Zôo 8 - Yálá laawoo hɛɓɛ (dc)

Bildadə woo dɔlɔɔ

¹ Gɛɛ ti, Sua mun Bildadə ə mo, yɛ diɛ:

² Mįnɛ̨ lɔwai ɓə ə́ kaa pai kpɛlai la woo hukulɔ ɓa? A woo yii gaa ə́ la yɛ hvaŋą tulɔ?

³ Yálá a pɛli mą tɛ̨ą kpəlaan ɉii? Huwalawala Kəlee Nąmu a pɛli mɔ̨ɔ̨ tələnmolaa kpəlaan ɉii?

⁴ Akɛ ə́ lonnii di nɛ̨ŋɛ̨n ɉəɠə mą, Ə di nwun nɛɛ di wɔ túwɔ́ pələ ɲɔ̨n ɉu.

⁵ Akɛ ə́ wɛi ə́ kaa Yálá kwɛlii, yɛ́ nɛ̨ɛ̨mą hvə Huwalawala Kəlee Nąmu ɓa,

⁶ akɛ ə́ wɔ mɛ̨nį haŋąąi bɛliɛ ɉu, a kɛ ti, gaa pai gili lɛɛi ə́ hu, yɛ pənə yɛ ə́ hee ə́ wɔ tələnmolaai hu.

⁷ Ə́ wɔ yɛnɛ̨ɛ̨ kɔ́wɔ tɔɔi a lɛɛ kpɔ tiikpə, Ə́ ɲąąkpɛɛi ə lɛlɛ kpɔ kɛnɛ̨.

⁸ Nuąi wɔlɔ daa tɛɛ, di mąąnikɛ, Ə́ kili lɛɛ tɔwɔ tɔwɔ nuą di wɔ mɛ̨nį kɔ́lɔn bələ hu.

⁹ Di gu kaa lɔ wɛi, gu hvo ni mɛ̨nį ta kɔ́lɔn, mąąhɔlɔɓo, gu wɔ yɛnɛ̨ɛ̨ kaa kpɔlɔ ni yɛ nįnįn a hiɛ lɔi ɓa.

¹⁰ Kɛlaa, di wɛi, di kaa pai pələ ɓoi yɛ́, di ə́ kilaa pɔ̨nɔ̨. Di wɔ kiliŋą laa hu, di kaa pai mɛ̨nįɠaai ŋɛ̨i ɓoi yɛ́; diɛ kɛ yɛ́:

¹¹ «Ya tea-tea a mɔ̨ɔ̨ ɓɔn ɓɛi ya hvo lɛɠɛ li laa? Hveen a mɔ ɓɔn ɓɛi naa hvo laɠi li?

¹² Ɲąą a kɛ a nɛ̨ɛ̨, di dee-o, di hvo dee-o, Kɛlaa a kpala tumɔ̨ kəlee tɔwɔ.»

¹³ Nuąi da lɛ̨ą Yálá ɓa, di wɔ yɛnɛ̨ɛ̨ laa kulɔ pələ lɔ ka ti; ɓowo mun nwɔ kilitɔɔi hu a kala.

¹⁴ Nwɔ kilitɔɔmaa laa hu a yali, mąąhɔlɔɓo, bulu heɛi hįį naląąn ma.

¹⁵ A bulu hee nwɔ pɛ́lɛ́i ɓa, bɛlɛ a hviɛn, di ma ɉon a nwalawala, a pu lɔ.

¹⁶ Gaa yɛ wului ɲa kɛnɛ̨ ɉu, hvóló ɲa, yɛ nįnįn bɛlɛ nɔw yɛa mɛ̨i.

¹⁷ Ɉamu lɔɔ kwɛni wolo hu, yɛ gɔ̨nɔ̨n ɉɔlɔɓo kwɛniɠaa lɔwai.

¹⁸ Kɛlaa da gulɔ dɔɔi, ɓɛ ti ə kɛ laa tɔɔni, yili yɛ lənə ma, yɛ kɛ hvo ta gaa li.

¹⁹ Yáá gaa, bələ ɓə nuąi tii di wɔ yɛnɛ̨ɛ̨ ɲąąnɛ̨ɛ̨ laa a kulɔ la. Ɓɛi di kɛ laa tɔɔni, nu takpɛliɠaa diɛ tɔɔlaa.

²⁰ Yálá hva wɛli kpɛɛ mąą laa kulɔ a nu haŋąą. Hva kpɔmąą tɛɛ mɛ̨nį ɲɔ̨n gɛ mun bɔ.

²¹ Gaa pai ə́ laahvɛɛi a yɛlɛ, yɛ́ ə́ laa ɓo a kwəinɛ̨ɛ̨ woo.

²² Ə́ yowoɠaa di kaa pai kɛi nwumɛ̨ hu, mɛ̨nį ɲɔ̨n gɛ nuą di wɔ pɛlɛ́ɠaai ta lɔpee hva lɛɛ laa.