Zôo 17 - Yálá laawoo hɛɓɛ (dc)Kilitɔɔi hvo kɛa ɲə́i 1 Nɔ̨́ɔ̨ kaa kpɛɛi ɉu, ɲíi hvóló yɛ kpɛɛ. Gáma laa a tɔɔ. 2 Hvo gaai, yɛlɛ kulɔ ɉu nuą lɔ ɓə gwɛ́lɛ, di wɔ muhəɠə naa ɓa, hva yii pa ɲɛ̨́i. 3 Yɛ́ kpinįi, mą́ą́kɔ̨nwɔ̨ di yəi, ə kulɔ ə́ pulu, gbɛɛ ɓə a pɛli tɔɔi búlu? 4 Yáá di kili laa kpulu tɛ̨ą tɔwɔ, yili ɓa, hvo hvaa mą di yee hvo tɛɛ mą́ą́. 5 Gaa yɛ nui da kɛ mąą hanwon ɉɔɔi, diɛ kɛ mą: «A mɛlaa təli kɔ̨nɔ̨n ma, nonnii diɛ wɔlɔ pulu yəi.» 6 Daa gɛ́ a lɔiɠaa di wɔ yɛlɛ kulɔ ɉu hɛn. Gáá pai kɛi a nu kəlee mąą ɲɔw hɛn. 7 Ɲɛ̨́i aa pɛlɛ ma a lii kələn gwəi; dɔ́ɔ́ tɔɔiɠaa kəlee hu yɛ haa. 8 Tələnmo nuą da yili naa kaa, yɛ di hviikpɛɛ. Nuąi di hɔn və diɛ, da tɛɠɛ ɓo mɛ̨nį ɲɔ̨n gɛ nuą hu. 9 Tələnmo nuą di kanąn tələnmolaa ɓa, nuąi di yee mąąhəɠɛɛ, di hvaŋą ta yɛ pɛlɛ ma. 10 Yii ɓaa ka wɛi, kaa ɓə gáá kaa, ka pa, ka pənə ka pa kani. Və́ kilimąą mun dɔ̨nɔ̨ kpɛli kaa li ka lɔwai. 11 Nwɔ́ hvólóɠaai daa tɛɛ, da giliŋąhiɛɠaai kpɔ kɛ mą́ą́. Ə mą kɛ níí hu mɛ̨nįɠaa. 12 Di kaa lɔ bɔ di kpinį kɛ a yələɓoɔ, da kɛ kɛi diɛ kɛɛ pɔ̨nɔ̨i lɔwai aa həli, a ɓɛlɔwai kpinį a kɛ pɛlɛi la. 13 Lə ɓə kɛa ŋą́ gílitɔɔ mą, nwɔ́ pɛ́lɛ́i kaa kɛa ŋąmoątaa. Ŋą́ą́ náái kulɔ kpinį hu. 14 Gɛ́ kɛ gámą ɓa: «Yɛ́ ɓə a ną́n», koloɠaa di wɛi, gɛ́ kɛ diɛ: «Néé da mą́ą́hala.» 15 Nwɔ́ kilitɔɔmąą laa ə li mį? Gbɛɛ ɓə gílitɔɔi kaai? 16 Kwa yaa ku kaa pai yɛɛi ɲąmuątaa. Ku kɛ a pɔlɔ kɔ̨nɔ̨n. |