Wɛli 8 - Yálá laawoo hɛɓɛ (dc)1 Ee! Ŋą́ kɛ kpɔ bɔ ə́ kɛ a mą́ą́hulɔnu, a mą́ą́hulɔnui kwa yaa ku ɲįnį tɔ̨nɔ̨ kpələ! Gwa yɛ́ gwa kwiɛn gɛ, ŋą́ ə́ nɛ̨nɛ̨ɓo kɛ, nui lɔpee ta hva kɛ náá ɲɔ̨n mo. 2 Ŋą́ li kɛ ə́ yee hon, gu həli gáá lee ɓa, ə́ li kɛ wɛlikɛmąąlaa lɛ mą́ą́, néé yəi bɛlɛ́n. Ŋą́ nwɔ́ lɔɔ mąą kun nɛ̨ɛ̨ tɔɔ ə́ la, ŋį́ gaani yá tɔɔ ə́ la. 3 Gɔɓɛyee ə kɛ laani nwún mu, mamįiyee yɛ náŋąn gəŋəla. 4 Ka ka gwɛla, Ɉerusalɛmə nɛ̨ɛ̨lɛa, ka ka kwɛla a palai-lomąɠaa, kpɔ a kpalan mɛlaɠaa laa, kaa ka hvo pai yíi tee wɛlikɛmąą ɲɛ̨i, ka hvo wɛlikɛmąą nwun; gwəinɛ̨ɛ̨ mɛ̨nį hvo pa tee mɛ̨i. Nɛ̨ɛ̨lɛa 5 Nɛ̨ɛ̨non nɛlɛ ɓə ŋɛ̨i həɠəi nɔi pun ɉu pələi, ɲee ə ɓo nwɛlikɛmąąmun ɲəi? Gu həliɛ mangolon nwulu mu, ɓɛi ə́ lee əí mąą koo həɠə laa, ɓɛi ə́ lee əí hɔlɔɓo laa, ŋą́ ə́ nwun naa. Nwɛli nɛ̨ɛ̨nu 6 Náá ə́ lii mɛ̨i, náá ə́ kɔ̨nwɔ̨n ɉu. Gbalai tɔɔ, wɛlikɛmąą walawalaai haa ɓa; nwala walaai yɛ haaɓɛlaa taa. Wɛlikɛmąą a kɛɛ kələn yɛ nwɔ̨n, bɔɔ ə ɓo yɛ Yai-Laa nwɔ nwɔ̨n. 7 Yá ta lɔpee hva pɛli wɛlikɛmąą nwɔ̨n nuwun ɉii, ə mą kɛ yá kpɛa kpɛaɠaa daa hvuluun mą. Gbɛɛ ɓə a pɛli ɲəi bɛlɛ́n ɉɛnŋaa kəlee lɔwɔ́tɔɔi, yɛ wɛlikɛmąą ya la! Yaamun, wɛli kpɛɛ mąąlaa lɔ ɓə da gulɔ la. Hilɛlɛa 8 Ku mąąhala kaa tanɔ̨n, yɛ ɓo a nɛ̨ɛ̨non, ɲįnį kpɛli hvo ni kulɔ li, hvólói da naa ɓo la hilɛtai mɛ̨nį hu, kwa gɛ ləi? 9 Akɛ a taa mąąkpɛɛ hįi! Kwa mɛ̨i laa a wali kwɛli, akɛ a pɛlɛ́ laaləi kpon, kwa kpitili wulu tɔɔ bulu. 10 Gáá a taa mąąkpɛɛ hįi, ɲįnįɠaa ɓə di kaa a mɛ̨i pɛlɛ́. Akɛti, ŋą́ liilaa hɔlɔɓo di yəi. Nwɛli hulɔnu 11 Viɲə yɛa ə kɛ Salomɔn yəi Baalə-Hamɔn, ə galihvaɓo mɛ̨i kaa nuą diɛ. Mąąnɛ̨ɛ̨ kɛ nu tɛitɛi yɛ pa bɔ a ɉɔ̨nwɔ̨, a wali kwələ waa tɔ̨nɔ̨. 12 Nwɔ́ viɲə yɛai kaa ɲə́i, Salomɔn! Ə́ wɛi ɓaa ə́ nwɔ wali kwələ waa tɔ̨nɔ̨, mɛ̨i kaamun nwɛi ɓaa wali kwələ nwun veelɛ. 13 Nwɛ́likɛmąą nɛ̨ɛ̨nu! Yɛ́i ə́ kaa heeni nɔw yɛa, mɛ́laaɠaa kaa ɓɛ, di wəli tɔɔ, ə́ woo ɓa. Ə́ woo tɛ, ɲą́ą́ gbɛli ŋą́ mɛ̨n. Nwɛli nɛ̨ɛ̨nu 14 'Li kilɛ! Nwɛ́likɛmąąmun, laŋin gbɔ yɛ lomą, ə́ gilɛ həɠə yɛ tówá. Li ɲee mąą kun nɛ̨ɛ̨ɠaa nwuɔ̨. |