Zôo 6 - Yálá laawoo hɛɓɛ (dc)Ɉobə ə Elifazə woo ŋąą pənə 1 Yili pulu, Ɉobə ə nwoo ŋąąpənə, yɛ diɛ: 2 Akɛ da pɛli kɛ nwɔ́ mɔ̨nɔ̨i kɔ́ɔn ɉii, diɛ nwɔ́ mɔ̨nɔ̨ɠaai kpɔn gee ɓa kilə ŋą. 3 Di wiɛ yee a tɛɛ gboloyá kwɛlɛ ɲɛa kɔ́w ɓa. Yili ɓə gɛi nwóó yɛ pu ná. 4 Mąąhɔlɔɓo, Huwalawala Kəlee Nąmu Yálá aa ɓɔ ɉú a nwɔ mɛ̨ɛ̨ kɔ́w, nɔ̨́ɔ̨ pələ tɛitɛi, yɛ nwąną lɔ ɉú. Yálá nwɔ ɲɔw mąą laa a muhəɠə mɛ̨́i. 5 Hoohvaalən a mɔ̨ɔ̨ tɔɔ yɛ hvaa gbənə wulu mɛ̨i? Nįŋɛ̨ a mɔ̨ɔ̨ tɔɔ yɛ vuu too naa mįi kala ɓa? 6 Hɛn hvo nɛɛ li, a mɔ̨ɔ̨ mįi yii kpolo hvo mą? Tɛɛ ɲąnin gwələ ləɠən gaa mɔ̨ɔ̨ ɉu? 7 Yii və́ kɛi gɛ ma, yili ɓə kɛa yiihu a gɔnɔ, bələi mąn ɲɔ̨nwɔ̨ɔ̨ la. 8 Gbɛɛ ɓə pai gɛi mɛ̨nįɠaai gáá vɛlii bɔ mɛ̨nį yɛ kɛ. Ɉɛn gáá vɛlii, Yálá yɛ dɛɛ bɔ́? 9 Yálá ə gíín, ə ɲee haŋą, ə mą́ą́ mɛ̨nį pili ɉu. 10 A kɛ ti, ŋį́ pɛli kɛ liilaa hɔlɔɓoi, ŋį́ kwəinɛ̨ɛ̨ hɔlɔɓo mɔ̨nɔ̨ kɛnɛ̨ɛ ti hu. Və́ pai lənəi Yálá mąą həɠɛɛ nwɔ tɔ́n ɓa. 11 Nwɔ́ kilitɔɔmaa hvaŋą ɓaa lə? Námun mɛ̨nį kpɔ yɛnɛ̨ɛ̨, nwun mąą lə? 12 Nwála-walaai mɔ̨ɔ̨ yɛ kwɛni? Ɉúwɔ ə ɓo yɛ ɓala kwɛli? 13 Gbɔn maai gáá mąąkpɔn ɉii, gaa lɔ a kpɛli, hɛn gəlee teɛ mɔ̨ɔ̨ ɲéé la? 14 Nui naanɔ̨nwɔ̨ ɓoɔ, mąąnɛ̨ɛ̨ mɛlan ə ɲɛ̨imąąwɛli kaa: a wala kɛ ti, Huwalawala Kəlee Nąmu nwɔ ɲɔw mąą laa hva kɛ ɉu. 15 Gááyɔwɔa daa mówo, yɛ ya yii da kɛ mą: Pawɛɛ, yɛ ya yii hvóló a lɛɛ lɔ dooi, aa ma kpala. 16 Di kaa yɛ ya yii hanwon dulɔ a kɛ tukpu-tukpu. 17 Hvóló laa a tee lɔ, aa mąą kpala. Hvóló a muhəɠə kpɔɔlɔ, daa ma lɔ ɲąą ɓa. 18 Hiɛ kulɔ nuą da di ɲɛ̨i pili lɔ laa, di di pulu pənə. Da pənə di pulu də li lɔi pun ɉu pələ, di lan. 19 Teman hiɛ kulɔ nuą da di ɲɛ̨i pili di mɛ̨i, Saba hiɛ kulɔ nuą di kɛi di kilitɔɔ diɛ. 20 Daa nwumɛ̨ gilitɔɔmaa laai ti hu, mąąhɔlɔɓo, daa pa di hvo hɛn da kaa li laa. 21 Bələ lɔ ɓə ka yii pələ kaa la, hvo gaai, ka mɛ̨nį ɲąąnwąnąą kaa lɔ, kaa mąn ɲɔw. 22 Və́ ta kɛ li kaa ka mɛ̨inɛ̨ɛ̨ kɛ mą́ą́, və́ ta kɛ li kaa, ka hɛn da həɠə ka yəi hɛn gɔw hu, mą́ą́ mɛ̨nį ɓa, 23 ka mą́ą́kɔ̨nwɔ̨ ɲówoɠaa yəi; Ka gúlɔ mɛ̨nį ɲɔ̨n gɛ mun ɲəi. 24 Ka gílaa pɔ̨nɔ̨, ə gɛ ŋį́ mɛ̨́i haa, lə mɛ̨nį ɲɔ̨n mə ŋį́ gɛ? Ka yili lɛ mą́ą́. 25 Tɛ̨ą woo hva nwąną nu ɓa, ka wɔ laa pələɓo nwun maa lə? 26 A kɛ ti nu hvaa woo ɓə mɔ̨ɔ̨ ka káá mąą kulɔi? Nui gilitɔɔi hvo mą, vaa wooɠaa da lɛɛ lɔ hvaŋą yəi. 27 Ka lɛɛ kpɔ kɛa ɉu, kaa təlilon gɔ́ a kpɛɛ, kaa ka nɛ̨ɛ̨yɔwɔ lɔwɔ́tɔɔ. 28 Yili ɓa, ka ka ɲɛ̨i hee mą́ą́, ŋą́ pɛli mɔ̨ɔ̨ lɛɛ kɛi ka ɲɛ̨i ɓa? 29 Ka pənə ka haŋą, nu ta hvo kɛa hulu kɛ. Gáá kpɔ moi kaa, ka haŋą. Nwɔ́ tələnmolaa hu yɛ ə kala. 30 Hvulu mɛ̨nį kaa mɔ̨ɔ̨ nɛ́n ŋą? Gwaną kpɔwɔlɔn hva mɔ̨ɔ̨ pɛli mąąwɛli mɛ̨nį hu kpɛi? |