ lonnii diɛ. Ɛlɛɛ di lonnii di ɉu kulɔ nuąi pai lɛɛi di pulu diɛ.

⁴ Yii gbəligbiɛ̨ a nɛɛ laa, peelə a gəlee mį́i. Yii peelə a nɛɛ, hvili aa gala Yii hvili ə nɛɛ, ɉái aa mį́i.

⁵ Lɔɔ gɛlɛɠaa! 'Ka nwun, 'ka ka wɔlɔ! Kaai kpɔ a lɔɔ kpələ nuą; 'ka ka woolaa. Mąąhɔlɔɓo, daa lɔɔ nįnɛ̨ kulɔ ka laamu.

⁶ Hvo gaai, peeləɠaa di wɔ kɔlaɠa aa muhəɠə, yɛ pa pɛlɛi nwɔ́ lɔi ɓa, vaŋą kɛnɛ̨, lonon vo mą. Ɲin gaa na yɛ yala hilɛ, naa kwɛlɛ ɲin yɛ ɓo yɛ yala haa.

⁷ Aa nwɔ́ viɲə yɛai lɛɛ a gboloon. Aa nwɔ́ ɓɔɔlaa wuluɠaa hu hɛɓɛ́-hɛɓɛ́. Aa gəlee kɔ́lɔ mį́i mą. Nwonwo kəlee aa kpala mą.

⁸ Ə́ woolaa yɛ́ nɛ̨ɛ̨gbɛla a hilɛ həɠə a nįnɛ̨ a haa ɲəi.

⁹ Yálá kɔ́ lɛɠɛ, da gɔ́ lɔɔɠaa daa kpɛɛ, Yai-Laa hee pɛlɛ́ mu, ɉaláá laa həli nuą, diɛi tii a Yai-Laa nwɔ tínuą daa mąąwɛli heeɓo.

¹⁰ Daa ɲɛɛ kɔ́ɠɔi hɛnŋąą kəlee mį́i kpɔ kpun, nɔi aa lɛɛ a gboloon. Gbalai ə tɔɔ, daa mɔ̨nun gəlee mį́i, lɔɔ hvo kɛa hɔlɔɓoi, nwulɔ nįnɛ̨ɠaa kəlee daa kpɛɛ.

¹¹ Tíi kɛ nuą! 'Ka ka woolaa, viɲə yɛa laa nuą! 'Ka wɔlɔ, mɔ̨nun da kpai di hu aa kala, mąąhɔlɔɓo, hihɛn da hvo ɓa li.

¹² Viɲəɠaa daa kpɛɛ ɉu. Mɔɔlaa wuluɠaa daa hvilingbɛ ɲɛa wuluɠaa kəlee daa kpala. Grenadə wuluɠaa, tow wuluɠaa, daa pomə wuluɠaa kəlee. Nuą kwəinɛ̨ɛ̨ mɛ̨nįɠaa daa kpɛɛ.

Mąąnɛ̨ɛ̨ nu kəlee di hin nɔ di Yálá hvɛli

¹³ haláá laa həli nuą, ka ka hąą yili, ka ka woolaa. Kaai ka kɛ tíɓo kɛi ɉaláá kulɔi, ka ɲiŋɛ̨, ka pa ka mąąwɛli həɠə too ka kwaną, ka yii ɉu. Kaai ɓaa nwɔ́ Yálá nwɔ tínuą, Yálá kɔ́ lɛɠɛ da gɔ́ lɔɔ hvo kɛa hɔlɔɓoi, ka wɔ Yálái yəi bɛlɛ́n.

¹⁴ 'Ka nolo ɓo nu kəlee mɛ̨i, 'ka ka mąąhəɠə hin nɔ. 'Ka galanɉonŋąą ɲąąkpɔn, 'ka nɔi lonnii kəlee təli. Yai-Laa ka wɔ Yálá yəi bɛlɛ́n, 'ka wɔlɔ Yai-Laa ɓa.

'Ka Yai-Laa nwɔ hvólói laa həli

¹⁵ Ə həli kaa! Ə kə́! Hvóló ləi ɓəi! Voló mąą aa kpuɔ, Yai-Laa nwɔ hvólói mąą aa kpuɔ, volói tii kaa pai a kɛɛ kalaa, hɛn yii a həɠə Huwalawala Kəlee Nąmu Yálá yəi.

¹⁶ Kɛlɛi gu ɲɛ̨i ɓa ɓə kɔ̨nɔ̨n ə kpɛɛ laa-ee! Ɛlɛɛ, guɔ Yálái hee pɛlɛ́ mu, ɲąą nɛ̨ɛ̨ da kwəinɛ̨ɛ̨ di mąą ə kwɛa nąą ɓa-ee.

¹⁷ Ɉihɛn ɉuwui gu bili, yɛ kpala bɔlɔ mu. Mɔ̨nun aa kpɛɛ, gələɠaa daa lɛɛ a di hvowolo, gələɠaa daa pu.

¹⁸ Ɓɛlaaɠaa diɛ wɔlɔ. Nįŋɛ̨ kpuluɠaa daa taɠa, di laa mįi hvo mą. Daatɛlɛɛ pɛlɛɛɠaa daa kpala-kpala.

Ɉoɛlə nwɔ Yálá hvɛli woo

¹⁹ Yai-Laa yɛ́ ɓə gáá wɔlɔi yɛ́. Nwɔ̨n aa gbomoɠaa kələn Nwɔ̨n nən aa nwulu pɛlɛɛɠaa kələn.

²⁰ Nɔwɔ huwɔɠaa kəlee, daa di yee laa kwələ hee yɛ́, ɲaɠaa kəlee daa kpala. Ɲa kwɛlɛ kpomóɠaa daa kələn.