Zôo 5 - Yálá laawoo hɛɓɛ (dc)

Mɛ̨nį ɲɔ̨n nwun gulɔi

¹ Təliɓo kɛ kan, akɛ nu a hɔlɔɓo ə bulu pənə. Malaka nɛlɛ kpɔ ɓə yá pɛli ə́ kilitɔɔ mą?

² Kilikpɛɛɲəimun a haa a liikələn gwəi; tolo yɛ hupumun baa.

³ Ŋą́ ɓowo mun da kaa kpɔ yɛ tɛ tɔwɔ, Kɛlaa, ɲąąɓa, ŋį́ nwɔ pɛ́lɛ́i nɛ̨ŋɛ̨n naa, gɛ́ diɛ:

⁴ «Nui tii lonnii mąąkpɔn mąą ɓomun və hɔlɔɓo, kiti ə too di mɛ̨i, nu hvo hɔlɔɓo hvo di mąąkɔ̨nwɔ̨.

⁵ Yaai tii, ɉɛn ə ɉɔlɔɓo, ə lɛɛ a nuąi pulu kaa diɛ di kɔ̨nɔ̨n! Bələi mąn ɲąąlən gala tinɛ̨n ŋąą la gwɛlin ma, nuą di ɉəɠə. Pulu koloon ma nuą di gwɛli ɉəɠə.»

⁶ Mąąhɔlɔɓo, mɛ̨nį ɲɔ̨n hva kulɔ lɔi mu, ə lɛɛ mąąwɛli mɛ̨nį mɔn va kulɔ lɔi ɓa.

⁷ Ee! Di nu kaa lɔ mɔ̨nɔ̨ mįi mɛ̨nį ɓa, yɛ bələi nwɔ̨n gbalən a kulɔ la mɛ̨nį kala mɛ̨nį ɓa.

Yálá təli mɛ̨nį

⁸ Nwɛ́i a kɛ a ɲą́ą́, ŋį́ nwóó tɛ kɛ Yálá ɓa: Ya ɓə ŋį́ mą́ą́ mɛ̨nįɠaa ɓo mą.

⁹ Ya ɓə a mɛ̨nį kpɛa kpɛa kɛ, yii nu kili hva gbaɠala kaa. Mɛ̨nį kpɛa kpɛai nu hva pɛli nonon ɉii.

¹⁰ Ya ɓə a tulɔ pu lɔi mɛ̨i, yɛ ya tɛɛ hihɛnŋąą pɔ.

¹¹ Nuąi daa di mąąyɛɛ, a di mąątɛ; ə gɛ mąąwɛli nuą nwun mąą yɛ pɛli ɓoi.

¹² A gbáná nuą di wɔ kiliŋąhiɛ hukala, mɛ̨nįɠaai di gili tee di kwəi, gəlee hu a kala di yəi.

¹³ Ya ɓə a kilimąą nuą too diɛ kpinįi di wɔ gbáná ɓaaləi ŋą, a kpəɲan yiliɠaai di wɔ liɛwoo tɔwɔ.

¹⁴ Hvóló ŋą ɉe-ɉe, da pili kpinį hu, Hvóló tɔɔ nwun ma lɔwai, diɛ di hiɛ pələ kwɛli yɛ kpinįi.

¹⁵ Kɛlaa, Yálá a mąąwɛli mun gulɔ di wɔ ɓɔwa ŋą, ə gulɔ di wɔ huwalawala yəi.

¹⁶ Mąąwɛli mu gilitɔɔ Yálá ɓa, yɛ nu ɲɔ̨nwɔ̨ɔ̨ɠaa laa kpulu.

¹⁷ Kɛlaa, nui Yálá a ɉutɔɔ, lúwɔ́ lon ni, Hvo tɛɠɛ ɓo Huwalawala Kəlee Nąmu nwɔ hutɔɔ ɓo hu.

¹⁸ Yálá ɓə a mɔ̨nɔ̨ laa nu mɛ̨i, yɛ ɉəɠə mɛ̨i; Yaai a kɛ hɛn dɔɔi yɛ a kɛi nwolo.

¹⁹ A ə́ kulɔ mɛ̨nį ɲɔ̨n gəlee hu gee mɛ̨i mɛ̨ida, mɛ̨ihveelɛ naa, mɛ̨nį ɲɔ̨n ɲee hva kɛa pɛli yɛ́.

²⁰ Pulu tooi lɔwai, a ə́ nwun mąąkɔ̨nwɔ̨ haa yəi, yɛ ə́ nwun mąąkɔ̨nwɔ̨ kɔ́ kɔ́ ɓɔwa yəi.

²¹ Ə mą kɛ nɛn ɲąąliɛ ɓə, hva həli yɛ́, mɛ̨nį ɲɔ̨n a kɛi pa, hva ɲɔw.

²² Ə́ kaa pai yɛlɛ kulɔi mɛ̨nį ɲɔ̨n da pulu di hu, ə lɛɛ, lɔwɔ huwɔ nwɔ mɛ̨nį ɲɔ̨nwɔɠaa di hva ə́ mąą ɲɔw.

²³ Mąąhɔlɔɓo, ka lɔwɔi kwɛniɠaa ka mįnɛ̨ həɠə, ɛlɛɛ da, ka huwɔ nwɔ mɛ̨nį ɲɔ̨nwɔ̨ɔ̨ɠaa, ka ka lɔwai pɔn naa pu.

²⁴ Ə́ kaa pai liilaa hɔlɔɓoi ə́ yəi bɛlɛ́n, yá kɛi ə́ kɔ́wɔ hu hiɛ ə́ wɔ Nįŋɛ̨ galaɠaai hu, yá gəlee kaa a ɲąą pɛliɛ.

²⁵ Ə kaa pai ə́ huwu kaai ɉu yɛ kɛnɛ̨, ɛlɛɛ, ə́ mąą yɛ poo yɛ kala ɓɔn a pɛlɛ lɔi ɓa.

²⁶ Ə kaa pai lii ə́ kámą hu, ə́ huwalawalaa ni, yɛ bələi da mɔ̨nun boloon dɔɔ la a di wɔ lɔwai.

²⁷ Kwaa ɉu kpɛ kpɔ a neelee, ɛlɛɛ, kwaa gaa ti, ə́ wəli tɔɔ a nɛlɛɛ, ə gɛ a ə́ wɔɔ.