Zôo 40 - Yálá laawoo hɛɓɛ (dc)

¹ Yai-Laa yɛ nwɔ̨nɔ̨ Ɉobə ɓa:

² Nui ŋɛ̨i hea tooi Huwalawala Kəlee Nąmu lai, mɛ̨nį ta kaa ni gwəi yɛ kɛ ə mo? Nui ŋɛ̨i da Yálá di kaa mɛ̨nį ɓoi, wooɲąą pənə ləi ɓə mąą nu la?

³ Nąąlɔwai, Ɉobə ə Yai-Laa woo pulu pənə, yɛ mą:

⁴ Lə kɛ hɛn mąą ɲą́ą́, yaai ŋą́ ə́ woo pulu pənə? Ŋą́ą́ ɲéé pɛlɛ ná, və́ kɛa hvaai.

⁵ Ŋą́ą́ kɛ hvaa, və́ kɛa pai da ɓoi, ŋį́ mo tamąą, vá kɛa da pɛlɛ mą.

⁶ Nąąlɔwai, Yai-Laa ə lɛɛ hvaŋą hu ə Ɉobə təli, yɛ mą:

⁷ Ə́ hąą yili kpaan, ə́ hulɔnu laa kɛ, Gáá pai ə́ mąąnin gɛ, ə́ nwóó ɲąą pənə.

⁸ Hvo gɔlɔn yɛ́ kiti tee mun mąą ɲą́ą́? Ə́ kaa bɔ ə́ tɛ̨ą tɛɛ ə́ kpɔwɔ pɔ, ə́ gɛ́ a hɔn mąąmun?

⁹ Huwalawala kaa ə́ yəi yɛ Yálá? Ə́ woo kaa yɛ yələ gbąląąn yɛ nwɛ́i.

¹⁰ A kɛ ti, ə́ mąą yili a kɛnɛ̨ laa, da mąąwiɛ, ə́ ɲɛ̨imąąlən gɛ yɛ́, da heeɓolaa.

¹¹ Ə́ wɔ liiholi yɛɛ nuą mɛ̨i, ə́ ɲɛ̨i yalii ma tanɔ̨n, ə kpɔɔ ɲąąkɛnɛ̨ nuą mąą yɛɛ.

¹² Ə́ ɲɛ̨i hee kpɔɔ ɲąąkɛnɛ nuą diɛ, ə́ di huyali, Ə́ mɛ̨nį ɲɔ̨n gɛ nuą huwolo.

¹³ Ə́ gəlee lɔ pɔlɔ mu, ə́ gəlee too haa gaho ŋą.

¹⁴ A kɛ ti ŋą́ ə́ laa mąąwiɛ, ə́ wɔ kɔ́i ti ə́ gɔ́ mąą mɛ̨nį ɓa.

¹⁵ Ə́ ɲɛ̨i hee tai yahə́lə́ ɓa, bələi lɔ ŋį́ bɛli la, bələ lɔ ɓə ŋį́ ə́ pɛli la. A kala mįi yɛ nįŋɛ̨,

¹⁶ Bələi ɉuwalawalaa la, yá kɛ gaai; bələi goolon gɔlɔ wala walaa la.

¹⁷ A nwon ɉaŋą ə dɔɔ, nwala-walaa yɛ kpitili. Gɔwɔ hutɔɔ pin.

¹⁸ Gɔwɠaa walawalaa yɛ ɓala kwɛli, Gəŋə kɔ́wɠaa di ɓo yɛ kwɛli.

¹⁹ Yálá nwɔ pɛli hɛnŋąą gɛnɛ̨ ta li, Kɛlaa, bɛlimun a mąą ɲɔw a ɓɔwa kwɛaa.

²⁰ Yili ɓa, hva kulɔ yái, hvo tɛ yeeɠaa diɛ, ɓɛi lɔwɔ huwɔ takpɛliɠaa da di liiɓa kɛ laa.

²¹ Kpɔlɔ mu laɠiɛɠaa ɓə a vįitɔɔ laa, yɛ noo hveen gbonoɠaa mu, yá kwɛlɛ.

²² Kpɔlɔɠaa da di nįnįn bɛlɛ mɛ̨i, ya kwɛlɛ wuluɠaa diɛ mąą kpinįn.

²³ Ya kpɛa kpɛaɠaa da hvɛɛ a liiholi, kɛlaa nwɛi hva hvaa. Ɉurdɛn a pɛli ə pu na, kɛlaa hva ɲɔw.

²⁴ Nu ta a pɛli ə kɔ́ pɛlɛ mą, ə ɉon, ə ɓo a ɲɛ̨i, yɛ ɉunwɔ wolo ɓɔ a kpala.

²⁵ Yá pɛli hvalə hon ɉii a lulɔ-kwɛli? Yɛ́ pɛli gulɔi a ə́ wɔ vuwu vuwu kwɛli?

²⁶ Yá pɛli ə́ kwɛli too ɉunwɛ̨i? Yá pɛli ə́ kwɛli ɓɔ naa yaɠan gɔw hu?

²⁷ Yɛ́ ɓə gaa pai tɔɔi, yɛ nɛ̨ɛ̨mąą hvə yɛ́? A wala kɛ ti, yɛ pɛli woo nɛ̨ɛ̨ ɓoi yɛ́?

²⁸ A pɛli nwoo kwɛlɛi yɛ́, yɛ pɛli lɛɛi a ə́ wɔ luwɔ ə lɛɛ ɉu ə haa?

²⁹ Yá pɛli pələ kɛi la, yɛ nu a kɛi pələ kɛ a nwɛ̨nį lonnii? Yá pɛli dɛɛi ə́ lon nɛ̨ąą pɔ a pələ kɛ hɛn?

³⁰ Ka pɛli ka ɲąąkpɔn ɉii kaa nɔwɔtɔɔ? Yɔwɠaa da pɛli di ɲąąkwɛlɛ di kee ɓa?

³¹ Yá pɛli ə́ ɓɔ gɔlɔ hu a kwɛli? Yá pɛli ɓɔi nwun ɉu a həmə?

³² Ə́ yee pɛlɛ lɔ ma, yɛ́ ka yaa ka lamun kɔ́, hvó kɛa pai da kpɛli kɛi.