Zôo 2 - Yálá laawoo hɛɓɛ (dc)Yálá-taa mɛ̨nį 1 Ə kɛ a hvóló ta, malakaɠaa di kɛi li Yai-Laa lííla. Ɓilihi ə lɛɛ di lɔwai, ə lɔ. 2 Yai-Laa yɛ ɓilihi ɓa: «Ə́ həɠə mį?» Ɓilihi yɛ mą: «Ŋą́ həɠə gɔ́wɔ́i hiɛi lɔi mɛ̨i.» 3 Yai-Laa ə mąąnikɛ, yɛ mą: «Ə́ nwɔ́ tímun Ɉobə kaa? Ɲɔ̨wɔ̨mąn və lɔi mɛ̨i; gaa a nui dúwɔ pələ lɛlɛɛ, ɉaŋąą, yɛ ɲɔw Yálá ɓa, yɛ mąą kwɛa mɛ̨nį ɲɔ̨n dɔwɔ. Aa tɔɔ kpąąn nwɔ túwɔ́ pələ lɛlɛ laa hu, kpɛli kpɔ ka ti ə́ gɛ, ə gɛ, ŋį́ mɛ̨nį nwąnąą laa mą.» 4 Kɛlaa, ɓilihi yɛ Yai-Laa ɓa: «Nu a pɛli ə mɛlan gaalon gulɔ a haláá, gbɔwɔ nwun mąąɓo mɛ̨nį ɓa. Hɛn kpɔ gaa nu yəi, a pɛli ə gəlee kwɛlɛ nwɔ yɛnɛ̨ɛ̨ mąą mɛ̨nį ɓa. 5 Kɛlaa, gɛ́ lɔ ə́ hvaa mą, mɛ̨nį ta ə həli gbinį ɓa a nwąnąą, yɛ həli gɔw ɓa; gu mąn doo a hea, gaa pai ə́ nɛ̨ŋɛ̨n naa ə ɲɛ̨i ɓa.» 6 Nąąlɔwai, Yai-Laa yɛ ɓilihi ɓa: «Ə kɛ ti kan, ŋą́ą́ dɛɛ ə́ pɔ, kɛlaa, 'hvo lɛɠɛ nɔw ɓa.» 7 Ɲąąɓa ɓilihi ə həɠə Yai-Laa lííla. Ə li, ə tiha ɲɔ̨n ɲɛɛ a Ɉobə, ə həɠə nwuɔ̨ ə kulɔ la, gɔwɔɲą. 8 Nąąlɔwai, kwɛli ləɠi kalan mə Ɉobə ə kɛi mąą wɔlɔ la, ɉeɛ luwu hu. 9 Ɉobə nɛ̨ą yɛ mą: «Ə́ kaa lɔ pai lɛɛi ə́ wɔ túwɔ́ pələ lɛlɛi ŋɛ̨i ɓa a hvóló kəlee? Yálá nɛ̨ŋɛ̨n naa, ə́ haa tɔ́nɔ̨!» 10 Ɉobə yɛ nɛ̨ą ɓa: «Yɛ́ hvaa yɛ nɛ̨ɛ̨nui hva mɛ̨nį ɲąąkaa. Mɛ̨inɛ̨ɛ̨ lɔ ɓə gwa ɉɔlɔɓo Yálá yəi, a nwɔ nu kpɔɔ laa hɛn, mɛ̨nį ɲąąnwąnąą yaan, lə mɛ̨nį ɓa gu hva pɛli gu yee heei yili mu?» Mɛ̨nįɠaai ti kəlee hu, woo ɲɔ̨n və kulɔ Ɉobə la. Ɉobə mɛlaa haaɓa di pa di woo pili mą 11 Ɉobə mɛlaa haaɓa di mɛ̨nįɠaai ti bələ mɛ̨n. Di həɠə di pɔ nɔiɠaa, diɛ pa di woo pilii mą. Elifazə ə həɠə Teman; Bildadə ə həɠə Sua; ɛlɛɛ Sofarə ə həɠə Naama. Di kəlee di pɛli ɉu, ə gɛ di pa di Ɉobə nwɔ mąąwɛli hee ɓo, di niilaa. 12 Kulɔi di mo kwɛa la, di di ɲɛ̨i hee Ɉobə ɓa, di hvo pɛli gɔlɔn ɉii. Di kəlee di tomą a wɔlɔ. Nu kəlee ə mąąhəɠə hu ɓɛla, diɛ munuun gbala pili yələi, yɛ pu di nwuɔ̨. 13 Di lɛɛ heeni Ɉobə kwɛlɛ hvóló mɛ̨ihveelɛ da kpinį mɛ̨ihveelɛ yeemu, di ta hvo pɛli hvaai, mąąhɔlɔɓo, mɔ̨nɔ̨i ti Ɉobə ə kɛi mįi, ɲɛ̨i kɛnɛ̨i kɛ. |