Zôo 27 - Yálá laawoo hɛɓɛ (dc)Ɉobə woo bow naa 1 Nąąlɔwai, Ɉobə ə pənə nwɔ̨nɔ̨ yɛ diɛ: 2 Yálái aa lənə nwɔ́ tɛ̨ą ɓoi naa hu, Huwalawala Kəlee Nąmu, yii náá hvɛɛi a liikələn gwəi, naa hu. 3 Yii kpɔ gáá nii nɔ̨ɔ̨ ɉii, nɔ̨ɔ̨i Yálá ə doo ɉú, yii kpɔ gaa ni kulɔi ɉúnwɛi, 4 Gáá gwɛ́lai gɛ́, woo ɲɔ̨n dɔ̨nɔ̨ kpɛli hva pɛli kulɔi ná. Nɛ́n va pɛli ɓowo woo ɓoi. 5 Akɛ ŋį́ tɛ̨ą tɛɛ ka pɔ, kpalo ə ɓɛla mą́ą́, ə lɛɛ ɉu nɔ́w ə kpɛɛ ɉú, ŋį́ mo gɛ́ hɔn və mą́ą́. 6 Gáá tɔɔni nwɔ́ tələnmolaa pulu, ə lɛɛ, və́ pai həɠəi bulu. Gílíŋahiɛ pələ, və́ ɉɔ́n gaai mą́ą́, hvóló tɔ̨nɔ̨ kpɛli yee mu. 7 Mɛ̨nį ɲɔ̨n ə laa ɲówo ɓa, yɛ bələi a laa la nu ɲɔ̨nwɔ̨ɔ̨ ɓa, ə laa gɔ́yɔwɔ ɓa, yɛ bələi kpɔlɔ a laa la nwąnąlɔ mun ma. 8 Kɛlɛi ka kɛ kɛi ma: «Tɔnɔ lə kɛɛ ɓə nwąnąlɔ mun a pɛli gilitɔɔi ma, mąąhɔlɔɓo, Yálá kaa pai nwɔ yɛnɛ̨ɛ̨ kulɔi ɲəi? 9 Kaa kɛ diɛ, Yálá kaa mɔ̨ɔ̨ pai nwəli tɔɔi domɔ̨ woo ɓa ɓəi, ɓɛlɔwai mɛ̨nį ŋąąnwąnąą a laa la ma? 10 A pɛli mɔ̨ɔ̨ galihva ɓoi Huwalawala Kəlee Nąmu ɓa, a pɛli mɔ̨ɔ̨ Yálá təlii a lɔwai lɔpee.» 11 Gáá Yálá nwɔ hoɓon naa lɛi kaa. Və́ pai Huwalawala Kəlee Nąmu kiliŋąhiɛ pələ looi kaa. 12 Yii kpɔ ka kəlee kaa gbaɠala kaa, lə mɛ̨nį ɓa ka hu a pu kaa, a kpɔɔ ɲąą kɛnɛ̨ laa? 13 Mɛ̨nįi Yálá ə ɉee túwɔ́ pələ ɲɔ̨n gɛ mun dɔwɔ, ya ka, ɉɛn mɛ̨nį ɲɔ̨n gɛ mun gaa pai ɉɔlɔɓoi Huwalawala Kəlee Nąmu yəi, ya ka. 14 Nonnii kpulu hu ə mą kɛnɛ̨, da kɛ lɔ a ɓɔwa kɔ̨nɔ̨n, ɉuwu ə lɛɛ a pulu kɔ̨nɔ̨n. 15 Yiiɠaai da lɛɛ a di hvulú, kwəi kulɔ nwɔ̨n ə di paa, di wɔ kalanənŋąą di hva pɛli di wɔlɔ ɓoi. 16 Ə mą kɛ wali kələi kɛ, yɛ da kɛi muluun gələ lɔi ɓa, ə mą kɛ mąą həɠəɠaa pui gee mɛ̨i yɛ ləɠi pɔlɔ, 17 a gbɔn gee ɓa ti, a lɛɛ a tələnmomun mąą həɠə, nwali nwɛi, nui ɉaŋąą, ya ɓə a ɉɔlɔɓo. 18 A nwɔ pɛlɛ́i tɔɔ yɛ nwɛ̨nį taa, yɛ nwɛ̨nį kpɛmun ɉee kələ. 19 Nąąlɔwai, hɛn gɔw a kɛ ɲəi, gəlee kəlee kpɛɛ li, a ɲɛ̨ilaa ɓo, hva kɛa hɛn da kaa. 20 Mɛ̨nį ɲąąnwąnąą a ɉon dɛɠii yɛ ya hvɛɛ, Hvólógonon a nwean nɔ tanɔ̨n a kpinį. 21 Hvaŋą a həɠə hvóló kulɔi pələ, ə li la kwɛa la, vaŋąi ti a gulɔ ɲii pɛlɛ́ mu. 22 Da ɉɛn, di hva mąąwɛli kaa, a gilɛ həɠə, yɛ kɛ ə tee donwą tɔwɔ, 23 a too, diɛ huluun mɛ̨i, ɓɛi ə kɛ laa nąą nuą diɛ di laa pu ɉu. |