Zôo 32 - Yálá laawoo hɛɓɛ (dc)Elihu hvaa woo 1 Nu haaɓai tii di kpəla kɛa Ɉobə woo pulu pənɛ̨ɛ̨ ɓa, mąąhɔlɔɓo, ə kɛi gbɔwɔ lɛ a nui ɉɔn və mą. 2 Nąąlɔwai, Elihu yii gaa a Buzə mun Barakeɛlə lon, ə ɓo a Ramə huwuhu mun da, nii ə holi. Ə níiholi Ɉobə pɔ, mąąhɔlɔɓo, yili ə kɛi gbɔwɔ kɛ a tələnmomun, dɛɛ Yálá ɓa. 3 Ə níiholi nwɔ̨nɔ̨ mɛlaa haaɓai pɔ, mąąhɔlɔɓo, di hvo pɛli Ɉobə woo pulu pənəi; yaamun, diɛ Yálá kaa a mɛ̨nį ɲɔ̨n gɛ mun. 4 Elihu hvo kɛi pələ ɓo Ɉobə ɓa, mąąhɔlɔɓo, mɛlaa kəlee pɔlɔ pɔlɔɔ kɛ mą. 5 Kɛlaa, gaai kɛa Elihu ə mo yɛ kɛ, Ɉobə woo pulu pənə woo hvo pɛli li kulɔi mɛlaa la, ə níiholi kɛa. Elihu hvaa woo dɔlɔɔ 6 Buzə mun Barakeɛlə lon Elihu ə mo kɛa, yɛ diɛ: Nwɛ́i, gaa a hilɛnon, ka wɛi ka pɔlɔ pɔlɔɔ. Yili ba, ɲɔw ə kɛ ɉu, mą́ą́ yɛ kpɛli, nwɔ́ mɛ̨nį kɔ́lɔn gili lɛ mɛ̨nį ɓa kaa. 7 Ŋą́ kɛi kɛ diɛ: «Nu pɔlɔ laa kaa pai hvaai, kwɛlan damąą ɓə pai kili mɛ̨nį lɛi.» 8 Kɛlaa, tɛ̨ą kili kaa nu hu, Ya ɓaa: Huwalawala Kəlee Nąmu Yálá nwɔ Kilii. 9 Pɔlɔ pɔlɔ hɛn vaa kili, hilɛ golo laa hva nu kɛ a tələnmomun. 10 Yili ɓə gɛ, gɛ́, ka ka wəli tɔɔ; ɲą́ą́ gbɛli ŋį́ nwɔ́ kili mɛ̨nį lɛ. 11 Ka gɔlɔn kaa, gílitɔɔi kɛ ka hvaa woo ɓa, Ŋą́ kɛi nwə́li tɔɔ ka wɔ pələ ɓo woo ɓa, gɛ́ nwə́li tɔɔ nu tɛitɛi woo ɓa. 12 Ŋą́ lɛɛ kpɔ ka woo pulu, gɛ́ ɉu kpɛ, Kɛlaa, nu tɔ̨nɔ̨ kpɛli hvo Ɉobə woo pulu pənə li, nwooɠaai ə mo, nu ta hvo bulu həɠə li. 13 Ka hvo tɔɔ kaa kɛ diɛ: «Kwaa mɛ̨nį kɔ́lɔn gili hɔlɔɓo, Yálá lɔ ɓə ɲee a pɛli tɛɛi nui ŋɛ̨i ɓa, nu kan vəi.» 14 Ɲą́ą́ hvəi ə nwɔ pə́lə́ɠaai haŋą yɛ mo mą́ą́; ka wooɠaa hvəi nwɔ̨nɔ̨ gáá pai bulu pənəi la. 15 Di kaa li! Daa di hvina tɔ́n, di hvo pɛli li hvaai kɛa. Daa di woo tee di la. 16 Ŋą́ mą kɛa nąą mąą kpɔn, di hvo pai hvaai, mąąhɔlɔɓo, nwoo pulu pənə woo kəlee aa kpɛɛ di la. 17 Ɲą́ą́ ɓə kɛa pai hvaai. Ɲą́ą́ gbɛli, gáá pai nwɔ́ mɛ̨nį kɔ́lɔn gili lɛi mą. 18 Mąąhɔlɔɓo, nááhvɛɛi a mɛ̨nį tamąą, ɛlɛɛ gwə́i mɛ̨nįɠaa di kaa mą́ą́ wəleen ɉii. 19 Gwə́i kaa yɛ lɔɔ nįnɛ̨ yii gulɔ wolo kwɛlii Yai vinnatɔ́n bələ, a bu hɛnɲąŋą ɓɛla. 20 Mąąnɛ̨ɛ̨ ŋį́ hvaa, ə gɛ ŋį́ vinna kulɔ. Gáá pələ həɠəi, ŋį́ ə́ woo pulu pənə. 21 Və́ pai tɔɔi nu ta pulu, Və́ pai nu ta ɲąątɛi. 22 Hɔlɔmun, və́ wəlɛɛ nu ɲąątɛ, a wala kɛ ti, Bɛ́limun a pɛli kɛ nwún na pilii. |