Zɛnɛse 7 - Yálá laawoo hɛɓɛ (dc)

Noe ə lɔ gələn ɉu

¹ Yai-Laa ə mo Noe ɓa yɛ mą: «'Lɔ gələn ɉu, yɛ́ ka ə́ yəi bɛlɛ́n nuą kəlee. Hvo gaai, ŋą́ą́ ə́ kaa ə́ ɓɛlaa lɔwai, ə́ tələnmoɔi ɲɛ̨́i ɓa.

² Huwɔ mąąhəɠɛɛ ɉilɛ da ɉaa mɛ̨ihveelɛ həɠə, kɛlaa, huwɔ kɔ́hɔɓoɔ nwɛi, ɉilɛ tɔ̨nɔ̨ da ɉaa tɔ̨nɔ̨ həɠə lɔ.

³ Nwɛ̨niɠaa lɔwai, nwɛ̨ni hilɛ da ɉaa ɉuwu heei mɛ̨ihveelɛ həɠə, əgɛ, di huwu nwun mąą ə ɓo.

⁴ Hvo gaai, aa lɛɛ pulu a lɔwɔ tɔ̨nɔ̨, gáá pai tulɔ pui hvóló pow nąąn kpinį pow nąąn ɲee mu, nɔ̨ɔ̨nɔ̨ɔ̨ hɛnŋąąi kpɔ ŋį́ di pɛli, ŋį́ gəlee nwun na pili.»

⁵ Mɛ̨nį tii Yai-Laa ə mo Noe ɓa, ə gɛ, kpɔlɔɔ yɛ bələi di mo la mą.

Ɲánwąną pai lɔwai

⁶ Noe kaa kwɛlan ə kɛ a kwɛlan nwun mɛ̨ida, ɓɛlɔwai ɲánwąną ə kɛi paa la lɔi mɛ̨i.

⁷ Noe ə lɔ gələn ɉu, nɛ̨ą da nonnii ə mą kɛ, da di nɛ̨ąni, əgɛ, di hvo pa lɛɛ ɲánwąną hu.

⁸ Huwɔ mąąhəɠɛɛɠaa, da yiiɠaai di mąą hvo həɠə li, yələi nwɛ̨niɠaa da tala huwɔɠaa kəlee,

⁹ di həli Noe nwɔ kələn ma. Gəlee ɉilɛ da ɉaa, yɛ bələi Yálá ə Noe tí la.

¹⁰ Lɔwɔ tɔ̨nɔ̨ tɛɛ pulu, ɲánwąnąi tii ə laa lɔi mɛ̨i nąą kəlee.

¹¹ Noe kaa kwɛlan nwun mɛ̨idanąą, ɲąnin veelɛ, voló pow gɔw mɛ̨ihveelɛ yələ, lɔi laa ə ɓo, yələkɔlɔn naa ə ɓo, yá yɛ kulɔ nąą kəlee.

¹² Tulɔ ə pu lɔi mɛ̨i, hvóló pow nąąn kpinį pow nąąn ɲee mu.

¹³ Volói tii ɓə, Noe, nɛ̨ą, non ɉinąą haaɓai Sɛmə, Kamə da Ɉafetə da di nɛ̨ąni haaɓai di lɔ la gələn ɉu;

¹⁴ ə mą kɛ, huwɔ huwu kəlee, tala huwɔɠaa kəlee, da nwɛ̨niɠaa kəlee, ə mą kɛ koon-koon ɉɛnŋaa kəlee.

¹⁵ Nɔ̨ɔ̨-nɔ̨ɔ̨ henŋaa kəlee, ɉilɛ da ɉaa di pa Noe pɔ, ə di lɔ gələn ɉu.

¹⁶ Ɉɛnŋaa tii, ɉuwu kəlee tɛitɛi ɉilɛ da ɉaa ɓə kɛi lɔ gələn ɉu, yɛ bələi Yálá ə Noe tí la. Yili pulu, Yai-Laa ə gələn naa kpulu Noe ɓa.

¹⁷ Ɲánwąnąi tii ə hvóló pow nąąn gɛ lɔi mɛ̨i. Ɲá ə hvɛɛ, ə gələn muhəɠə.

¹⁸ Ɲá ə hvɛɛ, ə tɛ lɔi mɛ̨i nąą kəlee, gələn yɛ ɓo ɲa ŋą.

¹⁹ Ɲá ə hvɛɛ, kpɔ ə laŋin yee kpɛa kpɛaɠaa mɛ̨i.

²⁰ Ɲá hvɛɛ, ə laŋin yeeɠaa mɛ̨i a yee laa mą pow kɔ́w lɔɔli.

²¹ Nɔ̨ɔ̨nɔ̨ɔ̨ ɉɛnŋaai kpɔ kɛ lɔi mɛ̨i, gəlee di haa; nwɛ̨niɠaa, huwɔɠaa, da nɔ̨ɔ̨nɔ̨ɔ̨ ɉɛnŋaa kəlee, ə mą kɛ, nuą, diɛi kpɔ kɛ lɔi mɛ̨i, gəlee di haa.

²² Hɛn kpɔ kɛi nɔ̨ɔ̨, diɛi kpɔ kɛ lɔi kpalan ma, gəlee di haa

²³ Bələ ɓə lɔi mɛ̨i hɛnŋaa kəlee nwun na ə pili la, ə gɔwɔ tɔɔ nu ɓa, ə li la huwɔɠaa pɔ, nwɛ̨niɠaa da tala huwɔɠaa kəlee; gəlee di haa, ə lɛɛ lɔ a Noe da yiiɠaai kɛ bɔ gələn ɉu.

²⁴ Ɲá hvɛɛ ə lɛɛ lɔi mɛ̨i, a hvóló nwun dɔ̨nɔ̨ hvóló pow lɔɔli.